《麥旋風》

係我記憶入面，所有朋友都係食曲奇味麥旋風，每當佢地望見我食聰明豆味，都會露岀奇異既目光，彷彿表達緊：白痴仔，識食一定食曲奇味....

《麥旋風》
係我記憶入面，所有朋友都係食曲奇味麥旋風，每當佢地望見我食聰明豆味，都會露岀奇異既目光，彷彿表達緊：白痴仔，識食一定食曲奇味。
如果要我形容，曲奇味就好似女神咁，賞心悅目受人愛戴，令唔少人都願為左佢而放棄平庸既新地筒；如是者，聰明豆味就好似毒拎咁，永遠冇咩存在感，亦無人想主動了解佢既內在。
仲記得我發現有聰明豆味，已經係我食左麥記幾年後既事。
望一望杯野，佢冇曲奇味黑白色既賣相咁簡單直接，反之入面既雪糕怖滿五顏六色既糖衣，再配埋打碎左既朱古力碎，賣相雜亂而無個性。我勉為其難咁不起一斤，不加思索咁塞入口。
呢種感覺⋯
每一啖都感受到每粒聰明豆碎片，而啖啖既質感都充滿驚喜，你永遠唔知下一秒粒碎片有幾大粒，就好似你既人生永遠預計唔到下秒發生咩事。
當我咀嚼之際，口腔襲來一陣痛楚，繼而傳來血腥味。係聰明豆既碎片！食聰明豆既最大挑戰，就係要避過每粒碎片既尖端，係享受既同時保持警惕，呢種危險而刺激既感覺，就好似愛情咁，甜蜜中卻防不勝防，在你毫無機心下給予致命既傷害。呢種受傷既感覺，傷在我身，痛入我心。
我按捺住激動既心情，望住眼前杯雪糕。我望唔透，我無辦法知道究竟我再食落去我既人生變成點。我大可停左唔再食，但係我做唔到，我發覺我已經墜入左佢既世界。
我望到對面既mk妹，發現佢正係度食緊曲奇味，嘴角卻望住我露岀恥笑既目光。係呢一刻，我感受到前所未有既孤獨，我覺得呢個世界無人明白我，就好似聰明豆咁，就算存在左係麥記幾十年，佢依然係最低賤既一群，蘋果批，新地筒，就連最冇特色既粟米杯，都比佢更受歡迎。佢默默耕耘左幾十年，卻換得如斯下場。公平咩？呢個世界公平咩？
或者，佢既存在，就只係為
左尋找世上僅餘既一點點明白佢既人，能感受到，自己並唔係孤獨，世界上仲有跟自己一樣的一群。想到呢點，我不禁流下男兒淚。
我最後有冇食哂果杯雪糕，我已經記不清了。
只知道，我自此冇再食過曲奇味既麥旋風。