夠啦！畫夠未姐？成班以為自己係畢加索畫畫好勁好叻啊？有冇諗過無人想知？無人想睇？
有冇諗過，無被人Tag嘅感受。
我都好想玩下，我都好想畫下，我都好想有朋友。
原來，我所認定嘅朋友，佢哋都唔當我係朋友。
佢哋認為自己IG story Tag咗最好嘅朋友，大家互相畫嚟畫去，嘻嘻哈哈，感覺好好玩好有趣，而我，就淨係望住一大堆小朋友畫功嘅卡通人物。
我等，但一直都等唔到有人Tag我嘅日子。
我諗，呢個唔係咩畫公仔Challenge ，而係鬥多朋友大賽，講唔好Tag自己嘅人，應該都係暗示緊自己有好多朋友邀請自己玩，但我唔玩咋！不過都唔好當我係無朋友。
可能你覺得我係怨世啦，一件小事都講到咁誇張咁嚴重。
我認，直至我見到佢都玩，我認我係認真咗，我係......唔甘心。
我望住呢一位，曾幾何時，佢一失戀、一唔開心、一出事，我都係第一個出嚟幫佢，為佢出頭，為佢打氣。
一世朋友，本來係我哋兩個自稱嘅稱號。
可惜，唔知由幾時開始，大家唔再約大家。
好似係，由佢開始忙嘅時刻。
「喂，出嚟食下嘢？」
「唔啦，最近有啲忙。」
忙字可以有兩個意思，意思一，我真係好忙所以唔得閒，第二，我就算唔忙都唔想揾你。
諷刺地，佢話忙之後嗰幾個鐘，Po咗一個同人食嘢嘅IG story，雖然過咗一陣已經刪除，不過已經被我見到。
我明白嘅，人係會貪新忘舊，始終大家生活圈子唔同，或者今時今日嘅你，已經睇唔起我，但對我嚟講，如果你肯再揾我。
我都係會出嚟，
因為我一直當你係一世朋友。
我幾忙，
都唔會忘記。
但點解，你又忙，又忘。
今日，見到你係度玩畫畫大賽，但Tag嘅人入面，無我存在，或者，你連我Account名已經無印象。
我嘅存在，恍如從你嘅記憶中淡忘。
朋友啊朋友，為何舊知己在最後，變不到老友？
