外區合作
「Suki你好，我係同事Charles，我有個客人想揾你嗰面嘅樓買，可唔可以合作？」我在網上Sale相的一欄，選了一個蠻漂亮的主區同事Whatsapp她。
「Charles你好，無問題，你個客人想揾啲咩？」Suki很快便回了我訊息。
「佢想揾大約五百萬一房單位，新啲嘅，近鐵，十分鐘左右路程，佢上網見到個廣告之後問我嘅，」我把客人給我的連結發了給Suki，然後續說︰「佢問哩個係咪真盤，點解平咁多，係咪有咩特別原因？」
一會後，Suki再次回覆︰「你揾我就啱，哩個屋苑我好熟，上星期我先成咗間一房高層五百三十萬，超筍。至於哩間係真盤，不過有人喺入面燒完炭，所以平成半球，我就未去睇過，都驚，不過你個客想睇，我都可以帶佢去。」
「哦……原來係凶宅，我同返佢講先，咁仲有無其他啱佢要求嘅筍盤，我一次過畀埋佢睇。」我回覆。
「有，你等等，我Update一次再覆你。」Suki秒回道。
故事的開端，要從一個相熟業主說起。這位業主叫李太，是我其中一個租客的業主，本來簽完租約後也沒什麼聯絡，只是她覺得我為人誠實又勤力，所以特意記下我電話。終於這次想再買樓投資的時候，終於再有我的用武之地。
本來我想她買本區，因為我不用跟其他人合作，佣金獨享，可是完全沒有適合她的，而她也堅持想要那屋苑，我只好找外區合作，畢竟收到一半總比做不成生意好，於是便有了以上對話。
「哩啲係啱你個客要求嘅盤，我都Update過一次，重點推哩間，高層一房五百五十萬，景觀開揚，望穿成個屋苑，夜景超靚。」Suki約過了半小時候回覆我，並附上照片。
「好，我Send畀個客先，唔該。」我禮貌地回覆，然後將訊息轉發給李太。
「哩啲都可以約睇，你想幾時睇？」在李太已讀後，我再問道。
「我問問我先生先，應該今個星期六可以。」李太很快便回覆我，不到十分鐘更約好了星期六的下午二時，我跟Suki交代完後，便靜待星期六的來臨。
在這漫長的等待中，Suki有間中給我最新資訊，過濾後我也有轉發給李太。而在這些傾談對答當中，我亦更加了解李太的想法和要求，亦都知她的預算和計劃，這些都有助我為她推薦更適合的單位。
終於，萬眾期待的星期六終於到了，我按照約定的時間和地點準時到達，Suki也一早到了。第一次看到她真人，比想像中更高大，大約是一米六的長髮女孩，長得清秀但一看便知不是斯文安靜的類型。
「Hi，Suki，個客下站就到。」我第一句便開宗明義說出她最關心的事。
「好啊，慢慢，我約咗業主，仲未夠鐘。」她簡單的回話。
之後我們也聊了一些自己區的新盤，希望對方有客合適，聊著聊著，李太和她先生也到了。
「Hi，Charles，好耐無見。」李太率先打招呼，李先生也象徵式的對我點頭。
「Hello，李生李太，好耐無見，同你哋介紹先，哩位就係我話哩區相熟嘅同事，佢叫Suki，一陣佢會帶我哋睇樓，佢係哩個屋苑嘅專家，個屋苑啱啱過SSD，頭十宗買賣有五宗係佢做，所以啲業主都同佢好熟。」我立即介紹他們互相認識，亦不忘對Suki讚賞一番。
「李生李太，我係Suki，今日會帶你哋睇五個單位，哩個屋苑有四個，另外仲有一個喺附近，舊啲啲但價錢完全啱你要求，而且係乾淨嘅。」Suki簡單介紹今日行程後，我們便起程了。
