網上瘋傳呢份契約，我初初以為邊個中二病諗出黎，原來教育局真係有呢份契約…
　
網上亦有好多唔同角度嘅討論，有人話份嘢其實一早就存在，亦有人話係想自殺者知道有人陪佢經歷呢次難關，並唔係不負責任／強制性契約。
　
首先，我唔想質疑呢份契約係咩時候用、咩情況用、點用、目的等等…
　
社工喺背後嘅付出同辛勞，行外人好難會理解得到。
所以唔應該去否定呢套輔導工具係不負責感等等…
但單單睇呢份契約嘅內容，喂…詞彙可唔可以改好少少？！
　
我份人都ＯＫ樂觀，但見到「契約」「我承諾」「不會自殺」呢堆詞彙，就覺得好礎眼。
有種強逼同不批准嘅意味。
　
學生去尋死，係覺得生活處處被父母、學校、社會制度所綑綁住。纏手纏腳咁，做唔到自己想做嘅事。

　
好啦，想擺脫呢個珈鎖，鑽牛角尖走去尋死。
而家又加多一個鎖畀佢…
　
另一點就係加期限…我真係諗唔到人生邊個時期係適合去自殺。
　
講返少少實際意見，如果想令學生覺得凡事都有人BACKUP佢。
呢份契約應該命名為「不放棄你契約」。
由社工同學生共同簽署。
　
負責社工承諾，無論任何情況下，只要想尋死，只需要打一個電話，就會盎力提供協助。
咁樣學生就覺得，呢個世界仲有人係無條件咁去幫佢。
　
仲有，唔好再講咩契約一早就存在啦，一早存在嘅問題更應該去解決囉。
近年咁多灰嘢發生，好易令人朝向灰鳩嘅方向諗。
所以要改善嘅唔係輔導手法，而係份契約內容字眼。
　
老老實實吖…
如果想學生延緩自殺嘅意圖，介紹佢睇休刊王富堅嘅《Hunter x Hunter》就啱晒，包保佢長命百歲。
自殺？《Hunter》結局點啊？《火鳳》結局呢？
《BvS》《Civil War》都就黎上畫，不如睇埋先啦。
你睇～《Hunter》又復刊啦～人生係咪充滿希望呢～
　
試諗吓，如果畀個學生每日有一個鐘時間，
任佢睇漫畫打機再同佢傾計…
人生幾美好。
　
Ig：BlueGodZi