於我又準備出門，但，我又見到二佬女友既身影出現左係塊鏡到，今次行左入廁所。我即刻怒氣沖沖咁衝入廁所，又冇人。我心諗佢係有心玩野，於是我對住空無一人咁既屋企係到叫：「出黎呀！姐姐，你同我呀哥已經分左手啦！你咁做有意思咩！」我既罵聲得唔到任何回應。於是我係自己間房拎左個棒球棒，一面搜間屋，一面用棒球棒敲響周圍啲傢私，想嚇佢出黎。
「呯！ 出黎呀！出黎呀！⋯呯！呯！⋯⋯再唔出黎，我報警架啦！」但我一樣咩都搜唔到，亦得唔到任何回應。然後，我咁大既動靜噪醒左大佬同二佬，佢地由自己間房走出黎。
大佬問：「做咩事咁噪？」
我躁住底皺曬眉咁講：「佢入左黎！佢女朋友入左黎！」
二佬驚訝咁問：「係邊呀？」
「佢匿埋左，佢擺明係到玩野！我今日一定要趕佢走！」我放低左手上既武器，又走左大佬同二佬間房到房搵。我用拳頭猛打大佬個個衣櫃門，大叫：「出黎呀！你同我出黎！」我成個人癲左咁制。而大佬二佬就互相望左一眼，大佬將我拉離開個櫃，二佬就打開左個衣櫃門，而入面係咩都冇。佢地見到我咁就開始安撫我。
大佬︰「細妹，冷靜D先，你係咪眼花睇錯左咋！」佢攬住我膊頭，望住我打到損曬既拳頭。
「我冇，佢真係係到，佢真係係到，你地快D搵佢出黎！」我一面講，一面戒備咁左右張望。
我好嬲咁講︰「你地唔好咁望住我，我知你地諗緊咩！我冇睇錯，我冇睇錯。」
「我知，我知，我信你，我信你。乖！」大佬好似哄細路咁哄我返房休息，同埋幫我同佢地自己請左病假。個日，大佬就係屋企睇住我，二佬就出去搵佢女前友拎返條匙。我係房入面休息，我知道我兩個呀哥都唔信我，因為中學個時我曾經因為被診斷為有躁狂症入左青山住左一排。佢地一定以為我又發作。
我老豆都有躁狂症，因此以前成日打我呀媽，最後導致離婚收場。而我老豆咩都冇留到比我，就係留左呢個病比我。係我覺得壓力大既時侯，我就特別容易暴躁。但我同老豆唯一唔同既地方係我唔會去傷害其他人，我只會傷害我自己，每次發嬲都會係咁敲野撞野，當下既我係一D都唔會覺得痛。但當我靜落黎既時侯，我先會發現自己瘀曬同埋有地方撞到流血。 但我既病情係我讀大學既時侯已經好左好多，直到而家已經唔使再去睇醫生。
不過無論今日我係咪真係見到佢女友都好，我都知道我D情緒有D過左火。我瞓係床上，望住已經撞到損曬既手，覺得好攰，慢慢瞓著左。
我醒返之後已經係夜晚，大佬二佬準備好晚餐等我，我地靜靜地坐埋一齊食野。我開聲先，平靜咁問︰「鎖匙拎左返黎未？」
二佬支支吾吾咁講︰「未……我聯絡唔到佢。」
但大佬緊接住講︰「但我已經換左鎖頭啦！唔使擔心。」
我點點頭，佢地望住我鬆一口氣，生怕觸動我既情緒。其實，我知道我呢兩個呀哥對我好好，好鍚我。我冇都父母唔緊要，我有佢地就夠啦！
件事終於告一段落，我第二朝如常起身梳洗返工。但，我又再，又再透過塊鏡個女仔走左入廁所。經過尋日既事，我平靜左好多，慢慢咁行去廁所到望，又係一個人都冇。我唔明，唔通我真係心理作用，眼花花？我企定係鏡面前，望住鏡入面既環境，入面一D動靜都冇。正當我真係準備走既時侯，佢又出現左，我即刻另向後面，佢消失左，我又望返去鏡到。呢個時侯我就見到，佢就企左係我後面，透過鏡同我對上眼。
「搵我呀？」佢用陰沉既聲音問我。佢面色異常倉白，眼白佈滿血絲，頸上面有一條深深既血痕，最恐怖既係地下上有一灘血，不停由佢雪白既大腿流落黎。
而大佬聽到我既叫聲都衝左出黎。
「佢真係係到，佢真係係到，真係，流曬血，佢係到…….」佢地出到黎就見我瘋瘋癲癲咁自言自語。我見到二哥之後，我抽住佢衣領︰「佢發生咩事？點解成身血？佢想點？佢留係到想點？」
同樣地，佢地咩都見唔到，認為我精神病覆發。安撫完我之後，佢地係我房出面傾我既問題。
「大佬！細妹似乎精神病反發，不如我地帶佢去睇醫生啦！」
「唔得！佢又會被強制入青山住，一住又唔知幾耐，好慘架！我唔想送佢入去！」
「唔通我會想送佢入去咩？但咁落去唔係唔係辦法，我地唔使返工咩！點樣日日睇住佢呀？」
「不如你去搵你前女友拎返條鎖匙先啦！話唔定佢要拎返條屋企鎖匙先安心呢？」
「好！咁我試下啦！我而家就去佢屋企搵佢。」
佢地唔知道，我聽到曬佢地既對話，但我好肯定我見到既野係真既，唔係幻覺。冇人比我自己清楚，我自己有幾清醒。想當年我被送入青山既時侯，我都覺得無比清醒。我覺得寂寞，我覺我痛苦。我知道我只係情緒比較不穩，至少當時我係一D幻覺都冇出現過。佢地根本就唔明，我以前宣洩情緒既時候係自己虛構一個人物去打同發洩。但當時D人以為我有幻覺，其實咩係真，咩係假我好清楚。自從比人捉過入青山之後，我就冇再制造過人物出黎。而呢個女仔，都唔係我諗出黎，我好清楚，呢個係二佬闖既禍！
#有興趣可讚黑柴Facebook
https://www.facebook.com/黑柴-879053098899020
