呢個年頭，最賺錢就係地產生意。
我好幸運，老豆當年買落兩個相連嘅單位，我住一個，將另一個租出去。
因為加租頻繁，租客都經常換，呢次嘅租客係張生。
佢眉尖額窄，嘴角下垂，其實我唔太鍾意，不過見佢肯交貴租，我都唔挑三揀四。
入伙果日，張生推咗架輪椅入屋，輪椅上掛住布簾，完全望唔到裡面係咩人。
我忍唔住問：「呢位係？」
「係我太太，一年前車禍癱咗，依加仲有重病，唔吹得風。」
自此之後，每日張生番工，我都聽到佢大叫：「老婆我番工啦。」
張太就會好甜咁答：「老公我愛你。」
張生放工就會講：「老婆我番黎啦。」「我買咗妳最鍾意食嘅燒鵝脾。」
見張生風雨不改，估唔到佢咁重情義，我真係太以貌取人。
我朋友聽到呢個故事，都好感動：「張生又租屋住，又請工人，都好大負擔。」
我更正番：「下，佢無請工人。」
朋友呆一呆：「咁張生番咗工，張太點生活？大小二便呢？」
「可能用尿片。」我唔肯定，而我心裡有另一個答案：因為捱貴租，張生請唔起工人。
我覺得好愧疚，減租就無可能架啦，但有機會我都想幫下張生。
所以，我好留意張生屋企嘅動靜，有一日，我聽到隔離有人拍門送快遞。
我出去同快遞員講：「唔好催，裡面得個殘障人士，開門會慢少少，體諒下。」
過咗一陣，都係無開門，我都拍下門：「張太！張太！」
再打電話去張生屋企，都係無人應。
我好擔心，即刻拎條後備匙開門，衝入屋，客廳無人。
我行緊入房，背後突然傳來一聲大喝：「你喺我屋企做乜野？」
原來張生番咗黎，我簡單解釋兩句，就話：「快啲睇下張太有無事。」
點知張生捉住我，面色陰沉：「我無叫快遞。」
快遞員再睇下個地址，聳聳肩：「噢，我搞錯咗。」掉頭離開。
剩番我同張生大眼瞪小眼，張生神情嚴肅：「你係擅闖民居。」
俾佢嚇一嚇，我再三道歉，擺低條後備匙走咗。
事後我愈諗愈奇怪，張生咁錫張太，聽到佢有事，唔係應該第一時間去睇？點解會關心擅闖民居先？
我再諗一諗，我從來無見過張太，
而張太把聲......聽黎聽去都係「老公我愛你」、「老公真係好」，無第三句，連語氣都一模一樣。
恐怖小說情節，湧晒上個腦度，莫非張太被張生禁錮，甚至殺咗？張生只係扮張太仲喺度？
