有人話過，中學時期暗戀過既嗰位會係你一世人之中最難忘記既人。

仲記得10幾年前，開學既第一日，你揀位坐左喺我斜後面。我由第一眼見倒你開始就feel倒有種「係你喇」既感覺。但可惜既係，雖然你同我既距離係咁近，但我同你既關係連朋友都稱唔上。唔知係因為嗰時既我太怕醜，定係因為我地根本係唔同既人唔會做倒朋友，定還是係因為我地根本無緣份呢？我淨係知而家深究黎都無用，過去已成過去，或者咁樣成為左一種回憶先係最好既結局。

嗰一年之後我就無再同過你一班。雖然係咁，但我仍然係成個中學生涯都暗戀住你。

每一日朝早既morning assembly，我都會留意你有無番學，因為你嗰班就係咁岩企正我嗰班隔離。自從鍾意左你之後，我每日番學既動力就變成左係為左見你。唔係講笑，每次知你無番學，我嗰日既心情真係會一野跌到落谷底，全日都無曬心情。

唔係同你同班既日子，真係極之痛苦。為左見你，我會經常喺走廊徘徊，又或者係借機會去你嗰班度搵我既朋友，一切都只係為左望倒你一眼。當有一下發現你同我對上眼，即使係一秒，那怕真係只係一秒，我都會開心到傻。

每次有咩全校性既活動，例如swimming gala，sports day呀咁，我總會瘋狂咁喺人群中搵你既身影。到你出場比賽既時侯，我就算做緊咩都好，我都總會記得去睇你，去為你打氣，雖然，呢一切你從來都無知道過。當見倒你受左傷，個身痴住膠布既時侯，我都會覺得心痛，想好好呵護你。

其實都無咩好講，因為咁多年黎都只係我自己喺遠處默默咁留意住你。嗰陣既你，係我既全部，而我，對你黎講只係一個同級同學。就連畢業嗰陣問你一齊影張相時，我都只係同你講左一兩句野。

諗番起，到而家都仲好深刻記得嗰陣鍾意你既我係幾咁瘋狂。咁多年黎，每日番學無一刻係停過諗你，無時無刻都喺度諗有咩機會可以接觸倒你。但其實，我同你既關係連點頭朋友都稱唔上，同你無過任何既交集，而你個人係點我亦都一d都唔了解，我都唔明點解自己可以鍾意左你咁多年，諗起都覺得好笑。或者，呢D真係叫一見鍾情。

但而家既我，要同你講再見了。因為，我而家終於有左想真正每日瘋狂都諗住，掛住，愛一世的人了。

鍾意我寫既野的話，請like and follow my FB ^^
https://www.facebook.com/ineverwearnightgown/