妳舉起隻杯同我講：「渣GA，男人老狗飲唔到酒。」
其實我只係單純覺得佢唔好飲，無咁多其他原因，好似人一大個就要識飲酒咁，妳理所當然咁講，我都唔知俾咩反應妳好，見妳一杯杯大大嗒，飲到我飲唔出嘅滋味，我心頭真係不是滋味，甚至有種妒忌，點解妳會飲得咁滋味？
酒，平到貴嘅滋味於我來講都係苦，不是我所欲，要飲出佢嘅價值首先應該係覺得佢係好飲，簡單直接，可能係妳飲完個人好放鬆，可以講得出平時唔敢講嘅嘢，又可以唔使用妳塊西面對待世界，對住我飲酒可以好放心，又唔使擔心飲醉，真真正正忘我。
身邊嘅朋友聚一聚都會飲吓酒，約嘅地方都會望望有冇酒提供，啤酒紅酒對我嚟講都差唔多，只係後者仲多咗啲酸味，少年不識愁滋味，係咪我味覺未係時候享受到佢嘅滋味，或者我個人根本過得唔苦呢？
細嗰嘅時候鍾意甜，大嗰就會提起吃苦，出嚟社會做事已經日日飲酒咁苦，我諗呢樣先係我潛意識中嘅答案，對於苦我唔陌生，只係放鬆嘅時間我仲要面對苦，呢樣我身體好誠實做出反應，我會買枝可樂飲吓，果種小時候嘅回憶，透過吐氣果種滿足感，一個完滿嘅感覺，我鍾意。
返工同啤酒相同之處就係令你覺得苦同會搞到你一肚都係氣，生存無得揀，享受呢一回事係一件私人事，令你享受嘅原因好多，你干涉到人嘅生活自然會惹起反感，大家要合群要忍讓，所以大家要飲返杯其實我係唔介意，只係我唔認同大家都會對一樣嘢嘅睇法會一致，我會飲酒因係我享受同大家見面嘅快樂，而唔係佢好飲或者衍生出嚟嘅道理。
男人應該係咁，或者長大咗應該要咁，大家心裡應該都會有個標準，因為社會個要求係咁，大家都自然跟住咁樣去量度，大家都好自然會對少數作出批判，唔飲酒會覺得係乖會覺得係奇怪，好似你覺得買得起枝貴酒好開心好有成功感一樣，放喺我身上就絕對唔會有果種開心，因為享受係個人嘅事，目光以及批判都干涉緊其他人，我一向都少理，只要係朋友嘅都會理解你明白你，根本就唔會介意呢啲小事。
半杯啤酒養金魚養足半晚，我飲埋最後一嗒望住妳講。
「咁我鍾意飲可樂嘛。」
