番工、放工、等出糧，最慘嘅係，連出糧我都唔開心，
我覺得自己只係一個中轉站，將錢分去適當嘅地方，
畀家用、供保險、食飯搭車，儲番少少錢，無晒。
人生完全無希望，就算我第日儲夠錢買樓，結婚生仔，份人工多兩倍，
就只係變咗「供樓、畀家用、買尿片、供保險、食飯搭車」，
我依然係一個中轉站，有分別咩？
我想改變！再睇吓啲勵志新聞，講邊個唔放棄夢想，最終成為一代大師，再鼓勵年輕人追夢，
真係好熱血，我想做一個唱作歌手，唔再俾現實埋沒我嘅才華，
我要追求夢想！
阿媽話：「做乜野歌手？我養到你咁大，只係想你做一個對社會有用嘅人。」
「歌手無用咩？你都聽歌架，你都有鍾意嘅歌手！」
「唔係搵到錢，就等於對社會有用架！」講黎都晒氣。
「你鍾意做就做，我唔使你畀家用，但唔好番黎食飯！」阿媽好嬲。
呢場對話，係追求夢想必然會遇到嘅挫折，
到我企喺頒獎台上，阿媽會眼濕濕咁望住我，讚我叻仔......
番黎現實，我捱夜寫咗幾首歌，錄咗demo寄去唱片公司，無回音。
我就拍咗段片擺上網，估唔到都幾多人like，我頓時充滿信心，
加上老闆見到段片，單單打打叫我專心做野，我就乾脆辭職，專心寫歌。
辭職後，我創作咗十幾隻歌，好多人讚我唱歌好聽、有才華，仲有雜誌訪問我，讚我追求夢想添！
只有一個小問題：無錢。
以上做嘅所有野，都無一毫子收入，我只可以靠積蓄度日。
我無錢畀家用、斷供保險，日日食面包，
呢個時候，居然有唱片公司搞歌唱比賽，
唔止有巨額獎金，贏咗，就有得出道！
「鄭生，你可以出去，下一位。」評判連望都無望我。
「我先唱咗兩句......」
「OK架啦，有消息我地會通知你，下一位！」
「唔係，我仲寄咗自己寫嘅歌，我係一個唱作......」
結果？電視直播嘅決賽當然無我份，
有人話，呢場比賽只係一個Show，畀唱片公司老闆嘅世侄上位，所以有實力嘅參賽者都要喺初選淘汰。
真定假？我唔知，不過我選擇相信，
始終「比賽有黑幕架，你太勁先俾人淘汰」，聽落總係舒服過「你無實力」。
到處參加歌唱比賽，都贏咗幾個細獎，
但係，都係無收入。
下集：https://post.shikoto.com/posts/119027-人無夢想，會變成咸魚；人無飯食，會變成死魚（下）
