呢幾日香港天氣開始進入真正嘅夏天，熱到HIHI。
同時亦都表示住我要進入一個急凍，蒸熟再急凍然後再蒸熟嘅燒賣人生。
【蒸籠】
如果大家都係同我一樣返office或係室內工作，但同時又要周街走就會好明白我所講嘅燒賣人生係乜野一會事。
首先香港個天氣一熱就會好焗，而且好濕。
如果你睇得我呢段文，都估你唔會每日出門口都有專車接送你去目的地嘅人，而你就一定要搭公共交通工具（３０歲人都仲要依賴交通工具真係可悲）
如果你搭巴士小巴，你等車個段時間已經係一個地獄般嘅折磨。
除左太陽出盡力咁曬你，馬路上嘅廢氣，車嘅熱力都每分每刻咁比「溫暖」你，唔使一分鐘你背脊已經濕哂。好彩嘅話，你好快上到車都舒服少少；但架車個日唔生性，等你15-20分鐘，你就好似岩岩沖完涼就要立即走入去冰格咁。
自己臭由至可，隔離個４件麻甩佬個嘅味一齊發功個下先至不得了（當然我相信隔離個麻甩佬都係咁諗我）
咁你雪完一陣，個身陣味又散咁少少，應該話你已經聞陣臭味聞到麻目左，你又要出去再曬過。
【冰箱】
每次我都話可唔可以較細少少個冷氣，啲人就會同我講：「中央冷氣無得較。」
真係HI出聲，無得較？
無得調節嘅空氣調節，咁仲叫唔叫做空氣調節？？
呢啲中央冷氣唔係無得較，只係唔會為我而較姐。
而最重要係要有班寧願著多件衫都唔想蝕冷氣嘅錢嘅「精明人仕」
因為經濟效益，你嘅工作間就自然變成雪櫃上格。
我夏天個袋都要帶多件衫，以防止自己凍死。夏天先黎冷親，其實都幾荒謬。
【打邊爐】
屋企開得冷氣自然係想涼快少少，但你偏偏係呢個毛聞開壇打邊爐？我諗唔透，情況有如冬天個陣，我啲女性朋友一邊嗌凍一邊著短裙然後話要食雪糕。
我應該係太過時，跟唔到人類進化嘅速度。
【回歸大自然】
但夏天令我最討厭永遠都係一班昆蟲大哥成日出黎玩９我。
曱甴，蚊，蠓，飛蟻，落雨前後就全部出哂黎開Party，你地玩還玩，可唔可以自己死埋一二邊自己玩？
為左避呢班大哥，我一返到屋企有理無理關門窗開冷氣，每年為佢地呢班大哥要使多幾多錢！
但有咩抵死得過，正當你以為安全，除哂衫入去沖涼先發現原來有位曱甴大哥係到等緊你？我寧願唔沖…你慢慢自己係到玩。
不過唔好以為我好憎夏天，相比冬天其實我比較喜歡夏天感覺，因為唔會凍到個人又懶又唔想郁，最重要有時個太陽曬下自己都會舒服啲，個人精神少少。
不過我肯定，到我冬天個陣又會寫「香港嘅冬天真係好攞命」
