上集：https://post.shikoto.com/posts/118854

到我（覺得自己）有啲名氣，我學人喺網上眾籌出碟，
結果，只係眾籌到兩日嘅飯錢。
唔止咁，仲有人鬧我「貪錢」、「我個個post都有like你，你仲想要錢？」，
原來，一個創作人要食飯，真係咁難理解。

我開始喺街頭唱歌，總算有錢食飯，阿媽話係「乞食」，
我唔同意，我亦都享受唱歌，
但望住來來往往嘅人羣，我承認......的確唔係我想像中嘅「歌手」。
有一次，有個路人擺低咗一百蚊，我好感動，想多謝佢，
一抬頭，係我表弟，
佢眼神中有一種......憐憫？我好肯定，唔係欣賞我嘅歌喉。

我無咁易被擊倒！我好有禮貌咁對佢笑一笑，繼續唱我嘅歌。

我嘅心理承受能力好強大，但我個胃唔係。
到我銀行戶口剩番兩位數字，我終於死死氣氣去搵工，
搵到工之前，我番咗阿媽度食飯。
「對唔住......」我唔覺得我追求夢想有錯，不過，「阿媽，您呢次喺親戚朋友面前，一定無晒面。」

「唔係啊，親戚朋友都好感激你，三姨媽同四姑姐仲話要請你飲茶，封大利是畀你。」
感激？咩意思？
「你表弟啊，本來話要做歌手，佢見到你咁，就老老實實去搵工；
仲有四姑姐個囡，成日話要做作家，聽到你追夢追到面包都無得食，依加無諗埋啲無謂野。」
我忍唔住反駁：「真係有人成功......」
「成日講追夢成功嘅例子，搞到後生個個都想追夢，點解無人講失敗例子？

你就提供咗完美示範。聽日我約咗舊同學食飯，你一齊去，幫手勸下佢個仔腳踏實地。」
「阿媽，我真係唔識勸人。」
「唔使架，你鼓勵佢追求夢想，俾佢望下你個頹樣，
佢就明白，人無夢想，會變成一條咸魚；人無飯食，就會變成一條死魚。」

阿媽畀咗個啟示我，一年後，我出咗本書叫《追求夢想的Loser》，
新書大賣，買嘅主要都係家長，買畀仔女睇。
仲有學校請我去講talk：「Loser是怎樣煉成的？」
每次我都講：「大家都睇過追夢成功嘅新聞，但係如果個個都成功，又點會上新聞？好明顯就更多人失敗啦......」

我就繼續寫《追求夢想的Loser》，收集各行各業追夢人嘅失敗故事，出到第十三集，
仲改編成電影《無飯食有幾多種死法》、電視劇《死魚十八式》。
我無成為歌手，反而變咗個作家，
名成利就之後，出版社唯一要求係：我要Keep住個頹樣。

每一段成功背後，
都有無數人失敗咗......不過佢地無機會話你知。

－完－