上集:https://post.shikoto.com/posts/123825

講下講下,我開始信小曼講嘅野。
一來佢講得實在太荒謬,如果佢想呃我,講失憶都合理啲。
二來以小曼嘅脾氣,假如真係佢本人,見到我向第個女人求婚,應該打到我變豬頭。
最重要嘅係,呢個「農作物小曼」唔係原本嘅小曼,我就唔使驚,佢會唱到我身敗名裂。

自此之後,農作物小曼日日都痴住我。
我都好後悔,點解當日要一時口快,話小曼為我犧牲,搞到依加我完全唔敢趕走佢。
我應該話,小曼想推我去死,結果惡有惡報佢自己死咗,咁我咪理直氣壯唔理佢。
不過,相處耐咗,我愈黎愈鍾意農作物小曼。

佢有小曼嘅美貌,但無小曼嘅脾氣,當我係主人咁千依百順。
佢知我掛住Bonnie,仲提議:「我同Bonnie姐姐一齊服侍主人。」
呢種說話,有邊個香港女仔講得出口?都係農作物好。
我都想享齊人之福,可惜,「妳肯,Bonnie都唔肯啦。」
農作物小曼眨眨眼:「主人可以種一個Bonnie姐姐。」

種?如果有另一個Bonnie,無晒記憶,聽晒我話......如果收成好,仲唔止一個Bonnie。
咁我咪可以開個後宮?完成男人嘅夢想?

呢個念頭不斷喺我腦海中盤旋,加上小曼成日講:「第日要買張大床,預埋Bonnie姐姐一齊瞓。」勾到我心癢難耐。
終於,我喺新界一個偏僻嘅地方,租咗間屋,連埋一塊小農田。
我約Bonnie黎我屋企,我有畀機會佢架,問佢肯唔肯同小曼一齊做我老婆。
Bonnie用行動回答,打咗我一巴。
事已至此,唯有老老實實種Bonnie啦。俗語有云:「一分耕耘,一分收穫」丫嘛。

有啲野,做第二次,係輕鬆過第一次。
打暈、掘坑、埋入土。
小曼細心指點我,幾時淋水施肥,過兩日,真係生出咗細細條綠芽。
我滿心興奮,但唔知點解,警察上門捉咗我,掘咗Bonnie條屍出黎。
「我唔係殺人,我係種人啊!呢個技術好值得研究。」我指住小曼:「你地問佢就知。」
警察望咗我一眼:「我從來無聽過咁有創意嘅藉口。」

點知,小曼聲淚俱下,話我點樣禁錮佢、威逼佢,睇住我殺咗Bonnie。
原來,係小曼舉報我。

我明白晒,由始至終,都係一個局。
小曼死裡逃生,番到香港扮到千依百順,就係想陷害我。
我只係唔明,「點解妳要講到『種女朋友』咁荒謬?扮失憶唔好咩?」
「愈荒謬,先愈多人信。」小曼冷笑:「你信,係因為你想信。」
點解我會信?因為佢講中晒我希望嘅野:小曼唔搵我報復、我可以享齊人之福......

件事揚咗,所有人都話我係衰人。
我入獄後,小曼黎探我,我知佢係黎睇我有幾折墮。
我真係忍唔住問:「妳搞咁多野,有必要咩?」為咗報仇,委身喺我身邊咁耐,仲害死埋Bonnie。
小曼答:「為咗正義。」
「我係衰,但Bonnie係無辜架。」
小曼目無表情:「為咗正義,有啲犧牲係必要嘅。」

果一刻,我意識到,口口聲聲講正義嘅人,先係最邪惡果個。

-完-