又到七夕，無辦法唔上黎發下牢騷。
身邊經常都聽到女性朋友投訴佢地既男朋友，話佢地點點點唔好，點點點衰，點點點唔細心唔體貼。
ip都唔洗check，佢地既男朋友，一定係無家姐。
一個有家姐既男仔，由細細個開始，已經受到嚴格既訓練。
如果第時有一間男朋友訓練中心，全世界既家姐應該可以輕鬆獲得國際認可訓練員資格。
點解我咁講？
首先，細佬一定係細過家姐，呢句廢話，我知。但細幾多年係一個重點。
香港普遍黎講，由於第一貽已經係比較遲生，所以如果父母想追多件既話，時間相距一定會較短。
換言之，家姐同細佬既年齡相距，普遍黎講唔會太大。
咁就出事喇。
當細佬出世以黎，接觸最多又差唔多年紀既異性，就係佢家姐。而一般而言家姐對岩岩出世既細佬，都會好好奇，同埋覺得自己細佬好得意。
咁樣，係細佬整個孩提時代既成長過程，家姐都會呵護住佢，成日同佢玩，從而獲得細佬既倚賴同信任。
但再過多幾年，同家姐青春期既時候，問題就出現了。佢會嫌自己細佬煩，唔聽話，同時又會覺得父母偏心。
呢個時候，家姐就會開始疏遠自己細佬，令細佬受到冷落，失去倚賴。
作為細佬，年紀細細就要適應呢個咁殘酷既轉變過程，由萬千寵愛變到受盡冷落，都一一面對。
到左日後大個做左人男朋友，就算女朋友善變過特區政府呀，都輕鬆應對啦你話係咪先。
此外，到細佬青春期喇，由於男性係青春期間及之後都係唔會有月經既，所以情緒波動一般而言會較女性低。
但呢個時候，男性會擺脫一貫而黎既baby face，逐漸變得面目可憎(係家姐眼中)，從而受到家姐既各種無理對待。
可能係家姐真係睇你唔順眼，郁啲就發你脾氣，有時就當你奴隸咁用，有時就扮晒撒嬌咁叫你幫佢做家務。
作為細佬，根本無得揀。因為你知道老豆錫女，阿媽又會幫女人。所以，就只好默默承受呢一切。
細佬係成長階段所承受既，根本成就佢成為凡人入面既超人。
煮飯燙衫拖地掃地執屋換燈膽，家頭細務樣樣熟練。此外，仲練就左觀人於微，準確知道家姐姨媽探訪既日期，從而避開一劫。
即使第時做左人男朋友，都知道自己女朋友幾時唔舒服，幾時唔開心，幾時要人呵護。仲可以幫你做埋家務添！
再者，到大個左，細佬開始沉迷線上遊戲之後，就出現爭電腦既情況。
爭電腦，可能係細佬史上作出既第一次反抗。面對強權，細佬終於明白絕不低頭既道理。
經過多番爭取，短兵相接，屍橫遍野之後，終於成功爭取時間表制度。
可惜……到最後，家姐都係唔會依照個時間表黎用電腦……
除此之外，仲有各種不人道既訓練方法成就細佬。
種種歷練，培養出細佬既耐力，毅力，觀察力……
所以，計我話，揀男朋友識揀一定係揀做人細佬既。
講笑咁講者，我知唔係個個家姐都咁對細佬既。
只係想直線sell下自己作為人細佬，都仲係單身者……
