我今年六十歲，琴日朝早搭火車時侯，因為我行得慢，比個後生仔大罵:「阿伯!行撚快啲喇!咪阻住後面啲人返工先得架!」
我終於明白到點解朝早無老友記搭火車，大概唔想因為自己行得慢而累到身邊嘅人遲到。
年紀大，身體差，記性差，對社會已經毫無貢獻可言，老人家仲有咩價值呢?
大概我們對於某政黨仲有點利用價值，每年選舉前後都會車我地去投票......食盤菜。
年輕人似乎對我地有點微言，但身邊老友記都選擇沉默，我亦是。
我呆呆坐喺球場邊，望住一班年輕人踢波，我好想踢埋一份。但佢地望一望我，然後竊竊私語，似乎好驚踢波踢中我。
人老咗，連坐喺場邊睇波都令人擔心。我慢慢舉起雙手，雙手不斷抖震，對於咁嘅身體，我感到無比嘅氣憤同無奈。
望住球場上嘅年輕人，散發住青春氣色，即使粗口橫飛，但仍然唔會覺得刺耳，更重要佢地有著充滿力氣、活躍嘅身體，做任何事都可以。
諗起自己以前每一日都係Hea住過，得過且過，庸庸碌碌咁過咗大半生，時光一去不返，每日帶住嘅只有悔恨嘅心情過日子，直到死個日都無自己嘅故事、無自己嘅光榮回憶、無自己嘅經典……
終於明白到點解以前咁多皇帝想長生不老，大概想保持青春，唔想自己變老。
想著想著......不自覺地瞓著咗。
.......
.......
「起身呀!!瞓撚到幾時呀!」突然有人喺我耳邊大叫，嚇得我即時彈起身。
只見我身處喺班房之中，身邊同學都各自拎住袋體育衫準備排隊落去更衣室。我呆一呆，腦海仲諗緊發生咩事。
「屌你!你睇下佢!佢係咪未撚瞓醒呀!哈哈哈!」隊伍中嘅同學仔不斷笑住我。我亦自動自覺地拎住袋體育衫跟佢地落去，我一路換衫，一路望住佢地。
范威、阿仁.....我仲認得佢地，我呢家讀緊中五，我回到過去 定 係發緊夢?
我慢慢舉起雙手，強而有力，我緊緊地握緊拳頭，唔理係真定係假都好，我都要好好享受一下呢副身體，好好重新享受以前嘅日子。
上體育堂，慣例都係圍繞住學校外圍跑圈，以前我地都會Hea住跑，一路傾住計行返去。
但今日，我盡情地跑，超越眼前一個又一個嘅同學仔，享受身邊境物快速喺我身邊嘅走過嘅感覺，呢種感覺已經幾耐無體驗過?
「阿明!你今日食咗春藥呀?咁落力嘅?」身邊同學都覺得我今日唔同咗。
我氣喘喘咁抖了一口氣，然後說:「我已經廿幾年無跑過步喇......趁呢家有咁嘅能力去跑步，梗係盡情去跑！你地都係呀！」
佢地一副唔知我UP咩春嘅表情望住我，然後一句痴線就完結。
小息時侯，老師入嚟班房問我地星期六有冇興趣到老人院做義工，全班即刻鴉雀無聲，完全無興趣。
「我做!我有興趣呀!」我即刻舉高手同老師講。
身邊嘅人都問我做咩春，星期六難得放假梗係用嚟玩喇!
「其實好多老友記年紀大咗，仔女都會離開，幸運嘅有老婆陪伴，唔好彩嘅隨時得返自己一個，孤獨寂寞嘅感覺非常大，所以如果有個人肯同佢地傾下計，已經好大滿足感了。你地有時間嘅話，真係可以一齊去同佢地傾下計架!」我解釋說。
佢地一副唔知我UP咩春嘅表情望住我，然後一句痴線就完結。
放學後，我大大力吸一吸一啖氣，以前嘅香港空氣好清新，街道又闊又少車，如今香港已經變成車多人多，吸啖空氣隨時吸入廢氣嘅現象了，所以我更珍惜仲可以吸新鮮空氣嘅日子。
返到屋企，見到阿媽煮緊菜，佢見我返嚟，問我:「快啲沖涼溫書呀!就快會考呀!」
我一時感觸，眼淚湧現出嚟，即刻衝去攬住阿媽，緊緊地攬住。
「我好掛住你呀......媽咪。」
「傻仔!有咩好掛住呀!返個學姐!講到好耐無見咁!快啲沖涼呀!」阿媽唔明我發生咩事，但見我突然間咁熱情，佢似乎都好受落。
我記得喺我五十幾歲時，阿媽已經離開咗我了，感謝上天再一次比機會我感受一下攬住阿媽嘅感覺。
呢一日，每個屋企人返嚟都比我緊緊地攬住，以前我含蓄嘅心都不再含蓄， " 掛住你 " 、" 我愛你 "呢啲說話我已經毫不保留同怕羞咁對佢地講。
雖然阿媽依舊長氣，叫我溫書、飲湯、早瞓，但我已經好耐無人再咁長氣"哦"我了。
