每個人，都聲稱自己遇過人渣；
但無一個人，會承認自己做過人渣。
只係唔肯認啫，情場上，個個都做過衰人，唔通啲人渣係天跌落黎？

衰人榜第一，一定係講分手。
好多人鍾意研究「分手理由」，其實分手無好理由。
一個想分，一個唔想分，就係與虎謀皮，
你夾硬剝咗塊老虎皮，隻老虎實咬你。

我讀中學果陣，隔離位阿明畀咗兩百蚊我，叫我代佢向阿芳講分手。
我幫阿明，唔係因為兩百蚊，而係我想追阿芳。
我嘅幻想係，我同阿芳講咗分手，阿芳好傷心，攬住我雄壯嘅肩膀黎痛哭，
我一路安慰佢，就乘虛而入......
事實證明，男人有好多幻想，同現實有火星咁遠嘅距離。

阿芳望住我，如果眼神可以殺死人，我相信佢嘅殺氣可以穿透我，隔山打阿明。

「我唔信！你叫阿明親自同我講。」
果日係暑假前一日，阿明當然一放學就消失咗，block晒阿芳嘅聯絡。
阿芳搵唔到阿明，成個暑假唯有不斷搵我......黎鬧。
到開學果日，阿芳截住阿明，阿明話：「我地真係唔適合。」
「點解你要咁對我？點解你唔親自同我講？」
「我無勇氣面對你，我係個懦夫！」
阿芳大喊一場，之後成個學年都睥住我。
你無睇錯，係睥我，而迴避令佢芳心受創嘅阿明。

正面啲諗，即使我無得同阿芳拍拖，都同阿芳講過分手，算係「拍一半拖」。
呢件事令我明白，俾人飛，一定有怨氣。
眼前果個唔係當事人，基於「兩國交鋒，不斬來使」嘅精神，阿芳只好克制怨氣，唔會用暴力解決我，

（亦可能喺基於香港法律，你用暴力解決咗來使，就會坐監，無機會解決當事人，所以要保留珍貴嘅機會）。
然後，阿芳會拒絕接受現實，好想搵當事人「講清楚」，
搵咗一兩個月，憤怒蒸發得七七八八，
到當事人出現，認衰仔，就解決埋佢最後嘅幻想，Bingo！

此後，我抱住拯救地球嘅覺悟，喺愛情討論區開post，兼職代人講分手。
好多人會鬧，分手都唔敢自己講，係懦夫，
但分手，就代表對方同你，已經變成陌生人，
陌生人係懦夫定屠夫，關你乜事呢？

做咗幾十單生意，我發現人類分手有三個特點：

  1. 分手先見到真相
    個客話：「你要安慰吓Sally，佢好愛我架，一定接受唔到。」
    點知Sally嘅反應係：「......哦，我都覺得我地唔夾。」
    如釋重負，然後加多句：「你係咪講真架？我打電話去confirm吓。」好似驚我係呃人嘅抽獎機構，令佢無得中分手頭獎咁。

又或者......「阿Ben一直為我付出，從不計較，唉，我要分手真係好衰。」
分手當天，阿Ben表示：「我為佢用咗七萬八千三百零一蚊兩毫，我有keep單，分手應該還番畀我。
最多我地好來好去，唔收果兩毫啦。」

下集：https://post.shikoto.com/posts/117665-我嘅職業係：代人講分手（下）