「好耐無見，你靚咗好多，呢一年一定過得好幸福，多謝你信守我哋之間嘅諾言。」佢收起咗以往嘅傻氣，談吐之間變得認真。

「講得出，做得到。過咗一年，我自己都唔係好記得寫過咩啦哈哈。」

佢微微一笑，向我遞咗封信，「 禮尚往來，呢封都係我一年前寫。」

「咁我唔阻你啦，再見。」

望住前男友離開嘅背影，我諗，佢係我遇過最奇怪但呢一世都會記住嘅人。

————

一年前，

「我哋已經行唔到落去，分手啦。」

呢一句說話，唔係鬥氣亦唔係嬲，而係真心想分手，你再多嘅逃避，都避唔過要講再見嘅一日。

唔緊要，既然你開唔到口，就由我嚟講。

「我......好啊，但分手前，你可唔可以為我做最後一件事。」佢拭擦一下眼睛，苦笑咁問我，感覺上，佢好似強忍住淚水。

「你想我幫你做啲咩？」反正，我哋未來都唔會有任何交集。

「我想......你幫我寫一封信，寫翻你同我一齊嘅3年時間覺得我點樣，特別係，點解可以由鐘意一個人，去到放棄一個人，然後......一年後比我。」佢唔敢同我有眼神接觸，或者都覺得自己嘅要求有啲過分？

而我，居然顛到應承佢。

「無問題，我send email比你。」

「唔好！你可唔可以手寫比我？」

仲要我手寫？咩人嚟㗎，唉，最衰口快快應承咗又廢事反口。

「呃，但用電腦打字方便好多喎，而且，點解要一年後咁耐？」

「人嘅字跡係最獨一無二，唔似得啲電腦字一式一樣，你係我心目中都係一樣難以取替，雖然我哋要分手，不過我都想好好記住你。」

「再講，我想知道一年後嘅自己會唔會有改變。」

此刻，我再無拒絕佢嘅藉口。

「咁我手寫，之後一年後寫好再約你出嚟親手交去你手上，無問題啦掛？」

「今次無啦，我哋之間終於可以唔存在問題。」

後句，我好似隱若咁聽到佢喃喃自語，可能係自己諗多咗啦。

——

呢一封信比我想像中更難寫，原來3年間大家都不知不覺咁經歷咗好多事，應該要點落筆開始？

最後，我決定由自己鐘意佢嘅時間點作開始。

前男朋友:

你仲記唔記得三年前我哋點相遇？當日你係社區中心同一班小朋友表演魔術，而我就係側邊偷睇被你嘅魔術吸引住，我覺得你好有魅力好有才華，仲唔小心大叫咗一聲點解嘅。

同一時間，你發現咗我嘅存在，仲話我嘅反應好捧場，夠真實。之後大家相處得幾開心就順利成章一齊咗，其實你係一個幾易相處嘅人，知道我鐘意食Pizza同拉麵，就會遷就我去揾唔同餐廳，又會成日表演啲魔術令我開心。

記得有次我問你，表演過咁多次，最鐘意嘅魔術表演係點樣，你含情脈脈咁望住我雙眼話：「最好嘅魔術就係令我鐘意你。」

——

寫到呢度，突然有種諗法，我係咪真係要同呢個人分手呢？我係咪太過衝動？我係咪做錯咗？

甚至，想馬上打電話同佢復合。

但冷靜咗一陣，先醒起當初想分手嘅原因。

於是，我繼續動筆寫落去。