件事係咁，我喺博客來買咗堆書，見7-11自取平過送上門，咪揀咗7-11。點知隔幾日，順豐打嚟話我揀嗰間7仔冇位，問我介唔介意去順豐站拎，心諗都係差幾步啫，咪Okay囉。

咁就出事嘞。

一去到順豐站，目測有成40人排緊隊，條龍隊出舖頭，沿住店側邊排到落後巷，掟完彎再掟彎，龍尾轉返出嚟，成條人形蜈蚣幾乎可以駁返落個頭度，自給自足。

正能量爆燈嘅我見到有成3個店員，就當每份件都要拎2分鐘，粗略估計，40/3*2=26.67，排半個鐘乜都得喇啩（事實喺我排咗半個鐘之後，見自己仲喺一號掟彎處，先至計數）。

所以我就抱住樂觀正面嘅態度，乖乖哋行去隊尾，然後碌電話。

一啲好睇嘅FB Page永遠Reach唔到我，碌極都係無數廣告同X假期吃喝玩樂Post，仲要大部份尋晚已經見過晒，唔知點解今日仲要喺度，乜FB演算法唔係好了解我嘅咩？

IG都叫做有朋友嘅嘢睇下，但個個都Post旅行相，我有假都走咗去排順豐啦，邊有旅行去啫。

喺呢刻我覺悟真理：相對論果然講得冇錯！明明夜晚上個網碌兩碌，唔知睇咗乜嘢，都可以唔見咗一、兩粒鐘。而家排住隊，竟然碌極電話都打發唔到時間。

因為心情影響一切。我忽然覺得，想靈修嘅人，唔好打坐嘞，去排隊啦，當你排一條唔知幾時完嘅隊，都仲可以心無雜念，一聲媽叉都冇，咁你就滿師，到時你就唔駛再修行，不過依然要繼續排隊囉。

直到我開始察覺唔到時間嘅流動，我就覺得「讀萬卷書，不如排一粒鐘」真係冇錯。

然後，我聽到附近有人講電話：「我喺順豐等緊寄件呀。」我轉個頭，見到後面有一個男人，拎住一個紙箱。

一股寒意爬上我背脊，原來我企咗喺風口位。一分鐘之後，我終於迫自己面對一個難以接受嘅「真相」。

仆街！我會唔會排錯咗寄件嗰條隊，唔係有乜理由拎件要排成粒鐘？

我開始回憶一個鐘之前，我對眼望住舖面，有冇見到其實有兩條隊呀？會唔會其實有條短嘅拎件隊伍，而我偏偏敏感度不足，好似羊群咁自動行去一條明顯啲嘅長隊？

我個心無限掙扎，到底我應唔應該問下人，或者離隊𥄫下舖面係點呢？

但好快我就刮咗自己一巴，邊可能有成40人要寄件㗎。事實上，我喺唔想有另一條快隊，否則我呢個鐘係純粹因為自己On9而白費咗。

為咗唔想柒、唔畀人笑，就算離隊可以即刻取件，我都寧願企返原地跟大隊，做個乖乖嘅香港人。

前面仲有6個人啫，好快到我。

但邊有可能取件都要咁耐㗎？乖啦，排啦，你唔排多十分鐘，之前嗰一個鐘就真係白費㗎嘞，啲大白象超支工程都係咁說服全世界嘅啫。

喺掙扎之下，原來時間會快好多，我終於見到舖面。原來真係得一條隊，我冇蠢到，真係好開心！

拎完件，同班FD呻，佢哋笑到卡卡聲，仲潤我咁得閒排隊，點解唔應幾時Gathering喎。

我忽然間如雷貫耳，茅塞頓開，可以用80分鐘排隊拎份件，原來我都真係好得閒，唔應該再用忙嚟做藉口喇！

多謝順豐，令我今日學到好多嘢！

胡鬧Mode完，鬧多幾句：

其實而家啲人網購分分鐘仲多過喺實體店買嘢，物流業理應賺到笑，好心就咪鬼賺到盡，租間細到好似劏房咁嘅舖頭，搞到員工連企都冇位企，貨架爆晒棚，要周地劈啲件，搵份件都難啦大佬。

拎件同寄件點解會同一條隊處理？

理得你啲件由外地運到嚟香港有幾快咩，要人親身落街排隊嗰啲時間，先至喺真真正正上心嘅時間。

奉勸大家以後博客來買書，畀多少少錢送上門。

（完）

鍾意嘅請Like 我Facebook XD↓

〈夜半，被彈鐘的第一個人〉：https://goo.gl/XCre9p

#余該隱 #中伏經過 #純發洩文