終於捱到Happy Friday！Sorry，我今日唔駛返工。咁得閒寫嘢，因為我係不務正業嘅廢青。
畢咗業幾年，我仲未返過全職，一日到黑返埋啲冇強姦金、冇福利嘅散工。有糧出咪得囉，雖然成日會遲。
炒散炒得耐，都識咗唔少同我一樣唔知自己想點嘅後生仔女，亦都有好有目標咁儲銀彈追夢嘅人。返過唔同工種，遇到唔少怪人怪事，有時都幾開眼界架。
發洩又好，記錄又好，我想開個「鬼叫我炒散」短文系列寫低自己嘅經歷。嗱！講明先，為咗唔俾朋友認出，我寫嘅嘢有修飾過，幾多成係真，你要信幾多成，自己諗。而我會唔會扮自己有修飾過嚟做頭盔，都自己諗啦，哈哈。
入返正題，其實炒散除咗要面對父母、親戚嘅Chur，啲壓力好多時都嚟自朋友，特別係識咗好多年，你睇住佢大，佢睇住你壞個種朋友。
嗰一晚gathering，我最錯係隱唔治講咗自己幾錢人工。
好記得嗰晚，同七個圍內最熟嘅中同去烚下烚下，嘆住冷氣，一張圓枱，大家迫埋圍威喂。
成幾個月冇見，第一時間梗係交換下近況啦，邊個邊個又轉咗工，邊個邊個終於拍拖。
我最簡單，咁多年都係得一句：「都係咁啦，炒緊散囉。」
大家由好鬼關心我，成日問：「點呀你，快啲搵份長工啦！」變到習慣曬，焦點變咗我有冇識到靚仔靚女，想我介紹下喎。有我都自己食咗先啦，妖。
之後就講八卦嘢，呀A奉子成婚，呀B終於考到紀律部隊埋街食井水，呀C同呀D分咗手，日日喺IG鬥曬新歡。
我就對嗰班面目模糊嘅哎呀同級同學冇乜興趣嘅，但咪當食下花生，開心下囉。我冇收到風，得個聽字，努力埋頭食雪花肥牛回本。
實情係，見住人哋個個都去到人生另一個階段，自己仲原地踏步，其實都有啲唏噓架。
八卦嘢好快講完，Z子開始例牌咁呻佢份工點衰、同事點賤，其他人都搭口講下自己點做扮工室奴隸。
冇幾耐，大家又靜咗落嚟。
坐我對面嘅Z子突然殺出一句：「余該隱，你到底一個月搵幾錢架？屋企冇詐你型咩？」
「唔係掛，講人工咁老土。」我個心反曬白眼，呢啲問題唔好問坐我隔離，做緊老師、會計師嘅人？
「講啦，大家咁熟，有咩秘密啫？」
「唔啦。」
「我對住公司班老屎忽對到厭曬啦，想轉工，或者遲啲跟你搵食。幾多啫？」
睇嚟我唔答，佢都唔肯放過我，「有時多有時少囉，唔隱定架，平均萬一蚊掛。」
呢樣真，勤力密密做，萬六、七蚊又得，有時hea啲想叉下電咪一個月返得十日八日工，搵得幾千蚊咪慢慢慳住搣囉。
點知佢大笑幾聲，「吓？乜你搵萬一蚊咁少咋？」
我永遠記得佢嘅表情同語氣，未至於望住一坺爛泥咁嚴重，反而係真心覺得呢件事好好笑，個種由心而發嘅豪邁笑聲真係吉中咗我嘅玻璃心。
我當堂嚇一跳，然後得啖笑。為咗顯示自己過得好好，我扮到一啲都唔介意，心入面開曬火：X你！你條友仔畢咗業仲耐過我，返埋啲無聊寫字樓工，搵嘅咪差唔多，好意思笑我？
我養得起自己，又交齊家用，仲有閒錢月月捐。拜得神，對得人，你憑咩摧毀我嘅價值先？
有種人成日呻到葉落，對自己嘅生活好不滿，但只要搵到人差過佢哋，佢哋就會自我感覺良好，忽然覺得人生好有意義。
「講呢啲咁掃興架。聽講呀Y近排……」有人打完場，大家好快又開咗另一包花生。
我冇心機再參與啲無聊對話。望住俾人放咗落個煲好耐嘅生根，由本身漲卜卜，而家已經謝曬皮，睇住佢哋浮浮沉沉，我覺得有啲似自己。
明明應該食Cheap Cheap生根，偏偏夾起貴價肥牛，或者都係一種虛偽啦。
之後我成日都諗返起呢件事。人哋講下笑，我咁入心，睇唔起我自己嘅，會唔會係我自己呢？我真係過得好自在？
或者大家都對自己不安，唔敢肯定自己嘅選擇有冇錯，唯有同人比較，先知道自己喺世上嘅位置。
我當然諗過搵份朝九晚五，咪唔駛成為社會異類囉，但我偏偏鍾意炒散自由自在嘅模式。就好似啲成日話轉工，又繼續留喺地獄成世嘅人咁，得個呻字。
為咗合理化自己嘅行為，我仲拎Trainspotting嘅金句嚟打飛機：「我選擇不去選擇人生」。
其實我條路，有冇行錯呢？
追吓我啲文，再由你哋話俾我聽呀。
但記住人生第一誡：千祈唔好同朋友講人工！返乜嘢工都係，人比人真係比死人架！
留言講句，你哋會唔會同朋友講人工先？
#余該隱 #鬼叫我炒散 #鬼叫我炒散PK自己揀 #人工 #家用 #炒散 #乜你搵咁少
