突然間收到妳呢一句短訊令我有啲緊張。
想起初初同你第一次傾計，大家互不相識，只係因為一條短片嘅留言，估唔到咁岩篤中你笑點，你比咗個LIKE，緣份就係由呢一刻開始，無人估到接下來會相識相知，兩個本來就無共同朋友嘅陌生人，因為互聯網而可以彼此認識，大家都唔知對方係咩樣依舊放膽，可能係年少氣盛，根本就無咁多考慮，失敗咪失敗，所以先可以有機會愛妳。
呢個機會可以話係偶爾出現，而好彩嘅係我又識得把握，我開始學習去搵我喜歡妳嘅地方，盡量讓佢一直存在係你身上，每次我見妳嘅時候都會感受到，我喜愛嘅存在係妳身上，因為某種特質係妳先擁有，如果係我令妳失去咗某種特質，咁樣就係我親手摧毀呢段關係，係我自己推自己去死，所以我開始關係嘅同時亦係一種學習，就同大家認知嘅一樣，去學習理解妳嘅不同，點解妳會吸引到我去追妳。
仲記得第一次見面嘅時候，食完飯妳話唔想去咁多人嘅地方，所以我同妳去咗行公園，公園唔算太靜，都有少少人散下步，最後同妳坐咗係長凳度，妳果陣仲係長髮，頭髮不時都飄出一陣香味，淨係諗返當時我都開始硬硬地，少女嘅體香有種說不出嘅魅力，我唔敢望妳，因為我岩岩扯起個腦仲未回魂，第一次見妳依然有一種神秘感，大家其實都係同平時一樣，閒話家常，但係因為4D嘅臨場感受，一個真實係我面前出現嘅異性，而且係我自己有好感果種，我唔識有咩壞印象，所以不斷壓抑住衝動，到走嘅時候先發覺，細佬痛到差啲行唔到路，我諗你睇到呢到都會明白我點解會咁，因為呢樣應該都係男人嘅追女回憶之一。
妳問我做乜行路怪怪地，原本我想呃你話個肚唔舒服，但記得上網同妳嘅果陣都唔會講大話呃妳，而妳又唔係果種會扮唔知咩事嘅女仔，所以當下我無避諱，大膽講出答案，而妳嘅反應我諗我呢世都唔會忘記，我見到我呢世覺得最靚嘅笑容，發自真心嘅笑聲好似魔音咁纏住我，就係呢種咁單純咁真心嘅反應，原來妳同上網果陣一模一樣，無呃過我，我雖然忍受住無比嘅痛苦，但心入裡有種甜絲絲嘅感覺，我諗我一直愛妳嘅原因好明顯，每次見到妳就好自然會諗返果時，大家製造呢個回憶令我地嘅距離拉近咗好多，妳都會敢問一啲大膽少少嘅問題，而我可以用男人嘅角度去解釋比妳聽，原本我仲諗咗好多表白用嘅對白，最後乜春都無講過，妳扶住我行去地鐵站，好自然嘅身體接觸，我第一次拖妳手就係咁神奇。
妳話我對眼望住妳會有一種幸福感覺，係啊，因為遇到妳先會有呢對幸福眼出現，人生不如意事十常八九，淨低果一二變成咗妳，如果咁都唔幸福，仲有咩值得我去記住，妳最鍾意聞我身上果陣味，妳話男朋友味可以幫妳減壓，就算妳聞到好似痴漢咁款我都覺得妳好可愛，一啲咁少嘅事都可以比妳咁大享受，好彩我唔係油頭毒撚，第一次見面無嚇走妳，咁多偶然變成咗必然，注定我要一直愛妳，我搵唔到唔愛妳嘅原因，所以見到妳呢條問題令我有啲緊張。
答案妳知架，我知妳想我講比妳聽。
有啲尷尬，但係，
我愛妳嘛。