爸媽，我愛你。
第二朝起身，衝去廁所照鏡，鏡中仍然喺年青嘅我，感謝上天無將我夢醒或帶回現實。但我知道總有一日我會醒，所以我更要把握同珍惜每一日。
上堂，我專心聽書，約朋友一齊溫書應戰會考，我享受仍然可以吸取知識、同戰友向住同一個目標奮鬥嘅日子。
朋友約出街，我每次都會第一個應約第一個準時到，無論任何人，我都樂意同佢地製作回憶，唔再係以前成日摺埋自己唔出街嘅我，如果唔係......日子就會白白浪費。
同朋友睇鬼片，佢地話我好勇敢點解可以唔驚鬼。我話:「我做咗六十年人都未見過鬼，你話我驚唔驚?」
見到有人遊行示威，我都參與其中，不少遊行人士見到我咁細都嚟支持都為我打氣，我說:「趁我有氣有力，我希望用行動嚟支持你地，為香港市民發聲。」
喺學校到，我見到我以前鐘意咗好耐嘅女仔，於是我有日膽粗粗咁拉佢去一角，然後勇敢地向佢表白:「我好鐘意你!」
雖然比佢拒絕，但我仍然笑住口對佢說:「唔緊要!至少我同你講咗我心入面嘅諗法!咁我就足夠!」
表白示愛嘅勇氣同緊張，今日再次感受得到了，呢份情真係好耐都未試過了。以前對住鐘意嘅人一直都唔敢出聲，一直都暗戀，不但浪費自己時間，亦無機會比對方知你其實鐘意佢，既然如此，今日嘅我，倒不如瀟瀟灑灑，得就得!唔得就唔得!
學校有場班際足球比賽，但我地班無人有興趣參加，一來要專心應付會考，二來無人識踢波。
但我又求又叫咁希望同學仔會參加呢場可能係中學生涯最後一場比賽!
「我知道大家都好忙，但大家諗下!呢場可能係我地中學生涯最後一場比賽!以後我地就好難再一班人一齊參加比賽呀!青春呀!大家!我唔知你地將來會唔會後悔，但至少我會!自從我中學畢業之後，唔好話同朋友踢波，出嚟聚嘅時間都好少!難得有機會比我地一齊青春下!點解唔珍惜呢個機會!我求下你地!同我一齊青春呀!」我嚴重地企喺黑板前，九十度彎腰求大家，希望佢地肯聽我講。
最後，雖然佢地唔係好明白我講咩，但多得一班好兄弟支持，終於都夠人數參加比賽。
當日觀眾好少，但我仍然充滿期待同緊張，我仲要求大家一齊伸手大叫:「我地5B班一定嬴!」
雖然睇嘅人唔多，而且實力差距好大，但我仍然落力地享受比賽，雖然我地唔識踢波，但我地都跑足全場，博盡佢。
最後我地足足輸咗八球比人，當我聽到球證吹起完場雞聲後，我累得瞓喺地下，眼淚又再自覺地湧現，更忍唔住喊出嚟。
原來青春威力真係咁大，好後悔以前遇到咩學校活動都唔參加，好少同班朋友出去玩，對住屋企人又呼呼喝喝，對住社會上問題又不理，對住鐘意嘅人又唔表達心意，對住.......
如今，我終於到享受過了，感謝上天，感謝.......
......
......
「喂!起身呀!老公!起身呀!」突然有人從我耳邊輕輕地說。
我望開雙眼，見到老婆喺我前面，我再慢慢舉起雙手，雙手不斷抖震，似乎夢醒了。
「我買咗條魚呀!快啲一齊返屋企喇!」
我輕輕地握住老婆隻手，然後說:「老婆，我愛你。」
老婆笑笑口說:「我地加埋成百歲架喇，仲學埋哂啲後生講野!聽日先係情人節呀!」
「老婆!今晚我有好多野經歷同你分享!我地快啲返屋企!」
「好好好......講故仔你就最叻，呢樣都係我鐘意你其中一樣。」
於是我地兩個慢慢拖住手幸福地回家去了。
《完》
如何後悔 也知道 無從後退 能探險必需探險
誰記得這少年和這老年 曾天生一對
六百歲再夢見過往六歲 這一天看那一天崎嶇
才對得起當天那個小孩 無負那個小孩
曾為信仰出發不理反對
呢個故事係寫比自己，同樣都係寫比你地
無論咩人都好，最終都係敵唔過時間，時間每一分每一秒都喺我地身邊走過，既然捉緊不到，咁就盡情用盡佢，唔用就會浪費了。
有人問我咩係珍惜時間? 大概每一晚瞓之前，問問自己今日有冇白過就夠了。
唉，好想回到過去。
希望趁有限時間做更多事，寫更多故事比你地。
希望你地鐘意我寫故仔，唔好覺得長而唔睇，嗚呀。
支持就like下!
