一個普通男仔，只要老豆唔係對自己特別差，都會喺成長嘅過程受到影響嘅。我自己因為同老豆關係算幾好，所以有唔少興趣都係因為老豆嘅關係先至會培養到。而呢個系列，就係講下小弟一啲受老豆影響嘅嗜好。
第一樣想講嘅，就係睇星矢嘞。我知，我聽到你哋發出嘅噓聲。你哋而家一定係講緊「星矢渣嘛，有幾出奇呀」。但係大家要明白，同我同輩嘅後生仔，其實真係冇乜邊個睇星矢。佢哋對星矢嘅印象，基本上就只係得首廣東話主題曲、十二個黃金聖鬥士同青銅五小強㗎咋。對佢哋嚟講，星矢嘅「跌低、起身」無限loop劇情實在係非常悶—事實上都係。好記得喺細個同老豆一齊睇嗰陣，每次我睇三四集左右，就會畀啲拖揼情節搞到瞓着咗……
好嘞，一千萬問題，我講到自己細個咁唔鍾意睇星矢，睇親都瞓，噉點解又會話鍾意嘅呢？最大原因，就係事隔十幾年之後，星矢有出咗新嘅篇章同埋衍生做作品。基於兒時嘅印象，總係會忍唔住睇吓嘅(雖然好大機會中伏)。之但係，又估佢唔到咁好睇喎！不但止冇咗啲「跌低、起身」無限loop，一直hea打嘅黃金聖鬥士終於有返應有嘅戲份同實力。講真吖，睇星矢，無非都係畀佢個設定吸引啫，跌低再起身呢睇一兩次就話熱血，再多就會變到好似火箭𠔊團噉純屬搞笑。上面所講嘅篇章，唔再純係靠五小強嘅主角威能。兩場聖戰都要靠返理論上真正嘅主力黃金聖鬥士犠牲自己換返嚟。成件事即刻唔同咗，令人有想追睇嘅衝動。
臨尾補充返，我講緊令我對星矢改觀嘅兩套作品，分別係冥王十二官篇同埋另一位作家畫嘅Lost Canvas。我自己嚟講叫做同人作品嘅Lost Canvas甚至好睇過原作者車田正美嘅本篇。劇情豐富之餘又有唔少可以同正篇銜接，不過動畫版嘅Lost Canvas只係做到漫畫嘅一半就冇做落去，真係非常可惜。另外近年有套黃金魂都唔錯，但係商業味就濃咗啲。