我們由地鐵站向目的地前行，大約花了十分鐘時間便抵達，這屋苑四圍被村屋和舊樓包圍，玻璃幕牆顯得有點格格不入，樓高十數層便已經超過附近所有建築，景觀開揚，直望地鐵站，整個城市景一覽無遺。
「哩度係我哋第一站，都係你廣告見到嗰個屋苑。」Suki向我們說。
「幾靚喎，而且路程唔算遠，你啱啱話附近有另一個係舊樓，係咪隔離哩啲咁舊？」李太讚嘆之餘，不忘問問題。
「係呀，就係哩棟大廈。」Suki指向身後一幢粉紅色外牆的大廈，大廈看上去不是一般的舊，目測樓齡跟我年齡差不多。
「咁我諗可以唔睇哩間都得。」李先生直言。
「無問題，咁我哋淨係睇哩度喇，首先去咗一座先。」說著，Suki登記完便領我們行到一座樓下，期間不忘介紹屋苑環境和設施。要我形容的話，這屋苑有點像美術館，整個內園都放置著不同的雕塑，住這裡感覺可以提升藝術修養。
走過藝術氣息濃厚的庭園後，終於到了一座，簡單登記後，我們便上到第一個中層單位參觀。
「哩個單位一房三百零四呎，開廚，業主未住過，買嚟For投資，叫價五百六十萬。」Suki正向李氏伉儷簡單介紹這個中層單位。
「但可惜樓望樓。」李先生一語道破，現場氣氛瞬間跌到冰點，尷尬非常，我只好打圓場︰「不過全新無住喎，哩刻你哋都係諗住投資唔係自住，租得出有得升就Okay喇，到你哋要住嗰時都換咗幾轉樓，細變大嚕。」
Suki亦打蛇隨棍上︰「係囉，哩面啱啱過SSD，啲業主平均都賺咗一球，升值空間好大，加上嚟緊政府發展大西北，哩個北部都會區近大陸，實升。」
「嗯……」李太聽得點點頭，狀甚認同，而李先生依舊冷若冰霜，理性冷靜的說︰「哩間我哋記低咗，可以睇第二間。」既然客人要求，我們確認關好窗和燈後，便往另一單位出發。
我們乘電梯到低層，去到一個一房向內園單位，Suki再次介紹︰「哩間三百一十呎，望正內園，最靚最舒服，亦都係你哋廣告見到嗰間，賣四百八十，不過仲有得傾。」
「哩間係廣告嗰間凶宅？」李太疑惑的問。
「係呀，不過我問過Banker都估到價，而且仲平過當初買入價，同埋你哋都有興趣想睇，所以都帶你哋睇吓。你哋唔係自住嘅話，其實哩間都唔錯。」Suki解釋道。
「個景同價係吸引嘅，但出過事好難甩手，Next喇。」李先生隨意看一看，又放冷箭。
正當我們轉身離開之際，突然聽到微弱的求救聲︰「救命……咳咳……好辛苦，快啲救我……咳咳……」我們同時間轉頭尋找聲音來源，然而整個單位一眼看清，連能匿藏的櫃也都檢查了一遍，根本找不到第五個人的身影。
此時，李太察覺到異樣，急推著李先生出門，當李先生手接觸門柄一刻便立即被燙傷。
「快啲揾水沖吓先。」我對他們說，同時仔細尋找「住客」身影，卻心裡想︰「無理由嘅喎，成間屋都Feel唔到寒意，無理由有『住客』。」不意外地，對於「住客」的身影始終遍尋不獲。
「Suki，哩度單嘢係點嘅其實，你完完整整講一次我知。」我壓低聲線問她。
Suki對我突如其來的提問有點愕然，但也如實相告︰「哩個單位個住客因為失戀，所以燒炭，仲要死咗一段時間先畀隔離左右發現，業主已經做過幾場法事，應該唔會再有嘢喺度。」
「咁知唔知佢死喺邊個位置？」我問。
「廁所。」Suki快而準的回答，我在聽到她的答案後，即時往洗手間方向望去，還是察覺不到異樣。
「我覺得可能唔係同嗰位『住客』有關。」我大膽推測︰「或者仲有啲隱情係無人知。」
Suki露出詫異表情，但沒有作聲，或許是我嚇壞了她，我連忙解釋道︰「Hey，唔駛咁驚，只係我推測啫，自殺嗰位住客知唔知係咩性別，幾歲？」
