上集：https://post.shikoto.com/posts/117487-我嘅職業係：代人講分手（上）

未到分手，我地都估唔到，自己喺對方心目中係咩地位。
個個都以為自己知，但如果真係知，世上根本唔需要「分手」呢件事，
你感應到對方唔愛你，就唔使等人開口講分手啦！

  1. 分手一定要聽衰野
    「阿文話，同妳性格不合，對唔住。」
    女方怒吼：「點會性格不合？分明係佢鍾意咗第個！」
    「可能你地Timing唔岩。」
    「你講，阿文係咪嫌我肥咗廿磅？一定係啦，佢個賤人。」

唔甘心被飛嘅一方，通常會將分手理由定格喺「出軌」、「嫌棄」或者「你從來無愛過我」，任何其他理由都不被接受，
好似講到自己愈一無是處，就愈顯得對方賤格。
我唔明白點解分手理由有分「級數」，咩先係高級分手理由？

對方有絕症／被外星人追殺，為你好不得不離開你？

  1. 所有人都以為自己嘅故事好特別
    「明天，向阿珠分手。理由為XXX，電話號碼為XXX。」
    要知道，呢種聘用殺手式嘅簡潔訊息，並不存在於分手界。
    大部份客搵到我，都會先訴說一輪佢地嘅愛情故事，甚至未決定分唔分手，要我畀意見，或者幫手擇日。

相遇、熱戀、有問題、想分手，最多夾雜long D、第三者，
劇情一模一樣，但每個人都覺得自己好特別。
人最自私嘅，唔係行為，而係感受。
行為上，好多人會捐吓錢做吓義工，但喺大部份人心底，非洲每年有幾多兒童餓死，遠遠唔及自己生咗粒暗瘡咁重要。

畢業後，我搵咗份文員工，仲有個女朋友，
無人估得到，我就喺討論區聞名嘅「分手使者」。
我以為呢份freelance會一直做落去，直到有一日，我收到個order。

一個網名「無聊花」嘅女仔，叫我同佢男友講分手。

「我男朋友叫Peter，電話係9xxx xxxx。」
我呆咗，因為我就係Peter，果個亦係我電話號碼，
即係話，無聊花係我現實嘅女朋友。
我深呼吸，然後回覆：「妳點解想同Peter分手？」
「Peter好悶，除咗番工放工就無野做，又無新話題。」無聊花加多句：「你千祈唔好咁同Peter講，顯得我好衰。你幫我諗個原因啦，你係分手使者，咁勁，肯定有辦法。」
佢點估得到，咁勁嘅分手使者，就係佢口中好悶嘅Peter。

我應該點做？用局外人嘅身份，勸佢唔好分手？
定坦白我係分手使者，叫佢一齊參與，令佢唔再嫌我悶？
結果，我收咗佢錢。
「Peter，你已經俾人飛咗。」我對住塊鏡講，
無糾纏，無質問，係我做過最輕鬆嘅job。

當一方要分手，無論點樣講、邊個講，分別只在於土葬定火葬，
段感情已經死咗。

－完－