上集：https://post.shikoto.com/posts/125116

好不容易拎走晒啲寶牒，我又諗到一個問題，日日都有人黎擲寶牒，我點阻止得咁多？
好彩我平時趙完鬆得多，隨身有帶住把利刃。
我一不做二不休，拎刀割落啲幼嘅樹枝度，逐條逐條割。
「你做乜野？停手，好痛啊！」許願樹慘叫。
然後，我喺樹幹度挖咗個洞，將自己個寶牒塞入去，拍拍屁股就走。

第二日，新聞報導：「許願樹發生斷枝意外，寶牒散落一地，懷疑善信拋擲到樹上的寶牒太重。
為免粗幹斷裂，傷及善信，警方已在許願樹周圍架起鐵欄，暫停許願。」
我仲訂咗把砍樹刀，每晚半夜，就走去割佢幾條樹枝。
聽住許願樹嘅慘叫同咒罵，就好似我步向發達嘅背景音樂。

大家見許願樹嘅「病況」愈發嚴重，唯有繼續封鎖佢。
所以，樹上只有我收埋果個寶牒。

去到月尾，許願樹逼於無奈，實現咗我嘅願望：
六合彩頭獎一注中！
有咗呢筆錢，我開始炒樓，加埋每個月許三個願望，我好快成為城中有名嘅大富豪。
發咗達之後，我就懶得再去斬樹枝，但新聞有時都講，話許願樹嘅情況愈黎愈差。
可能佢幫我實現願望，用得太多法力掛。
我靈機一觸，成立咗一個「救救許願樹」基金，話許願樹係乜野文化遺產、精神寄託，叫大家捐款，請專家黎醫佢。
許願樹終於好番啲，果一晚，我再去見佢。

「你點解又要殺我，又要救我？你都發咗達啦。」許願樹大惑不解。

我聲音哽咽：「有咗錢，我先發現心靈好空虛，好後悔傷害咗妳，原來......我早就愛上咗妳。最心痛是，愛得太遲。」
我再加多句：「就算用晒成副身家，我都要救妳。」開玩笑咩，果個基金啲錢，主要都係市民捐番黎。
許願樹沉默咗一陣，再被我哄多兩句，感動都葉都落埋，同我重歸於好。

自此之後，我開始同許願樹拍拖，間唔中哄佢兩句啫。
佢嘅傷勢慢慢康復，再次開放俾人擲寶牒，但佢只會用盡自己嘅法力，揀我嘅願望黎實現。
只有一樣野我要靠自己：追女仔。
對我黎講，一啲都唔難。
我梗係唔會話畀許願樹知，我娶咗城中最出名嘅Model啦。
就係咁，我同我嘅靚女老婆，加埋一棵樹，幸福快樂咁生活落去。

女人，就係咁神奇，
你捅佢兩刀，再講番啲好說話，佢都會覺得你係好男人。
這就是愛情。

－完－