(首先，梗係要花少少篇幅讚下喺2月14冇出街喺屋企乖乖地出文嘅自己先啦。)(其實根本就冇女埋身)
好，呢個系列可以嚟到第二章，對於成日亂開空頭支票嘅我嚟講可以話係非常難得。事實上，我亂開空頭支票嘅原因好多時都係因為自己開咗個系列之後，先發現自己跟本冇料寫，惟有當冇事發生過噉放棄。所以，此刻嘅我仍然諗到要寫乜，重有貨交，真係一件幾出奇嘅事。(但寫完呢篇之後我已經諗唔到要寫咩……)
廢話實在係講得太多嘞，而家開始入正題。披頭四大家聽得多，但老老實實，真係有去聽佢哋嘅歌嘅人其實唔係咁多。事關隔咗成五十幾年喎，如果唔係有人影響，又點會特登去聽吖。正如若果唔係唱「小幸運」，香港人又點會去search費玉清嘅片嚟睇(喺度作出呼籲，唔好睇咁多大陸嘢喇。)？經典呢家嘢，人人都趨之若鶩，但真係會去細味嘅又有幾多個？我唔係想貶低任何人，只係講返呢樣嘢係好自然嘅事。
不過我自己都唔例外。對於披頭四，一直都只係知道係一隊好出名嘅樂隊。細個叫做喺老豆播嗰陣喺側邊聽過下噉。之後有一排為咗提升自己嘅英文水平，問老豆攞過幾首嚟聽，但都唔係話有咩興趣。
就係噉過咗好幾年，接觸過唔同種類嘅音樂，都係未有披頭四份住。直至到近一兩年(終於入主題喇)，開始做咗藤原櫻嘅fans(仆你個街噉都可以有植入式廣告)，因為藤原櫻係好鍾意披頭四嘅(尤其係Paul)，得閒無事就會翻唱。喺好奇心驅使之下就去搵咗啲披頭四嘅歌嚟聽。記得嗰陣亂咁撳，就撳咗入去聽In my life。基於一直以嚟我對披頭四嘅印象，都係建基於Let it be，所以我之前都係以為披頭四嘅歌都係噉樣(我細個嗰陣係覺得呢首歌好悶，到而家先鍾意聽)。都好明顥嘞，我當堂虎軀為之一震。馬上對披頭四嘅歌產生興趣，跟住就開始聽落去。
去到呢度，可能有人會話：喂，噉係因為藤原櫻你先聽披頭四啫，關你老豆咩事？嗱，唔可以噉講嘅，事實上，老豆知道我開始聽之後，閒時都會傾下披頭四，可以話係老豆帶我去探索更多有關嘅嘢，話幫我開闊眼界都唔過份呀。
只不過，下次你早啲同我講你一早買齊啲碟吖，要買咁多碟都幾甘下㗎……
P.S: 呢度有我當日睇嗰段片
https://www.youtube.com/watch?v=-eCh3y5VROM&index=11&list=LLHjDvu3VFiVYaO9lerp98Cw
