話說近排唔小人向我投訴，日日係facebook都邀請佢地玩埋啲白痴遊戲，無論心靈定生理上都受到一定既滋擾。
我當堂就嚇一跳。然後就得啖笑。望住我個塗鴉牆密密麻麻既遊戲訊息，我瞟一瞟電腦前振奮地與大陸玩家玩徳州撲克既老豆，我默默地按下wtsapp,淡然地輸入道歉信息。
想當年，facebook興起唔少小遊戲，sim social、開心水族箱，呢類低智遊戲曾經令我沈迷一時，但我點都估唔到，步我後塵既，會係我最親既人—老豆。
仲記得當時，老豆每逢夜晚就無所事事，食飽就坐係度望住個天，係佢空洞既眼神之中，我揾唔到希望，只有無窮無盡既唏噓同寂寞。人到中年，幾許風波，最後竟換得絲絲淒楚，情何以堪。
我記得，當時講左句改變左我同佢一生既說話。
「老豆，玩唔玩下facebook？」
由果刻開始，我地既命運瞬間逆轉，開始左不一樣既人生。
老豆自從玩我facebook後，佢好似一個入世未深既小孩咁，每晚懷住期待既心情係fb既遊戲進進出出，每個小遊戲都給予佢無限既新鮮同刺激，如果要我形容，facebook就好似佢再生父母，給予佢關懷，陪伴住佢渡過難苦既人生。望住佢重燃希望既目光，果種感動，果種喜悅，扣入心弦。我別過臉，索一索鼻，免得佢睇到我两行男兒淚。
但我冇諗過，facebook遊戲不知不覺已經成為左佢生命既支柱。每一日，佢都不眠不休咁儲積分，發送遊戲邀請，將遊戲訊息發佈到塗鴉牆，日復日，年復年，從未間斷。我冇諗過佢對facebook用情咁深，不通自拔。漸漸老豆既心已經墮入facebook既遊戲入面。究竟佢既離去，係facebook既追求，定我既不挽留？
三年後既今日，坐係廳度發呆既，再唔係我老豆。我望一望天，再望一望手機上投訴我發遊戲邀請的訊息，我已經望唔透，呢個世界有幾多野重掌握到。
如果當時我冇咁講
可能而家坐係度望天既⋯
如果人生有如果
那就不再是人生了