我嘅初戀，係因為戴綠帽而分手嘅。
同初戀女友Kathy拍拖三個月，佢就要去外國讀書。
果陣兄弟已經同我講，話Long-D好少有好下場。
但人總係會幻想自己係特別果一個，總係覺得奇蹟會出現喺自己身上。
然後，奇蹟無出現。
兩個月後，Kathy好坦白咁講，佢鍾意咗第個。
無論我係死命哀求定淡然處之，都改變唔到結局。

果一刻，好似所有初戀分手嘅人一樣，我以為我嘅人生就咁完結。
後來先醒悟到，一個挫折唔代表乜野，因為仲有無數個挫折等緊我同你。

我講嘅「後來」，係我第十次戴綠帽之後。
正常黎講，分手有好多種原因，呃，至少都有兩種原因，我唔鍾意你，同你唔鍾意我。
但係我每一次分手，都係女友鍾意咗第個，都係戴綠帽。
如果話，係我條件唔好，咁一開始就追唔到女仔。
如果話，係我對女友唔好，咁佢地應該唔使搵到下一個，就主動提出分手。
如果話．佢地衰格，佢地騎牛搵馬，一個係咁，無理由個個都係咁。

第十次戴綠帽後，我開始認真分析呢個問題。
唔通其他人「命犯桃花」，我就「命戴綠帽」？
有好多疑點，第一，每一頂綠帽，都係拍拖3個月至半年呢段期間出現嘅；

第二，我從來無見過，搶走我女友果個男人。
呢件事相當唔尋常，你知啦，依加啲女人乜都鍾意曬，搵到更好嘅男人，點忍得住唔講？
就算唔放閃，喺FB、IG言語間炫耀下，新男友幾有錢幾有腹肌，都好正常。
但係無，我從來無得到過，果位男士嘅任何資料。

唔通有外星人落黎搶女友？仲要專門搶我嘅女友？
為咗做實驗，我開始漁翁撒網，追一啲我唔鍾意嘅女人，開始「拍拖」，睇下有無人黎搶。
無，每一個都無，每次都係我頂唔順，提出分手。
好啦，我以為綠帽魔咒解除咗，真心去追我鍾意嘅女人，同事阿婷。
追到，拍拖，四個月後，阿婷話佢鍾意咗第個。

晴天霹靂，幾乎比得上初戀Kathy提出分手果下。
即係話，呢個「綠帽魔咒」唔止畀帽我戴，仲可以知道我心底真正鍾意邊個，然後跳過我唔鍾意嘅，再去搶我鍾意果個，並且每一次都成功。
我一定要知真相！

下集：https://post.shikoto.com/posts/134762-注定戴綠帽（下）