當你已經同過好多人拍拖，分左手就同我講等左我好多年
你知唔知好嘔心
有讀者曾經問我，當自己提出分手之後，對方仲係死纏難打想復合挽留，問我應該點做
咁當然，係乜都唔清楚既情況下，我都會先去了解原因
其實好老實講，對方同外人點睇唔重要，最緊要係你自己仲想唔想去愛
佢話拍拖一個月之後，個男仔就飛左去第到讀書
最後仲發現對方原來有好多陋習，例如食煙、賭錢咁
一聽到Long D，我就知道已經打左個折扣
陋習都算，佢話個男仔仲要開始每日都Check自己幾時上線，又要隨時都facetime咁樣
感覺，就好似無形監禁
佢講到咁慘，我就好簡單問佢一句
「咁你仲想唔想愛佢」
「呢刻好想自己一個」
咁當個女仔鼓起勇氣去講分手，點知個男仔又要生要死
又話唔好走、唔好離開我，等左你好多年先可以同你一齊
仲話想即刻飛番黎香港咁
或者呢刻女仔都會比較心軟，覺得自己咁做好衰
而呢刻我已經突破盲腸，唔小心做左福爾摩斯
「等左你好多年？即係你地都識左好耐啦，咁點解依加先知佢食煙？」
「佢係我面前無食過煙，又噴左香水無煙味，直至佢自己講我先知」
哇..
咁都算係交足戲喎！
而我亦都好了斷咁講左句
但個女仔又話個男仔真係等左自己好耐，又點又盛
呢刻我再忍唔住講
「你去到呢個階段，你對佢既已經唔係愛，而係可憐佢」
個女仔都話自己身邊朋友都有咁講，可能真係衰心軟掛
或者有人已經覺得我做咩係咁叫人分手姐
寧教人打仔，莫教人分妻呀臭豆腐
哇～臭豆腐都OK好食架～
不過如果真係咁既，咁唔洗問我啦
好啦好啦，一齊返啦，大團圓結局啦
上天台BBQ啦
但係，你開唔開心先？
講下講下，佢話其實個男仔唔止食煙、賭錢、無形監禁
仲有好亂既生活
對於個「亂」字，我已經有唔同既諗法
「佢拍過好多次拖？」
「唔係..」
「咁即係性生活啦，one night stand？」
「係…仲要好多次」
其實本身唔關我事，但唔知點解我好嬲
作為一個男仔我都好想幫你…但你搞D咁既野，點幫呀師兄..
「你明知道佢同第D女仔一夜情，你仲接受到？」
「我諗住每個人都有錯嘛…」
呢刻，我真係好想講粗口鬧埋個女仔
(雖然你係支持我既讀者)
「已經唔係做錯事既問題，係佢仲要扮情深話等你，乜等一個人要搞野架咩？」
「我都知道自己痴線架啦…」
我唔知佢地兩個係咪都痴線…或者真係..
我只係覺得有時對方想挽留，其實未必真係你想像中咁鍾意你，我諗佢個刻淨係知自己唔想失去..
人類係咁自私
唔想無左咁辛苦得黎既野，先會好搏命、不惜一切咁樣去攞番
如果真係咁，咁樣仲叫做愛情咩？
當你仲擔心緊個男仔唔開心，我相信對方係英國好快就會識到第二個
話唔定，已經識左添..
或者又係我小人之心，唔夠了解你地，希望我諗多左
最多幫你全家祈福~
P.S
【第10,000讀者的故事】
以上真人真事，係第10,000讀者既經歷
當日為左多謝大家支持，我inbox左第10,000讚好小弟FB既讀者去多謝佢支持，順便問下佢有無特別經歷/煩惱想同人Share/傾下，希望可以幫佢寫一篇文出黎同各位分享
(其實唔算禮物ha)
因為我知道大家啲 Comment都好正~~
ig:hottofuzai
fb:熱豆腐仔
