未結婚前,我的確有呢個諗法。一個男人,就算生到八兩金咁既樣都好,都總認為以自己男性魅力,可以搵個再靚啲,身材再好啲既女人做自己女朋友,又或者響仲未結婚同居之時,女同事會唔知點解上左自己屋企,又唔知點解會同自己發生一夜情。
婚姻實在太困身,聽朋友講最多就係結左婚之後會冇晒朋友,冇晒自己既私生活,再唔可以打機打通宵,飲酒飲天光,人生將會返去細個俾父母監視既階段,對於婚姻,我當時真係冇半點憧憬,更惶論希冀。
我承認年少時既我的確有點幼稚,我愛我太太,卻發現原來我更愛我自己。婚事我沒有跟進太多,聽得太多男人對婚事不聞不問,以為自己亦認該像其他男人一樣對婚事處之泰然,呢啲瑣碎事就應該交俾女人處理,自己於婚禮當日出現,已經叫做恩賜。
五年後既今日,我仲清楚記得自己拖住太太既手行入去婚姻註冊處,老婆話唔鍾意酒店註冊,因為台下既賓客到時一定響到飲酒賭錢,氣氛唔夠莊嚴,我冇太在意,當時既我仲認為今日呢場show,註冊只係一個環節,無須在意。
律師講左一段說話,我冇為意,我只係留意住我太太,聽人講話女人去到呢個時候會喊,我只係想響佢喊既時候遞張紙巾俾佢,等佢唔她整花個妝。
之後律師叫我宣讀誓詞,「我請在場人士見證,我___願以你___為我合法妻子,並許諾從今以後,無論環境順逆,疾病健康,我將永遠愛慕尊重你,終生不渝……」我估唔到,讀到呢個位,我竟然喊,仲要係喊到鼻涕流晒出黎嗰隻。
響嗰一刻,我先醒覺咩叫做婚姻,簽下一紙婚書之後,即代表女朋友將會成為我既太太,我既下半生將會有呢個女人陪伴響自己身邊,我地會一齊變老,我地會互相扶持。腦海裡閃過既係我地變左公公婆婆時候既樣,兩個人對手皺晒,卻依然恩愛咁去行公園。
我以為我太太會比我喊得更加犀利,點知佢卻竟然響到大笑,仲笑到gapgap聲,我唔知佢既笑聲係代表咩,我只係知當時既畫面係幾咁突兀,男既喊到成個豬頭,相反個女既就笑到俾鬼上身咁。
事後,我問太太佢點解會大笑同有咩好笑,佢答我想笑就笑,乜笑都要解釋咩?
我答唔駛解釋,就好似鍾意一個人咁都係冇得解釋。老婆笑左一下,佢話我已經好耐冇同佢講呢啲咁既野,以為我個人係冷血既。
兩公婆,開唔開心日子都係咁過,已經成熟長大既我而家只有一個目標,就係當我死左老婆去拜我既時候,佢諗起既就只會係我對佢既好,又或者對住我塊墓碑講「下輩子准許我揀,我還是會再次揀你」就真係於願足矣,死而無憾。