（上）：https://post.shikoto.com/posts/175300
當時嘅我聽到真係甜曬，覺得自己係全世界最幸福嘅女人，而你就係我嘅Mr.Right。曾經，我的確認為你係會陪我行完呢一世嘅人。
不過......對唔住，呢三個字我一直開唔到口同你講，無可否認，過咗一年熱戀期，最近呢一兩年應該係我哋鬧交最多嘅一次，所以，我哋都挨唔住，只不過，我比你早放棄。
我睇得出，你係想挽留，唔想放棄，但你唔捨得嘅只係我哋之間嘅回憶，再糾纏落去，受傷嘅係我同你。
當初熱戀期時候，因為愛，所以可以包容一切，對方眼中都只有彼此，不過相處時間越長，愛嘅保質期就越短。或者係我嘅問題，係我唔夠愛你，係我等唔到你去改變。
老實講，同你一齊顛係我最享受嘅時光，就好似我一唔開心，你永遠都做我嘅樹窿，陪我笑陪我喊，有你係度，感覺世界末日都唔再可怕，至少我可以肯定，你會第一時間陪住我。
不過，我哋之間最大問題係你太幼稚，無錯，同你一齊係開心，但你有時候成日講嘢唔經大腦，我覺得自己好似照顧緊個大細佬。
其實，你大個仔啦，幾時先可以變得成熟啊？我講又講過，勸又勸過，你都唔覺得自己有問題，就例如，你每次買嘢完全唔睇價錢，想買就買，一兩次嘅我可以接受，賺錢翻嚟就當然係要用，重點係你買嘢無諗過實唔實用，買翻去又唔用。
到底，你有冇考慮過我哋將來？你係咪真係想同我結婚，定係你只係想揾人去拍拖打發時間？
我想要嘅係一個家、一個可以照顧我一世嘅人，而唔係一個大細路。
而令我下定決心分手嘅原因係，每次同你講起結婚嘅問題，或者日後嘅計劃，你一聽到就皺曬眉頭，發曬脾氣不斷話遲啲先啦，咩船到橋頭自然直嘅廢話，又話身份唔係重點，主要係大家相處得開心。
如是者，每次一講你就嬲到走，事後先揾翻我道歉，但係啊，受過傷嘅心又點會因爲一句Sorry就無事？一直嘅容忍，係因為我以為可以改變你，等到你肯成熟、肯去為我作出改變嘅一日。
原諒我，唔夠愛去等你改變。
就當大家都上咗一課名為成長嘅課堂。
就當，人生本來就係學習，
分別，只係在於角色扮演上。
今世，我成為你嘅老師，
有緣，下世再一齊學習。
可惜，呢一堂可以維持三年。
應承我，要學識成熟長大，做一個有承擔嘅男人，唔好再令下一個為你傷心為你喊。
2018.5.20
前女朋友
我個名唔值得你去記住
———
諗翻起當時寫嘅信，眼淚都唔小心滴花咗幾頁，如今回望過去，往事又如一柳煙般若真若假。
我攞住佢封信，感覺打開緊潘朵拉盒子，雖然已經唔存在愛意，但依然緊張佢會寫啲咩。
一打開，只見幾行大字：
「可唔可以，用一年時間等我變得成熟？
我知道而加嘅我比唔到穩定嘅未來你，但未來嘅我可以。
如果你肯嘅話，睇完封信後，去我哋老地方見，不見不散。」
不見不散，呢四隻大字，永遠都散發住一種深不可測嘅氣息，要有幾多信任，先相信對方會應約出席？
我緊握封信，手挽手袋向我哋嘅老地方出發。
所謂嘅老地方，就係以前成日拍拖或大家訂情嘅地方。
亦係我哋認識嘅起點，
社區中心。
