呢個世界有無數咁多對情侶,但有幾多人係真係真心愛對方?

係咪出街會拖住手或者會攬頭攬頸就叫愛佢?我就認為唔係喇。因為,呢d行為同咩人都可以做倒。而家既你一定心諗,咁做愛未係囉,呀唔好意思,做愛都係同咩人都可以做的。(誤)

我覺得愛係一樣好抽象既野,無一個定義。以前如果你問我咩係愛,我一定唔會答得出。但而家既我…搵倒答案了。

愛係你會發自內心咁將對方當成B仔咁湊。同佢出街你會拖實佢,驚死佢會仆親,或者係比人撞親,又或者係比車撞親(不安中),總之你就會自己FF無數咁多個佢整親既場景黎自虐,然後當佢係豆腐咁呵護。

每次同佢一齊,你會感覺全世界好似得番你同佢咁。你以前唔敢或者係唔會做既野,為左佢,你會有勇氣做出黎,嗰份勇氣係會連你自己都嚇親。因為個世界得番你同佢,你唔會再介意人地既眼光,只要佢開心你就開心。

愛一個人,你會包容佢既所有缺點。每次佢不自覺咁hurt倒你之後,你會默默忍受,密密咁獨自傷心。有時佢做左d野激嬲左你,你嗰下好嬲,真係好嬲,你心諗一定要嬲比佢睇,唔應佢whatsapp,但點知轉個頭就變番笑喊樣呀哨牙仔呀咁洗曬版。

愛佢你會係每一分每一秒都喺度諗緊佢,係真係停唔倒嗰隻。你會諗佢做緊咩,食緊咩,開心定唔開心,有無同樣咁諗緊自己。你做任何野都會幻想同佢一齊做既話會係點,會好想佢喺自己身邊,你會想自己變成隻馬騮咁日日痴喺佢後面。

愛一個人其實就會好想佔有佢既全部。你會想佢咩野都話你聽,有咩都會想佢第一時間話你知先,當發現左唔係的話,你可能係會真心嬲左。佢鐘意既野,即使係你本身唔鍾意既,你都會因為佢而去了解,去接觸。佢講過既所有野,所有細節,有時甚至係佢自己講完都唔記得既野,你會記得比佢更清楚。

愛佢的話,佢開心時你會比佢更開心,佢傷心時你會比佢更傷心,你會覺得心痛。因為佢係你既所有,佢既喜怒哀樂,喺你身上,會放大左好多倍。

但其實講到尾,最能表現為愛既就係,不論係過左幾多年,三年,五年,七年,你同佢一齊,每日都好似仲係熱戀期咁。

呀仲有,唔理過左幾多年,你會仍然覺得佢係全世界最靚嗰個,不論佢根本係有幾醜。(因為呢個世界得番你同佢,而你…係比佢更醜的……)

鍾意既請like and follow my FB page ^^
https://www.facebook.com/ineverwearnightgown/