上集:https://post.shikoto.com/posts/134580

我質問阿婷,到底佢移情別戀嘅對象係邊個,佢初初唔肯講,我逼多兩逼,
阿婷先支支吾吾咁答:「其實佢個樣有啲似你......都幾似下,我覺得尷尬,唔想畀你知。」
似我?我頭上冒出大大個問號。
阿婷好努力解釋:「個樣似,不過感覺又有少少唔同,總之同佢一齊舒服啲,哎呀我都講唔出。」
我提出咗個要求:我想見下果個男人。

阿婷梗係耍手兼擰頭啦,好似驚我淋佢漒水咁。
最後一人退一步,阿婷同意影張相畀我睇。
過兩日,阿婷無畀相我:「佢唔畀我影相。」
咁神祕?好彩阿婷開咗條片:「呢個係我屋苑閉路電視嘅片,我錄低畀你睇,睇完就死心啦。」
我正想講,閉路電視錄得模模糊糊,畀我睇有咩用?

但呢個時候,我見到片入面個男人,喺扶手電梯面前窒咗一窒,踏上電梯後,再撥一撥頭髮。
呢個動作......我細個曾經喺電梯跌親,所以每次上電梯前都會停一停,再習慣性撥頭髮舒緩緊張。
男人老狗驚電梯實在太失禮,所以我都無同其他人提過,而係自己苦練成套動作,令件事好似行雲流水咁瀟灑。
片中果個男人,拖住阿婷,雖然睇唔清個樣,但係各種小動作、姿勢,都同我一模一樣!

為咗解開謎團,我開始跟蹤阿婷。
日跟夜跟,終於畀我見到果個男人。

個樣係同我有幾分似,但又未係完全一樣。
咁又合理嘅,如果一模一樣,阿婷都會覺得唔妥啦。
我偷拍咗果個男人,Send相畀我嘅一眾前女友,問佢地當年係咪因為呢個男人,而同我分手。
幸運地,有兩個女仔覆我:「你點知嘅?不過,我同佢當年都好快散咗。」

接下來嘅事情就簡單啦,搵幾個四肢發達嘅朋友,陪我一齊去質問果個男人,點解咁多年來陰散不散,專搶我女友,仲要偷偷摸摸。
個男人一見到我,驚訝咗一陣,然後問我可唔可以叫班朋友行開少少。
朋友團退後幾步,聽唔到我地講野,但都係呈包圍嘅狀態。
個男人好認真咁講:「我係四十歲嘅你。」
我唔算驚訝,我已經諗過呢個可能性,唔係平行時空就係時間旅行。
我只係唔明,佢難得穿越一次,唔提供六合彩股票號碼畀我都算,仲要專搶我女友?係唔係「自己人」黎架?

未來版解釋:「我係突然穿越架,無記六合彩號碼,又番唔到去,咁我咪想幫下你。我知你會受好多次情傷,果啲全部都唔係你真命天女。我就趁你未情根深種,幫你斬斷情絲。」
未來嘅我,知道晒我所有優點缺點,同每一任女友相處嘅時間,要逐個擊破,根本無難度。
但我唔明:「點解你唔直接阻止我地相遇?」
「我驚改變歷史太多,會改變咗未來。」未來版見我開始嬲,即刻放軟語氣:「你放心,你下一任女友叫Gigi,你會娶佢做老婆,好幸福架。」

信唔信好?信住先啦,反正以前嘅綠帽戴咗,都除唔番。
過咗無耐,我果然識到一個叫Gigi嘅女仔,大家非常投契,好快就一齊咗。

但係拍咗一輪拖,我發現佢行蹤閃縮,好似有野瞞住我。
一查,先知Gigi同未來版暗渡陳倉!
真係佛都有火,我又去搵未來版:「你又話Gigi係我未來老婆?無情傷啦掛,你又搞佢?」
未來版個樣好哀傷:「我真係控制唔到自己,我同佢一齊咗咁多年......」
「得,Gigi讓畀你,你以後唔好搞我啲女友。」我好冷漠咁做咗呢個決定。
「點得架,佢係你未來老婆,你唔娶佢會改變歷史......」

我無理未來版嘅囉囉嗦嗦,乜野歷史乜野注定,我嘅愛情路,應該由我自己黎行。
我反思,點解未來版每次都可以搶到我嘅女友?
佢雖然了解我嘅女友,但佢體能差過我,外貌亦比我老。
終於我諗通咗,因為佢受過好多次情傷。
佢拍拖嘅年期比我長,雖然受傷會深啲,但經驗都比我多,功多藝熟,應該話更了解女人同愛情。

我諗通咗,愛情重要嘅,唔係結果,而係過程。
無論你最後果一刻係撕心裂肺,定係幸福微笑,中間嘅過程,先係令你留低回憶、令你學到野。
我決定重新上路,由初戀Kathy開始,一個個重新追求。
或者中間我會決定同某一個結婚,或者我會好痛苦,
最重要嘅,係真正體驗戀愛嘅喜與悲。

結果,果班前女友,我一個都追唔番,而未來版就開開心心同Gigi結婚,仲派帖畀我。
所以話呢,飲幾多心靈雞湯,諗通幾多道理,都無辦法你邁向失敗。

-完-