香港嘅公廁真係好好好臭，特別係男廁。每次入廁所我都有個問題，就係應該點樣抖氣好，用口定用鼻簡直係世紀抉擇。用鼻(即係正常呼吸)實在太臭，成陣酸叔味聞到幾秒已經頂唔順。用口又點睇？屎水味同尿押味經過你口腔，溜過你嘅舌頭同牙齒進入呼吸道，每吸一啖氣就溜過你進食嘅口腔部位一次，感覺好似食緊屎咁。
人大咗，肺活量大咗少少，我開始選擇閉氣。入公廁閉氣其實係一場自己挑戰，你要喺限時之內完成：步入>拉拉鍊>掏出>準備>發射>拉拉鍊>洗手>抹手>離開，仲緊張刺激過玩超級無敵獎門人。但我當你行出行入加埋10秒，前後拉拉鍊都要2秒，準備同整理動作又2秒，實際排泄都至少8秒啦，洗手抹手當你6秒，加加埋埋最快嘅快槍手都要用30秒。要我閉氣半分鐘，其實都接近極限，仲未計例如屙唔出或者冇廁紙等等嘅意外，閉氣結果係點？就係唔夠氣，好多時忍到咁上下，喺公廁嘅中央位置處谷到爆時，大大張開口鼻，下意識深呼吸，索咗一啖勁大嘅屎味，結果得不償失，所以話做人處事同入公廁閉氣一樣，真係要量力而為。
有見及此，我打算準備大手購入氧氣筒for出街去廁所用，搞到呀媽問係咪買嚟去浮潛，我都唔知點答好。
上網睇資料先知，原來人類閉氣最勁可以閉成十分鐘，我真係恭喜佢，去香港公廁可以百味不侵，開大都冇難度，簡直羨煞旁人。到底政府幾時先可以妥善處理好公廁衛生呢，尤其係陣臭味？
#死臭 #正公廁 #臭你又
=================
香港人，撐本地潮文。
而家主要社長執返筆，當寫blog咁，不論生活小品、身土家國，乜嘢都寫下，希望「既寫潮文，亦寫瞧聞」，閒來無事9up兩句，
請支持並like《潮文社》專頁：https://www.fb.me/9.Literature/
