「可唔可以同我影張相呀？」呢句好似係佢三年嚟惟一一句同我講過嘅嘢。
三年高中，多得老豆建議，揀咗幾科理科嘅我無端端揀咗科中國文學作為選修科最後一塊拼圖。記得當年知道我噉揀科嘅人，十居其九都話我黐線(雖然有人同我揀埋同個組合，exactly一樣嗰隻。不過唔同嘅係，人哋有為青年，我就連廢青都不如)。之但係，而家諗返，都要多謝老豆幫我做呢個決定。叫做讀過文學嘅我，喺同啲文學少女交談嗰陣，仲可以搭兩句嘴(兩句之後先dead-air)。另外，讀文學可以話係喺毒男理科班三年嘅我，僅有可以見到女同學嘅機會。
好喇，講咗咁諗廢話，我知道仲留低喺度嘅人都已經開始忍唔住想爆粗同打鑊我，但係我依然未諗住入正題(笑)。我想講一樣嘢，就係有啲人成日會覺得啲讀文學嘅女仔一定係好有氣質，對手永遠都揸住本書，開口埋口都李白杜甫。其實係大錯特錯嘅。事實上佢哋嘅行為同一般女仔完全冇分別，係唔會有大家認為文學少女應有嘅氣質。如果我唔同你講，你根本唔知眼前呢個句句粗口又鍾意講八婆嘢嘅女仔，竟然係讀文學嘅。當然，我唔係想話女仔講粗口講八婆嘢有咩問題，我只係想講返句經——其實靚女，都一樣係會屙屎㗎。幾廿歲人，唔好咁多幻想啦。
喺破壞完大家嘅幻想之後，你哋有冇發覺一個問題。既然我講到啲女咁普通，點解仲會鍾意其中一個？定係有例外？如果你真係噉諗，我只能夠講你真係好天真。個個女人都係噉㗎喇，你係咪唔溝女唔拍拖？人係會包容㗎嘛！當你某種需求好大嗰陣，你話知佢份人有幾差都包容到㗎啦。而更重要嘅係，以上嘅道理，我都係最近先開始明白，亦即係話，當年嘅我，係真係認為靚女係唔屙屎嘅。
鏡頭終於都去到當年嘅我，嗰陣我仲係懵盛盛噉以為班上面嘅全部都係溫文爾雅嘅女仔。噉好自然地，上堂唔聽書嘅我就會𥄫下有邊個正啦。不過𥄫咗大半年，都冇話覺得邊個正。直到有一次，我唔知解，覺得其中一個女同學幾正。
我仲記得嗰日係落緊雨，窗外面嘅天色灰暗，噉我好似平時噉四圍望唔上堂啦。不過，我嘅目光停留咗喺一個同學身上。
嗰位同學我唔係未見過。同我之前講嘅噉，我一直都唔覺得班上面嘅同學特別靚。講真就算你幾靚女都好，對得耐都唔會有feel啦，更何況我嗰班同學只係普通人？但係，嗰刻唔知點解，我覺得抄緊筆記嘅佢好靚。
之後嘅事，大家都估到啦？我就梗係乜都冇做過啦，話晒我都係個唔敢出聲嘅毒男嚟，又點會有啲咩行動呢？而我同嗰位同學嘅交集亦只限於Last Day嗰陣影過相。
係咪好無聊呢？嘩哈哈哈哈哈哈哈哈哈哈哈哈哈哈哈哈哈哈哈哈哈哈哈哈。唔好意思，我淨係識呢啲㗎咋。
