Witness
「由於今次遊戲係團體戰，所以以每隻顏色為單位，各自有一次抽卡機會。」東南西北說完，每組的面前都出現了三張卡牌。
江長不顧他人，私自選了左面的卡牌，得出「+10%」的結果，其他人對他的決定極為不滿。
「點解由你決定？」達偉英二率先表達不滿。
華沙也磨拳擦掌、怒氣沖沖地說：「我係最後贏家，付出最多，你憑乜去揀？」
「你唔問我哋就揀？」易路登威也加入責問大會，不滿地說：「我揀肯定揀中翻倍！」
「我係隊長，我揀好合理，你哋只係我嘅隊員，憑咩同我爭？」江長毫無悔意，堅持自己無錯，認為其他人都必須臣服他的態度和嘴臉極討人厭，使得藍色的其他人都心生不滿，埋下了失敗的伏線。
至於綠色，他們由一開始已經互相合作，相處融洽，所以到選擇卡牌時也是有商有量、互相禮讓。
「金歌谷，你係功臣，今次卡牌就你揀。」遜馬亞里衷心地對金歌谷說，同時問其他人：「你哋有無異議？」其他們均搖頭表示認同遜馬亞里的決定。
「但我輸咗……」金歌谷帶着內疚低聲道。
「你係我哋當中貢獻最大嗰個，無人比你更適合。」阿希加入遊說，其他人都點頭示意贊成。
「既然係咁，咁我就接受，我揀……左面呢張。」金歌谷指着左面的卡牌，它翻轉顯示為「-50%」，她看到後連忙道歉：「對唔住，我臭手，揀咗咁差嘅一張。」
「唔緊要，我哋無人怪你，揀呢張係我哋大家嘅決定，而且籌碼可以之後再贏返嚟。」雅萊歐即時給金歌谷暖心的回應，使得她內心的罪疚感降低，而其他人也同時圍成一圈，肩並肩，互相打氣，氣氛極為融洽。
至於紅色和黃色也有商有量，最後分別抽到「-20%」及「-5%」。經過閃避球一役，他們終於凝聚在一起，成為了一個團隊，不再各自為政，使得飛行棋棋局爭鬥更為激烈。
「而家更新一次籌碼排名你哋參考，請睇螢光幕。」東南西北說，螢幕亦顯示出排名。
「籌碼排行榜
1.易路登威
2.軟微
3.江長
4.紋骨甲
5.博彭三世
6.華沙
7.達偉英二
8.瑪爾沃斯基
9.拉斯特
10.密他飛卜艾珠
11.群巴之頭
12.亞星爾戴
13.遜馬亞里
14.金歌谷
15.雅萊歐
16.李友希」
阿希看着螢幕，自嘲道：「最好彩係我，排名無變，籌碼無扣，可以盡情發窮惡。」
同時他留意到時間。
「七點？啱啱場閃避球……有玩兩個鐘咁耐？」阿希開始對時間的流逝產生懷疑。
「第一輪十六個人全部都已經擲完，而家開始第二輪，拉斯特，到你擲骰。」東南西北對拉斯特說完後，骰子便出現在他的面前。
「好耐無擲過，照而家局勢嚟睇，如果我起到機就最好，如果唔得，就將密他飛卜艾珠同亞星爾戴兩個疊住行，追返群巴之頭，最好就三隻棋疊好再同時行動。」拉斯特自言自語。
在旁看到的密他飛卜艾珠立即上前問：「你係咪有咩計劃？講出嚟大家研究吓先，一人計短，二人計長。」
拉斯特聽後覺得有點慚愧，因為他又將團體放在個人層面之下，明明剛才大家才一起漂亮的合作過。
「我諗嘅係如果我起到機就起機先，起唔到就將你兩個隻棋疊埋行住先，務求最快追返群巴之頭隻棋，希望可以三隻疊埋一齊。」拉斯特分享他的想法，獲得了眾人同意後，他大力一拋，擲出了二，果斷選擇起機。
接着輪到軟微，她望了隊友一眼，大家都心領神會地向她點頭，結果擲出了四，她對東南西北說：「我要起機，紋骨甲唔該。」
輪到江長，他心裏唯一的想法就是要第一個完成棋局。
「我擲到五，就可以跳；擲到六，就可以再擲，有機會再行得遠啲。拜託，出五或者六。」他心裏祈禱同時高高拋起骰子，骰子落地滾了數米，最後得出五，他立即忍不住歡呼。
