上集：https://post.shikoto.com/posts/135376-我屋企有隻女鬼（上）

我同小倩嘅感情愈黎愈深，但所有「人鬼情未了」嘅故事，都會出現一個搞風搞雨嘅道士。
呢個道士係我嘅朋友，阿輝。
阿輝知我買咗樓，話要上黎探我，我本來係拒絕嘅，但大家一場朋友，太強硬又好似好古怪咁。
加上之前果幾個業主有搵過法師，都趕唔走小倩，而阿輝個人遊手好閒，我估佢即使學埋啲乜道術，都唔會道行好深掛。
於是，我就畀阿輝上黎，小倩似乎都唔驚。

點知阿輝一上黎，就話我間屋陰氣好重，要驅鬼。
「我上網查咗，你呢度原來係兇宅黎，好猛鬼，所以我帶定架撐啦。」
阿輝畀我睇佢啲道具，又有符又有黑狗血咁。
我即刻搖頭：「唔係哩，我生活得好好，唔使驅鬼。」
「就算無，都買個安心丫嘛，又唔收你錢。」阿輝好強硬：「睇我一展所長啦！」

然後，阿輝就周圍貼符念咒語，好彩佢都係見唔到小倩。
我用口型示意小倩避開，但小倩唔止唔驚，仲好奇咁圍住阿輝轉。

驅下驅下，阿輝拎出黑狗血，往牆上一淋。
我見小倩就企喺旁邊，情急之下，推咗阿輝一下。
啲黑狗血就淋咗落電掣度，阿輝再跌一跌，然後......
經歷一番打999、搶救無效之後，正式宣佈，阿輝觸電死咗。

雖然我用咗網上淘番黎嘅電器，但阿輝係自己淋啲黑狗血，警方將呢件事列為意外。
然後，我屋企就多咗隻鬼。
累死阿輝，我覺得好愧疚。
而阿輝見到小倩，亦都好嬲：「都話呢間屋有鬼啦，你仲要呃我！」
但大家同一屋簷下，面左左都好辛苦，所以無幾耐就和解咗。

不過，我明明同女朋友同居，屋企多咗個男人，真係講下甜言蜜語都唔方便。
而阿輝嘅魂魄同小倩一樣，都係困喺呢間屋，出唔到去，想叫阿輝迴避下都唔得。
唉，係我累死阿輝嘅，唯有忍啦。

點知忍下忍下，就忍出一頂綠帽。
我日日都要番工，小倩同阿輝朝夕相對，阿輝靚仔過我，又有做道士嘅經驗，比我更了解鬼魂，好快就俘虜咗小倩嘅芳心。
小倩含淚望住我：「對唔住，你係一個好人......」
我可以點？連拎把刀斬死對姦夫淫婦都唔得丫。

綠帽，唔止我一個戴過；失戀，幾乎係人都失過。
通常喊幾日，傷心幾個月，個傷口就會慢慢好番。
問題係，阿輝同小倩仲住喺我屋企。
佢地無意傷害我，但佢地走唔出呢間屋。
我喺屋企果陣，佢地忍住唔打情罵俏，但又忍唔住眉來眼去咁，真係愈睇愈心痛。

最後我終於頂唔順，賣咗層樓，寧願租間劏房住。
我無諗過，我離開呢間屋，唔係因為俾鬼嚇親，而係因為情傷。
我以為鬼恐怖唔過窮，但我估唔到，窮都恐怖唔過綠帽。

－完－