.jpg "浴缸有女人頭髮（上）")
今日沖涼，拉開浴簾，見到浴缸個塞度有一堆黑色長髮。
青青又唔執頭髮？我嘆氣，正諗住執起佢，突然覺得有啲唔妥。
我同居女友青青近排染咗紅髮，而我就短頭髮。
咁啲頭髮係邊個嘅？唔通浴缸底有條女屍，冤魂索命，伸啲頭髮出黎？
未等我諗通，青青衝咗入黎：「你未沖涼丫可？我去個廁所......」
話音未落，佢就望見浴缸果堆長髮。
岩啦，我諗住同佢討論下，點知佢大叫：「你個賤男，居然帶第個女人上黎，仲要同佢一齊沖涼？」
第個女人？噢，發生任何怪事，女人諗到嘅第一個可能性，永遠都係「男人出軌」。
我解釋咗好耐，青青先有少少動搖。
我諗住行出浴室，佢馬上攔住我：「唔好走住，解釋清楚先！」
女人真係麻煩，「女王，畀我著番衫先。」我赤裸嘅身軀已經凍到起晒雞皮。
出到黎，我地一齊研究呢個問題。
我地屋企幾大，偶爾都有招呼朋友上黎玩，但朋友唔會喺我屋企沖涼架嘛。
朋友嫌疑，排除。
「一定係你帶女人上黎，仲扮野？我依加就拆穿你。」青青走出門口，我怕佢做傻事，一步步跟住佢。
點知青青落到樓下，係咁問啲保安，有無見過我帶女人上黎。
保安話無，佢仲唔信，鬧人地包庇我，仲想睇保安個更表，搵埋落咗更嘅保安。
一時之間，成棟大廈都知我去滾，仲要被女友捉到。
問保安無收獲，番到屋企，青青夾硬搶我部電話黎睇，難免有少少罪證。
例如同女同事吹水，讚下個舊同學好靚女......
呢啲「天下男人都會犯的錯誤」，女人眼中已經叫「出軌」。
我好無奈：「我係口花，以後唔會囉，罪不至死啫。」
青青突然指住個垃圾桶：「你換咗新垃圾袋！」
下，呢個係咩罪名？莫須有？
「你一定係帶咗個女人上黎，垃圾袋入面有安全套，先換垃圾袋。」
我真係好後悔，見到果堆頭髮，點解唔收埋？就算我食晒落肚，都比依加嘅情況好。
我扯住青青：「唔好癲啦。」唔通真係去翻垃圾咩？
青青想甩開我，推撞之間，佢跌咗落地。
「你......你居然為咗第個女人打我！」青青悲痛欲絕咁跑咗出去。
夜晚青媽打畀我，話青青番咗佢屋企，不斷問我地發生咩事。
大佬，我真係唔知發生咩事，咪浴缸有一堆頭髮囉。
要哄番青青，最好搞清楚件「頭髮疑案」，但我諗黎諗去都無頭緒，唯有曲線救國。
我記得青青個書櫃底，有個「寶物箱」，裡面好似有佢本日記。
話唔定日記有寫，青青近排想要啲咩，我就可以買份禮物畀佢，負荊請罪。
一打開本日記，入面夾住個膠袋，裝住一堆黑色長頭髮。
又係黑色長頭髮？我影低咗，whatsapp畀青青：「妳可唔可以解釋下？」