「好似係女仔，三十幾。」Suki想了想說。
「你估會唔會係佢自殺嗰時其實有咗，但啲法事只做畀佢一個，個BB就無份，所以而家留低咗個BB喺度？」我推測說。
「吓？咁都得？」Suki半信半疑︰「你又知？」
「Charles講得無錯，的確係BB鬼。」李太不知何時開始站到我們身後聆聽我們的對話，我們也被她突如其來的搭訕嚇了一跳。
驚魂甫定後，我問李太為什麼她這樣肯定，她告訴我們說她有陰陽眼能看得到，然後我再問那BB「住客」現時在哪，她卻說現在看不到，但還在單位內。
「睇唔見嘅『住客』應該點應付？」我心想。
「點解會見佢唔到？」這是我心裡第二個問題。
「你哋覺得點解會見佢唔到，但佢又真係存在喺哩間屋入面呢？」我決定集思廣益，希望會Brainstorm到些什麼可能的答案出來。
「啱啱聽你哋講，個住客自殺嗰時有咗，咁可能係個BB其實未成形，但已經有靈魂，所以就維持咗佢死嗰時嘅狀態，即係唔係人形，而係胚胎，或者受精卵？唔知啊，我亂噏。」李太的說話不無道理，雖然有點匪夷所思。
「咁即係我哋而家要揾粒受精卵出嚟？咁細粒好難見到啫。」Suki抱怨說。
「最弊唔揾走唔到呢，但我諗又唔會係受精卵嘅，最少都係胚胎，但既然未成形，咁一定係溝通唔到，只有靠我哋主動去揾，不過最大機會會喺佢死嘅地方徘徊，所以集中揾廁所。再講，好彩單位唔大，就算佢去咗第二度都易揾。」我嘗試令整件事顯得容易點。
「但我見唔到鬼喎……」Suki無奈的說。
「咁你幫手照顧李生。」我吩咐道，之後我便與李太一起地墊式搜索洗手間，終於在門後位置尋找到。
「難怪入屋完全無寒嘅Feel，佢太弱太細喇，又乜都唔識，又想要家庭温暖，所以有人嚟就想留住，但又淨係可以重複臨死時嘅感受，所以淨係能夠做到焫著門柄，之後就要匿埋抖一輪。」我恍然大悟。
「咁點處置佢？」李太問。
我用卡片輕輕把「住客」胚胎托起，然後唸了幾句咒，EAA字樣由EA證飛出，把它纏住封印起來，之後對李太說︰「我會返去幫佢超渡，而家快啲離開先。」
我們在客飯廳扶起李先生，一起步出單位。此時，Suki好奇的問︰「隻鬼搞掂咗嗱？」我點點頭，拿出EA證答道︰「而家佢喺度，不過之後我會超渡佢，個單位而家超乾淨，絕對抵買。」
「Charles，Suki，」李太突然開腔︰「我哋之後睇邊個單位？」
「帶李生去醫院療傷先緊要啲喎。」我有話實說，的確應該照顧傷者為重。
「我無大礙，隻手完全無傷痕又唔痛。」李先生伸出雙手讓我們檢查。
「咁得意嘅，頭先係單位入面明明好嚴重。」Suki不解道。
「我都唔知，但出到嚟就無哂事，可以繼續行程。」李先生剛經歷完靈異事件也可以像沒有事發生一樣，繼續堅持看樓，我不由得打從心底向他表示敬意及尊重，果然香港人怕無樓比怕鬼更甚，我們也樂於照辦。
接著我們看了餘下兩個單位，包括Suki重點推薦的，景色的確是十分驚艷，李先生也非常滿意，還即場還價，只是價錢偏低，未能成事。
「如果再有其他新放盤都通知我，同埋嗰間幫我傾吓，五百萬即簽。」李先生道別前留下這番話，也好，最少確定他是真的買家，雖然價錢比較離地。
至於那「住客」胚胎，我回到鋪後，將它交了給Kerry處理，我自己亦繼續跟進李氏伉儷情況，然而他們到現在還未買到心頭好，看來要花比較長的時才能成事了。
