大家身邊總會有一兩個港女朋友，可能係 Friend 既 Friend、大學同學、中學同學。
話說有一次食飯，成班 Friends 約出黎食放題，咁其中一個女仔 Friend 阿儀帶埋個 Friend 出黎一齊食。
我地成班都係第一次見佢，佢黎到同我地 Say 左個 Hi 之後就坐埋一邊無講過野。
咁以為係第一次見唔熟所以唔知同我地講咩好姐，之後就黎料。
壽司刺身黎到，我地瘋狂咁搶呀食呀，佢仍然坐係到唔郁，我就問佢︰「係咪我地太癲，你唔敢夾野食？你想食咩？我幫你夾啦！」
佢︰「唔係，只係我食唔慣呢度既壽司刺身。」
我︰「呢度咁差咩？我覺得 OK 喎！」
佢︰「呢度既意思係指香港。」
我︰「下！？」
我用好疑惑既眼神望一望阿儀，阿儀都寧一寧頭。
我繼續問︰「咁你想食咩？不如我幫你點。」
佢︰「好啊，幫我點個牛肉烏冬算啦。」
我幫左佢點之後，成班就繼續吹水，咁岩講到樓既問題。
龍︰「健，樓價開始跌喎，你層樓點？」
健︰「好彩我係 14 年頭買，而家仲未趺返落個個價。」
港女對眼發光咁問︰「你買左樓？你好叻豬呀！自己住定同屋企人住？層樓幾錢？」
** 「你好叻豬呀」唔係我打錯字，佢真係咁講。
佢突然講咁多野，在場既人都比佢嚇一嚇。
健︰「Um... 我自己住既，個陣買 320 萬，而家應該仲值 450 萬。」
港女︰「嘩！你好叻豬呀！做你女朋友肯定好幸福啦！」
健︰「下！？係掛… 。」
阿健都比佢特如其來既猛攻嚇親，而我地就笑到碌地。
我︰「健，你真係好叻豬呀！快 D 搵返個女朋友啦。」
我係度推阿健入火坑，成班緊係笑得更加勁。
港女︰「不如我 Add 你 Facebook 同 WhatsApp 丫。」
健︰「哦… 好啦。」
就係咁港女成功拎到阿健既 Contact。
之後港女就好似查阿健家宅咁，問佢做咩工，月入幾多，有冇兄弟姊妹，多到我都唔想聽。
阿健份人又比較戇直，全部照答，港女就愈問愈興奮。
走個陣，我地就係咁推阿健送件港女返屋企，阿健其實都唔係好願意，比我地咁迫法先乖乖接受，最後佢地就一齊消失係人群之間。
最後點？呢 D 野唔重要啦！
阿健既遺言︰「以後係港女面前唔好再提個『樓』字！！」
