何謂鍾意一個人？

你有冇試過鍾意一個人？

鍾意一個人，就係你會用好多理由去說服自己唔鍾意佢。

但係，你作嘅藉口越多，
正正意味住，
你係有幾咁鍾意佢。

你會用好多解釋去掩飾自己想留意佢更多嘅事，例如你會「唔小心」咁㩒入去睇佢啲IG Post，「唔小心」咁睇到佢WhatsApp 狀態，「唔小心」咁問到關於佢嘅近況。

喂，世界上邊有咁多唔小心啊？
到底係人為，定係真係唔小心？

永遠覺得只要理解佢啲嘢多少少，就可以同佢嘅距離接近多啲啲。

事實係，自己連同佢有更進一步嘅關係都無。可能會係朋友關係，但又唔會親近到咩事都分享，講白啲，就只係一位普通朋友咁簡單。

有時候，佢對自己好少少，就會成日諗佢係咪對自己有好感？

直覺不斷叫自己唔好鍾意佢，唔好諗咁多，事實上，越叫唔好就越諗得多。

因為叫停自己嘅時候，先會注意到諗緊佢嘅事實。

咁點解唔索性鼓起勇氣追人？

因為怕，怕會無咗個朋友。
因為怯，好怕佢會拒絕自己。

無論個原因有幾完整，有幾堂皇都好，自己好清楚，佢根本唔鍾意自己。

因為所謂嘅表白，都只不過係將大家對對方有意思嘅心意，再加以肯定，而非自己一個盲目單戀，再向對方表達心意。

但其實，所有嘅愛情，唔係由單戀開始先㗎咩？當然，有一見鍾情情況，而呢種情況就可以順利成章咁互相相愛。

不過，又有幾多人可以咁成功？

所以，我想講嘅係，鍾意一個人，就去追啦，成功又好，失敗又好，至少，你試過。