今晚，係一個好特別嘅日子。
我要向女友Bonnie求婚，約好晒我同Bonnie嘅朋友，製造驚喜。
喺咁多朋友嘅見證下，我深情款款咁問：「妳願意嫁畀我嗎？」
Bonnie含羞答答，正諗住點頭，突然遠處傳來一把女聲：「你地要結婚？」
我望向門口，嚇到連戒指都跌咗落地。
門口果個女人，係我前女友小曼。
前女友阻止我求婚，都好合理......咁如果係死鬼前女友呢？
幾年前，我帶小曼番鄉下，探病重嘅嫲嫲。
嫲嫲一死，條村就發生泥石流，小曼為救我而犧牲，屍骨無存。
我番到香港，喺fb哀悼咗好耐，連新聞都有報導。
如果只係個嫉妒前女友，朋友會幫手趕走佢。
但死鬼前女友＋救命恩人前女友，令所有認得小曼嘅朋友都呆咗。
我可以點？唔通我話「我唔理妳救過我，我依加要娶第個女人」？
無可能架嘛，個名會臭晒，呢場求婚不了了之，Bonnie嬲爆爆咁走咗，朋友亦都散去。
剩番我同小曼，你眼望我眼。
我已經唔得閒思考，點解佢會死而復生，我更關心嘅係，佢會點樣報復我。
當年我要探嫲嫲，係小曼自告奮勇，話要同我一齊去。
點知番到鄉下，佢又嫌無Wifi，又嫌無冷氣，日嘈夜嘈。
嫲嫲一死，小曼居然鬆一口氣：「唉，終於死咗啦。」
平時我都忍佢嘅小姐脾氣，但果一刻，點可能唔嬲？
我打咗小曼一巴，佢撲上黎，我推開佢......混亂之間，佢撞到牆角個鋤頭，無咗呼吸。
我真係唔知係佢自己跌親，定我推咗佢落地。
我只係知道，如果我依加送佢去醫院，無論救唔救得番，我實會坐監。
望住門外果塊農田，我產生咗一個念頭。
果一晚，係我咁大個仔第一次掘田，就係為咗將小曼埋落去。
我好驚、好愧疚，不斷同自己講：「可能係小曼陽壽已盡呢，依加都算入土為安，好過喺香港火葬丫。」
好不容易掘咗個坑，擺咗小曼落去，仲未埋葬，我已經攰到幾乎虛脫。
我突然諗到個問題，到我番咗香港，塊田實有其他人耕 ，會唔會掘到小曼出黎？
就咁埋落去，過幾日會唔會有屍臭？
我完全唔知，一時驚慌，以為埋咗佢就無事！
點知鄰居只係遠遠叫咗一句：「有泥石流，快跑！」然後就跑走咗。
泥石流......分分鐘會摧毀成條村！
一個恐怖嘅災難，喺果一刻，簡直係我嘅福音。
我一走，就算有一日，小曼條屍被發現，都會當係泥石流中喪生。
我番咗香港，為咗令個謊言顯得更真實，我話小曼係救我而犧牲，講到繪影繪聲、聲淚俱下。
一段時間後，我識咗新女友Bonnie，我以為果件事已經過去。
但呢一刻，小曼活生生咁企喺我面前。
小曼開口先：「你就係光仔？」
嘩，玩失憶？
小曼笑得好甜：「我成熟咗之後，喺土入面搵到銀包同身份證，先黎到香港......」
佢講咗一輪顛沛流離嘅故事，我只聽得入一句：「咩叫『成熟咗』？」
小曼問：「有無聽過『春天種下一個女朋友，秋天就會收穫很多女朋友』？」
無錯，我係春天埋葬小曼嘅，咁唔代表秋天會生個新嘅出黎架。真係咁著數，個個男人都番鄉下種女人啦。
「我就係想問，係咪你種我架？係咪營養唔夠，先得我一個收成？」小曼神情好認真。
結果，我地討論咗成晚農業問題。
我知你地會話我傻，但我應該點回應佢？唔通講「八婆咪傻啦，係我整死妳架」？