「恭喜你踩中機會，好耐都無人踩中。」東南西北難掩興奮的心情說：「大家聽住，每位擲一次骰，擲出嚟嘅點數大過啱啱擲出嘅五就安全，細過或者等於五都輸，輸嘅扣籌碼，扣嘅數目就係你本身嘅籌碼除以點數咁多。」
「即係只得六先安全……」阿希自言自語，然後再問東南西北：「咁擲到大過五有無獎？」
「規則我啱啱講得好清楚。」東南西北斬釘截鐵地說，並沒有透露過多的資訊。
「咁即係同強制回收籌碼無分別。」對數字十分敏感的軟微立即衝口而出。
同時，達偉英二對着江長發牢騷表達不滿：「又係你，永遠陀衰家累全家，好哋哋擲乜五？求其擲個一咪算，真係被你累死。」
「咪係，頭先揀卡揀到咁少又係你。」易路登威也忍受不了江長接二連三的錯，亦都抱怨起來。
「廢物。」華沙留下兩個字便走到一旁，沒有再參與問責大會。
江長受千夫所指，心裏很不是味兒，為了保護自己，態度也變得強硬起來，為自己進行辯護：「我揀卡加百份之十有咩唔好？其他兩張可能只係加百份之五同百份之一，邊個知？而擲骰擲幾多係我控制到㗎咩？隨機睇運氣㗎嘛，點解又屈落我度？況且你哋同我同色，大家坐埋同一條船，唔係應該撐我、支援我咩？點解要夾埋批鬥我？文革呀而家？」
聽到江長這番話，其餘三位藍色成員更加憤怒，華沙更率先爆發：「同一條船？乜你有當過我哋係隊友咩？你只係識諗自己，一直都係，由始至終我哋大家都係各自為政，到而家我覺得咁幾好㖭，唔駛被你拖累，所以你唔好同我講乜大家同一條船，我哋最終都係敵人！」
被華沙噴得一臉屁的江長憋得滿臉通紅，想反駁但卻沒有站得住腳的論點，只好嘴硬地答：「好，咁就各家自掃門前雪，唔好求我幫你哋。」
一輪爭吵之後，眾人也都陸續擲過骰，當中只有密他飛卜艾珠、亞星爾戴、紋骨甲、達偉英二和遜馬亞里成功擲到六；其餘的人也擲出了不同點數，而瑪爾沃斯基和江長則是手氣最差，擲出一點，換言之即是與阿希一樣，籌碼歸零。
「各位，喺今次機會之下，排名又作出咗重大變化，而家最新排名請睇螢幕。」東南西北引導眾人望向螢幕。
「籌碼排行榜
1.紋骨甲
2.達偉英二
3.易路登威
4.密他飛卜艾珠
5.軟微
6.亞星爾戴
7.遜馬亞里
8.華沙
9.博彭三世
10.金歌谷
11.拉斯特
12.雅萊歐
13.群巴之頭
14.瑪爾沃斯基
15.江長
16.李友希」
「原來已經七點五十二分，今日就快完，就快放飯，太好喇！」阿希看到螢幕顯示的時間，總算鬆一口氣。
「比賽繼續。」東南西北宣布，遜馬亞里面前出現了骰子，他簡單地將球拋高，帶少許後旋，然後便擲出了六點。
「起機，唔該。」遜馬亞里毫不猶疑地說，然後心裏暗自盤算：「要四隻棋疊埋，差十二步，但我唔可以擲多兩次六，只可以嚟緊再擲六，透過同色跳棋，然後再擲二，一於咁話。」
遜馬亞里調整好骰子的面向，再向上輕輕拋高，骰子又再得出六點，於是他的棋子一下子便跳到距離三位隊友兩步的位置。
「又一個機會。」東南西北高聲說：「接住落嚟嘅呢一次擲骰，如果係雙數就可以行兩倍步數；如果係單數就只可以行一步。」
「咩話？讀心呀？咁我咪唔可以同佢哋合體……」遜馬亞里立即面露難色，心裏預演了不同步數，最後決定擲四。
遜馬亞里調整好骰子，輕拋一下，再經地面隆起的碰撞，骰子得出的點數正如他所想擲的點數，是四點，即是可以移動八步。
八步後，棋子到了飛行處，所以飛了過對面，又因為是剛好停在飛行處，所以還可以再跌四格，於是遜馬亞里一下子便拉開了與隊友們的距離，停在了有金錢圖案的綠色格子上。
「請揀選你嘅籌碼數量，再四張入面揀一張卡。」東南西北對遜馬亞里說。
