好多已婚女人成日話奶奶對自己唔好，又話奶奶諸多挑剔，擺奶奶款同睇自己唔順眼，個老公又唔肯幫口話奶奶，搞到自己單打獨鬥。好老實，作為一個孝子兼男人，聽得多真係會對呢啲女人反感，口沒遮攔說三道四講是講非，更加令男人覺得感到厭惡。
心裡面想同老婆講：「吊！你嘈撚夠未呀！嗰個我阿媽黎架！你老母咁難頂我都未出聲啦！」
現實只能夠同老婆講：「寶貝！大家互相遷就下啦，話晒都係一家人，唔好嬲，我而家同你去shopping！」
悲劇！
公司女同事阿儀返工又向我地投訴佢奶奶，又話奶奶污糟核突，冇家教攪到自己老公都鬼死咁污糟，其他女同事聽到好似上晒身咁，個個唔做野圍圈數臭自己既奶奶。

我笑騎騎放毒蛇咁上前去問阿儀：「你成日話你奶奶有問題，其實係咪你係港女，麻Ｌ煩咋？」
「唔係呀！我奶奶真係污糟核突到你唔信！你諗下如果你件長袖衫袖唔小心掂到啲湯濕晒，咁你會點做？」
「唔駛問，緊係用紙巾或者毛巾抹乾佢啦！」
「錯！我奶奶用手扭個衫袖，扭返啲湯落個碗度再飲返佢，扭唔晒就再用口啜乾件衫！我問你死未！」
其他同事聽到呢度已經個個笑到碌地，其實我都好想笑，不過響唔想衰俾佢睇既情況下我話：「大驚少怪!你奶奶咁做都係慳儉啫，有咩錯？」
阿儀個樣好唔順咁講：「好！我又問你，如果地下發現有撻漬污糟左，咁你會點處理？」
其實聽完阿儀奶奶啜湯之後，我已經知道佢奶奶並唔係池中物，如果我用常理去推斷個清潔方法既話就一定會捉蟲，咁我就唔可以挫倒阿儀既銳氣。
我本來想諗一個跳脫啲既答案，但清潔地下來來去去都係嗰幾種方法，我諗左一陣就話：「我會用報紙抹！方便快捷！」
「又錯！我奶奶會吐一篤口水落撻地度，再用佢自己既衫袖抹乾淨佢！哈哈哈哈！我睇你點同我奶奶鬥！」
阿儀極度興奮咁響到大笑，而其他人亦都已經笑到標晒眼水。
事情發展到呢一步，我除左好黯然咁同阿儀講聲「恭喜」之外，已經唔知講咩好。