妳問我，今年紀念日book酒店定去個短途旅行好？

我夾起舊叉燒慢慢嘴嚼妳問我嘅問題。

記得識妳嘅時候只係想做朋友，大家其實話題唔多，鍾意嘅嘢都唔同，大家都比較內向同獨立，有時候成個禮拜都傾唔到一次計，果陣連智能電話都未流行，短訊更加唔會亂傳，但你會自然咁搵我，我得閒又會開電腦搵下妳，大家相處自然，自然到約出黎見面嘅時候我都無陌生嘅感覺，有時候見面嘅目的係咪需要加上去呢？

如果只係純粹想見吓個人，咁揀一個特別嘅日子又係唔係做多咗呢？有時候自己就會諗呢啲無聊嘅問題，唔記得幾時開始，妳約見面嘅時候會問我想做啲乜，而其實我只係想單純見妳多啲，聽吓妳講啲嘢，但住咗呢個地少人多嘅地方，想搵一個無人打擾嘅位靜靜地傾計都無乜可能，可能係咁大家都變得要搵一樣嘢做先可以見到面。

有時可能係睇場戲，我會攬住妳，其實套片未必岩睇，但攬住妳就可以睇落去，果種一齊做一件事嘅感覺比起妳送隻貴錶比我來得更有意思，成日都聽啲朋友講情侶間要不時製造下驚喜，而我都有諗過，但果種物質帶來的喜悅令我覺得自己好冇用，要用送禮黎令一個人開心，咁自己嘅作用係咩，單靠一齊已經唔可以令妳開心同滿足，咁樣算唔算一種失敗，由濃轉淡應該必然會發生，若果每次見面都如若初見，大家都只係因為新鮮感而被互相吸引，咁樣其實都只不過係等判死刑，相處嘅平衡究竟應該點樣拿捏呢？

思絮回歸，妳嘅笑容帶動住小酒窩挪動，我最鍾意見到妳呢個笑得滿足嘅樣，我諗大家互相需要呢個感覺係最好，當做某一件事嘅時候我第一個自然會想到妳，有時候想靜靜一個人又唔會去打擾妳，大家都知進退唔會過分入侵，好似食呢餐飯一樣，妳無再幫我推介有咩嘢好食，我睇完個餐牌都係揀咗個叉燒飯，妳每次都會屌我啲叉燒又乾又瘦點食得落，而妳又會夾返舊黎食口裡說不，大家相處同做朋友果陣都無乜大分別，直到呢一刻妳我地嘅紀念日應該點慶祝，嗯，細心啲去諗其實我每一日都同你過緊，紀唔紀念日對我黎講只係錢使多啲咁解，可能當我係妳嘅時候都會變到妳一樣，會為一個日子，為一個男人去打扮。

一段關係開始注定會有完結，可能係生命帶來，可能係意外帶來，亦可能係因為限期到咗，我地同檯食飯嘅日子好多，撳電話嘅次數都多咗同耐咗，但其實呢啲都係自然規律，話題邊有可能一世都講唔完，總會有靜落黎嘅時候，但大家係當下唔會尷尬先係最重要，可能只係單純咁望住妳撳下電話，然後你比個價錢我睇，咦，去轉台灣都唔錯喎。妳會為我呢個少少嘅認同有雀躍，而我又會因為你雀躍而滿足，大家都各行一步，我都食埋最後一嗒叉燒飯，而妳仲有半碗食唔落嘅海南雞飯，我唔會出聲，因為我知道妳唔在乎陪我食一餐唔想食嘅飯。

揀好咗日子大家都確定可以去到，其實都唔係紀念日出發，因為大家工作都未必夾到，你比較忙因為用電腦做野，隨時隨地都要做好多回覆工作，而我只係單純賣笑捱到收鋪，一日到頭就只係應付唔同嘅要求，客人又好老細都好，甚至連同事間都要賣下笑，想靜吓諗嘢都唔得，可能係咁同妳一齊我都偏向靜靜地，大家唔會搶住講嘢，唔使諗住要送咩比妳黎氹妳，妳自然就會痴住我講好多嘢，我只要點個頭或者講聲係囉就令妳笑得好開心。

埋單送妳去搭車呢個動作已經變成習慣，同妳住得唔近，以前我都會好刻意去送妳，妳會開心，但妳都會問我攰唔攰，我緊係死都唔認啦，不過妳後來都無再叫我送你，我知道妳係心痛我個樣睇落又殘咗，成日都話我夜瞓黎提醒我，同妳一齊變成一個習慣可能係我呢世最大嘅得著，有人陪呢件事其實真係幾幸福，大家講嘅說話唔使咁刻意，唔使太過去製造一啲假美好嘅回憶，沉醉係一個製造出黎為咗要去懷念嘅記憶，我寧願即刻飛的去見妳多一陣。

咁樣先係一段我想要嘅關係。