「而家我排中間，唔上唔落，要大膽一次先得。」遜馬亞里心裏計算過後，便告訴東南西北：「我要賭我半數籌碼，然後我揀右面呢張。」
卡牌隨着遜馬亞里的選擇而掀起，上面印上大大的「+5%」。
「真好彩，唔駛扣，但加得有啲少，排名完全無變化。」遜馬亞里苦笑着說。
隨着遜馬亞里的回合完結，東南西北也宣布今日的比賽完結。
「各位參賽者，聽日十點喺棋盤呢度集合，而家喺八點零七分，你哋可以返去包廂休息同食晚餐，聽朝見。」東南西北說完後便消失了。
錢先生看到回來的阿希，立即熱情地擁抱他，並暖心地說：「今日辛苦你了，表現得好好，你已經唔再怯場。」
「多……多謝……」突然被如此誇獎，阿希的尷尬癌復發，結結巴巴地說：「其實呢……我……我都唔係好……唔係表現得好，因為我仲係覺得……覺得有啲唔自在同怪。」
「哦？有咩怪？」錢先生好奇地問，然後還開玩笑道：「做咩突然又硬哂軚，講嘢口窒窒咁緊張？」
「邊……邊有啫！我講嘅怪，係關於時間嘅流逝，時快時慢，你，唔係，你哋唔覺得……咩？」阿希立即回復正常並且問。
阿滔搶先回答：「呢個只係心理作用，覺得開心時間會過得快啲，唔開心時間會過得慢啲。」
「係囉，」錢先生補充：「只係你嘅時間感知畀場比賽嘅唔同環節影響咗啫，好似叫『假日悖論』，我哋喺度睇完全唔覺。」
阿希滿腦疑問，「真係咁咩？」、「我生理時鐘唔係咁同我講喎！」、「佢哋有嘢隱瞞？」這些問題不斷在腦海出現，令阿希整餐晚餐也悶悶不樂、鬱鬱寡歡。
飯後，阿希與阿滔坐在一角聊天，錢先生則在包廂另一面寫筆記。
「你今日全日同錢生一齊，佢有無啲咩古怪？」阿希對錢先生剛才的答案始終有懷疑。
阿滔搖搖頭，堅定地答：「無，佢好認真同專心睇住你比賽，仲不停講咗好多策略，同埋睇到一啲奇怪嘢。」
「咩奇怪嘢？」阿希問：「啱啱唔係話唔覺奇怪咩？」
不知何時，錢先生已經寫好日記站到他們身後，他整理好第一日的事，總結道：「最怪就係揀卡嘅位，有時係四張卡，有時係三張卡，同埋之前係直接寫『x2』、『÷2』咁，但之後再揀，已經變成『%』，同埋唔會翻開埋其他卡。」
這身後突如其來的回答嚇了阿希一跳，心也差點跳了出來，而錢先生還繼續說下去：「仲有，同你同色嘅遜馬亞里都好奇怪，佢好似可以控制啲骰仔咁，兩次都擲到兩次六，而且啱啱要擲六嘅時候又話擲就擲到。」
「你咁講，呢兩樣嘢又真係有啲怪，但會唔會其實好簡單，我哋自己複雜咗？掀牌係大會唔記得；擲骰係純粹運氣。」阿希雖然認同錢先生的說話，但同時還是嘗試解釋。
「我唔認同。」阿滔搭話：「咁嚴肅嘅比賽、唔會有咁低級嘅失誤；而運氣更加難解釋，要咁啱咁多次都擲到六，個概率無限接近零，太唔現實。」
「所以我認為當中實有啲秘密，呢個遜馬亞里可能同個組織有啲咩關係。」錢先生摸着下巴道：「我聽日都會繼續觀察，睇下有無啲咩蛛絲馬跡。」
謎團越來越多，是錯覺，是巧合，還是精心安排？為何要收起所有計時裝置和通訊工具？為何不能自由活動，只能留在包廂？世界真的會末日？
阿希越想越清醒，全無睡意，在床上輾轉反側一輪後，決定起床活動一下。他在包廂做着簡單的伸展運動，同時瞄了一眼時間，凌晨四時半。更在扭正頭之際，無意中瞥見球場上有一個瘦削的面善身影，與兩個陌生的身影在一起，瘦削的身影最後還鞠躬才離去，而那兩個陌生的身影則轉身環顧觀眾席，剛好掃視到阿希，他立即蹲下，但好像已經被發現了。
「大鑊，啱啱我係咪見到啲咩唔見得光嘅嘢？我係咪要被滅口？」阿希腦內瞬間爆發出了一百萬個被殺害的畫面，他越想越害怕，立即上床裝睡，一裝就裝到天明。
正確來說是時間到六時，場館的燈漸漸亮起，營造出的天明感覺。
