我叫阿明，80 後打工仔一個，係公司做晒 D 野就會上 Facebook 睇下野咁，我相信大部份香港打工仔都係咁做。
有一日我如常咁上 Facebook 睇野，睇到一半就去左 pantry 倒杯水飲，出到黎見到老細企左係我電腦面前，心諗今次仆街啦，唔記得左 lock 機就走左去，今次實收硬 warning letter。點知老細笑笑口咁同我講︰「阿明，原來你都有 Facebook，不如你 Add 埋我丫，我都係玩左無耐咋。」
唔記得介紹我老細，佢叫 May，係一位年約 40 歲既未婚女強人，最鐘意將人地既少少錯事無限放大，係都要鏟到人上天花板，我地改左個花名比佢︰杏加鏟。
見唔駛收 warning letter 緊係話好啦︰「好呀，你個 email 係？」
老細︰「咪公司個個囉。」
心諗佢都痴孖根，邊有人用公司 email 註冊 Facebook 架？雖然心咁諗，但我身體卻很誠實咁去 add 佢。
我︰「Add 左啦，杏…呃…阿 May，呢張相你黎架？」
老細︰「係呀，呢張係我大學個陣影架。」
我︰「幾青春丫」
老細︰「咩意思？即係我而家唔青春？」
我︰「呃…唔係咁既意思，而家係多左幾分成熟美。」
老細︰「即係話我老啦？」
我︰「唔係呀，對唔住，我…唔識講野…」
老細︰「同你講下笑咋，唔講咁多啦，我仲要去開會。」
真係嚇到我禁晒汗，幾驚比佢捉入房鏟。
返到屋企見到阿強係 Facebook 回應一篇「勿為少少錢跳槽」既 post。
阿強回應︰「打工唔係為錢，唔通真係為興趣呀？」
佢呢個回應得到好多既 like，咁我都 like 埋一份。
點知第二日返工一朝早就比杏加鏟捉左入房。
老細︰「我見你琴日係 Facebook like 左 『打工唔係為錢，唔通真係為興趣呀？』既回應，你係咪想跳槽？」
我︰「無呀，真係無咁諗過！」
老細︰「無？咁你做咩 like？」
我︰「我…見個句野多人 like，所以 like…」
老細︰「人 like 你又 like，無主見！睇報紙都知你地 d 80 後唔掂啦，有 d 連見工都要帶埋阿媽一齊見。」
我︰「係係…我下次會諗清楚先至 like…」
老細︰「出返去做野啦！」
我︰「係…」
估唔到一個 like 會搞到咁，我懷疑佢係咁睇我 like 左 d 咩，同咩人一齊，有冇講佢壞話。
我就好似被人監視住一舉一動咁，unfriend 佢又唔得。
而家好後悔個陣 add 左老細 Facebook ，收 warning letter 都無咁慘，搞到我而家有 Facebook 恐懼症，同 friends 食飯都要講明唔好 tag 我，卡又唔敢打，就連病左係屋企都唔敢開 Facebook，一陣睇到我 online 以為我咋病咪死，總之而家就慘，放左工都無得放鬆下…
有一日，老細︰「阿明，點解你咁耐都唔 update 下你個 Facebook 既？」
我︰「哦…係呀，呢排好忙，哈哈…」
我就黎痴線啦！！！
完
