以我為人係無可能無拖拍架，又講得笑、又玩得、又吹得水、又唔知羞、又MK、最緊要係唔煙少酒、又上進，根本就無可能單身。

啱呀，我好努力做個好男朋友。

你想要多姿多彩，我有自己興趣自己目標，有旅行見識，有健康活動，有呢啲自然多話題，我有做！

你想要安全感，我無周圍撩女，有交帶，想搵我有時間一定搵到，有穩定工作，我有做！

你想有社交，我有自己朋友，有自己興趣自然識到人，朋友搞活動多數出，我有做！

你想有上進心，我有對自己事業努力，上到位實上，興趣無半途已廢，識多d朋友加強朋友圈地位，我有做！

你唔想油頭暗瘡，我有做面部皮膚護理，會gel頭，會襯衫，著boot，染髮，學帶隱形眼鏡，我有做！

我連心理學、玩讀心既野都有學，咩把妹達人果d技巧，都有學過、試過，有被追過。

但係點解？個個朋友都話咪玩啦，你點會無女朋友，你呃人咋？

我想同大家講，我唔係無女溝，只係呢類人明白左世界兩性既真理。

可能呢種人受過傷害，學習做好男朋友既角色，會浪漫，會專一，會上進，會打扮，會扮Man，會柔情，總之係人眼中係一個好好既男朋友。

但係永遠唔會知，佢看破紅塵，佢知道做渣男溝唔少女，做毒男係唔會溝到女，有錢就可以吸引拜金女，無錢可以靠口才同心理學呃到女，呢d把妹野佢知佢懂。

但係單身既原因係佢相信愛情係可以簡簡單單，佢天真相信做自己可以奪得美人歸，唔中意既唔會騎牛搵馬，佢唔會用把妹技巧去追一個女，佢想用最傳統既方法去吸引一個女仔。

可惜既係佢咁樣做會一條女都無，所以你地唔好再話人無可能無女朋友，因為佢深信做好自己就可以得到佢埋藏係心底既果個人，或者可能果一位永遠唔會係佢身邊，所以單身已久。