(上):https://post.shikoto.com/posts/175300
(中):https://post.shikoto.com/me/posts/175365

———

社區中心內嘅擺設仲係十年如一日,完全無改變過,不過有啲事、有啲人,其實已經不知不覺間唔同咗。

呢度嘅人流依然好多,每日都有一班小朋友同老人家嚟打發時間。

佢哋屋企人為咗賺錢,
而喪失同佢哋一齊嘅寶貴時間。

咁佢哋究竟佢哋係賺定蝕?

我同佢一齊嘅時間,係賺定蝕?

我可以好肯定咁答,一定會係賺。
同佢一齊嘅所有經歷都成就咗今日嘅我。

即使彼此都曾經受傷對方,然而彼此相愛過都係無可否認嘅事實。

呢度嘅一枱一櫈都喚醒起我哋過往嘅一點一滴,不知不覺就已經過咗一年,原來時間真係可以沖淡一切。

沖淡回憶,沖洗情感。
我再記唔起昔日愛佢嘅情感。

「Jacky哥哥!你今日都嚟教其他人魔術?」一位小朋友突然大叫。

「唔係,不過都係處理一啲重要事。」

「唔通係......」

「噓!我遲啲再同你講。」

前男友心急如焚跑向我面前,以往追求出街乜都唔帶嘅佢,如今罕有咁揹著背囊。

我主動開腔:「慢慢嚟唔洗咁趕,你無遲到,我都係啱啱到咋,你今日又會帶袋出街嘅?你仲係度教小朋友魔術?」

「好遲啦,我已經遲咗成年先到,不過好彩仲有人係度等緊我。」佢開始緊握住我雙手,繼續講:

「我而加出街都會帶袋,膊頭有啲負擔都唔錯啊,唔係點做一個有承擔嘅人喎?而我仍然有教佢哋魔術,每次表演,我都會回憶起同嗰一個人嘅相遇,期盼緊有一日,佢會再次被我嘅表演吸引。

我已經兌現咗自己一年前所定落嘅承諾,
唔知嗰個人又會唔會願意陪我一齊完成名為魔術嘅奇妙人生?」

「其實我......」未等我回應,佢擁我入懷抱之內。

「唔好走......我求下你......唔好再走,我真係改過㗎啦,呢一年我都好掛住你,我好唔捨得你。」佢甚至激動到落淚,曾經洞悉我思緒嘅人,此刻依舊察覺得到我嘅想法。

佢感受到,我想拒絕。
所以先會,苦苦哀求。

「如果我今日因爲你喊而接受復合,我哋嘅感情係唔會長久落去,因為我對你已經無咗愛,單靠一時三刻嘅衝動而接受,結果淨係會hurt多大家一次。

我今日之所以出現,係因為我知道你一定會嚟,所以想同你好好講清楚,唔想你白等。

因為我好清楚白等一個人嘅苦楚。
由期待到失望,
就好似由天堂跌落地獄。

友情又好,愛情又好,只要其中一方,仲有條刺係心入面,段感情永遠都無可能同以前一樣咁深厚。

就好似魔術表演咁,講穿咗,咪就係將大話包裝成真實?

與其執著,倒不如去放手? 」

雖然講得好絕情,但為咗令佢死心,我不得不講到咁無情。

佢慢慢鬆開抱緊我嘅手,「......頭先係我太激動,感情從來都係雙向,既然你已經唔傾情於我,我做幾多、講幾多都無用。

最後,你可以應承我多一個請求?」

佢的確變成熟咗,又或者可能學識接受現實,明白拍拖係兩個人嘅事,一個唔肯拖,咁可以點拍呢?

「除咗復合,咩都得。」我爽快回應。

佢拖住我去到出面,話想為我表演最後一次魔術表演,呢個表演只係為我一人而設。

「你就由我拖埋你最後一次,如果世界有如果,咁我就可以拖住你一世。」

「正因為無如果,所以人先有遺憾。
有遺憾,先會學識珍惜。」

———
(完):https://post.shikoto.com/me/posts/177074