「吱……咔嚓」，「咯咯咯……」包廂的門被打開後又關上，進來了數人。
「死，終於嚟捉我，我要點做？睇戲都係立即發難逃走，但呢度成個場都密閉，我走得去邊？」阿希在被窩內害怕得瑟瑟發抖。
「咯、咯、咯」，腳步聲越走越近，終於在床邊停下，阿希透過被窩，察覺到光影的變化，肯定床邊站了一個人。
「死就死！」阿希本死一戰，將被鋪踢開，摟着被蹤身撲上床邊的人身上，然後……
「咦？」然後阿希呆了，他站在床邊一動不動。
「乜一早就咁有活力？」錢先生笑着問。
同時，被鋪下鑽出了一個人，是阿滔。他摸着頭痛苦地說：「做咩咁重手？撞到我個頭喇。」
「對……對唔住，我以為……」阿希看到包廂內有工作人員，立即靜音。
「以為啲咩？」錢先生呷了一口茶問。
「無，發惡夢啫。」阿希隨口說了一個藉口搪塞過去，然後轉移話題道：「係呢，點解咁早就食早餐？啱啱六點咋喎，距離十點比賽再開都仲有排。」
「而家八點啦，你睇吓個鐘，時間唔早㗎喇。」阿滔指着場上螢幕說，阿希才赫然發現時間經已飛逝。
不！這絕不可能！這麼短的時間，怎會由六時變成八時？體感上最多只過了三十分鐘。
「仲唔快啲嚟食早餐？今日你仲要戰鬥，唔食飽邊有力？」錢先生慈祥地說，十足一位慈父，而阿滔也在背後推阿希埋座。
就這樣，他糊裡糊塗的吃了一頓豐盛的早餐，直至他們都吃飽後，工作人員才清理餐桌並離開，阿希才能說出真相。
「我琴晚四半見到球場有三個可疑人物，仲被其中兩個發現咗，之後嚇到我衝上床，但我只係匿咗好短時間就開始天光，最多都係六點幾，但出到嚟竟然個鐘係八點，成件事真係好詭異。」阿希憶述道。
「你以為我係嚟捉你嘅人，」阿滔恍然大悟道：「所以先咁樣攻擊我。」阿希一臉歉意地點點頭。
錢先生則懷疑道：「係咪你諗多咗咋？人哋可能只係清潔工人或者場地保護人員啫可能。至於時間嘅唔同，可能係你攰得滯瞓着咗都唔知啫。」
真的是這樣嗎？錢先生的說話令阿希有少許動搖，開始懷疑自己是否真的睡着了。
「唔好再諗呢啲嘢住，第二日比賽就開始，我有啲諗法，你自己作為局中人，有無咩意見？」錢先生拿着筆記問阿希。
阿希想了想然後答：「好似除咗藍色，其他都開始合作，咁樣會越嚟越難贏，好在我哋一開始就合作，所以都仲有優勢，不過就算我哋贏咗，我零籌碼都好難喺最後贏到，所以我要踩多啲錢，同埋贏多啲遊戲先得。」
「嗯，的確，不過作為局外人，我留意到另一樣嘢，」錢先生打開筆記本，展示給阿希看並說：「啲無人機一直都拍住你哋。」
阿希搶白說：「我知呀，一直都拍住，無咩特別。」
錢先生嚴肅地說：「無錯，但特別在人人都係得四部機，但偏偏你係有五部機。」
「五部機？我？」阿希立即想到一個原因：「因為我阿哥？」
錢先生點點頭，續說：「你有無發覺東南西北對你係有啲唔同？我懷疑你阿哥就係東南西北。」
「你咁講……好似有又好似無，我都唔知，但我都有懷疑過佢係我阿哥……」猶疑過後，阿希氣憤地說：「不過佢又無同我相認，又無放水畀我，做東南西北有鬼用？」
「其實佢有放過水畀你，你無留意數字球嗰時佢點幫你啲計仔成真咩？」錢先生憶述：「好明顯佢幫你解咗好幾次圍，幫到盡，係你唔爭氣最後輸咗。」
阿希聽後慚愧得低下頭，錢先生立即鼓勵道：「唔駛咁頹，之後努力啲就得，而且有佢暗中幫你，你贏面大好多，小心啲就得。時間差唔多，你要落去，今日加油！」
阿希與錢先生及阿滔道別後，再次踏上棋盤，其他人也在十時前陸續抵達，每個人也精神飽滿，而且樣子比昨天更加有侵略性。
十時正，東南西北準時出現在大家面前，簡單地歡迎眾人，沒有多餘的寒暄，直接宣布第二日的比賽正式開始！
