情人節才不是節日，是戰爭！

「情人節，送你伴侶一份永恆的禮物！鑽石手鐲情侶套裝，現只售$28,888！」
「一年一次期間限定，給你的情人最好的體驗！自助餐連豪華客房，只需$5,888！仲會為你嘅伴侶準備驚喜小禮物！優惠數量有限，請從速預訂！」
「情人節唔知去邊慶祝？不如同你嘅情人離開香港，享受兩日一夜嘅悠閒！坐上遊輪，喺海上渡過美好嘅一夜！」

「呀！！！！係咪痴線架，一到情人節就咁多呢D廣告，真係睇到人都癲！」我（James）在公司對著一大堆的宣傳單張和電郵，煩惱著下個月的情人節應怎樣安排。

「喂！James，搞咩個樣咁頹呀？煩緊咩呀……哦，情人節活動！你唔係諗住同我講你仲未諗掂呀？」我的好朋友兼好同事，Alan驚訝的對我說。

「吓？我真係未搞掂呀！應該無問題嘅，仲有成個月……」我看著桌上的廣告，真的感到異常頭痛。

「成個月？占士哥你唔係唔記得咗，你前果兩次點解同條女散呀？」Alan的說話勾起了我慘痛的回憶！

「咩……咩者，上果兩次……邊關情人節事者！」

「吓？唔係卦占士哥！上次條女，同你過完情人節，第二日就同你講分手！再之前條女就好啲，知道你情人節會做啲咩就消失咗，等你慳返啲錢！你唔係咁樣都覺得唔關情人節事？你唔係咁天真呀？」Alan毫不留情的數落我。

「咩……咩者，咁我真係覺得唔關事呀嘛！我上兩次都有Book餐廳同有準備禮物架，所以……」我還沒有反駁完畢，卻被Alan打斷了我的說話。

「係，你係有準備，不過你準備嘅嘢分分鐘衰過唔準備囉！我問你啦，上次你同你個Ex去咗邊度食飯，同埋買咗咩禮物俾佢呀？」

「咪……咪訂咗屋企附近間餐廳囉！我有買Pandora手鏈俾佢架，聽講女仔好鍾意呢個牌子架！唔係咁都有錯呀？」我不服氣地回應。

「錯！錯！錯！所有嘢都錯！第一，情人節呀，大佬你估平日放工食飯咩？去附近屋邨餐廳唔係唔得，不過唔係果日囉！第二，禮物你送Pandora其實係有進步嘅，不過衰在唔夠細心！你知唔知根據我不負責任嘅統計，十個港女十一個都有Pandora架，你仲……」我聽到這裏，實在忍不住要打斷他！

「咪住先！你係咪玩嘢呀？十個女仔但十一個都有，咩數學嚟……」

「所以咪話你唔識嘢囉！一個港女屋企點止一條Pandora，十一個咪報細咗數囉！唉，重點係，你又唔知你個Ex屋企有啲咩款，送咗同款就係死罪啦！仲有，就算咁好彩唔同款，Pandora呢啲你平時送就話者，情人節都送咪者係無誠意囉！無誠意又係一條死罪，計落上一次個情人節，你應該死咗三次啦！而你再之前果個Ex，情人節果日直接消失埋，你就知你幾咁失敗啦！」Alan對著我搖頭歎氣，弄得我像個白痴一樣。

「痴線啦你，有無咁嚴重呀？我就唔信個個女仔都係咁。」說這句話時，我的雙手不自覺的掩著心臟的位置。

「你睇你對手啦，佢地都出賣咗你啦，根本連你自己都唔信呢個係事實！醒下啦，等我話你知，情人節根本唔係咩節日，而係一場戰爭，一個唔好彩，你就會落得死亡嘅下場！」

「吓？？？好地地一個節日，唔好講到咁啦！」我實在接受不了他如此誇張的表達手法！

「節日？你究竟知唔知呢D節日係點嚟架？我問你，端午節係做啲咩架？」

「端午咪爬龍舟食下糉咁囉，唔係有咩做？」我不明白他提及端午節的用意。

「所以話你無啲常識！端午節係紀念屈原架，死咗人先有呢個節日架！」

「吓？咁關情人節咩事先得架？」

「所以話你，根本上所有節日都係因為發生咗啲唔好嘅事而整出嚟，情人節都係一樣！」Alan激動地說。

「痴線！唔通聖誕節，復活節又係咁啦喎？」我反駁。

「根本就係，聖誕節又好復活節又好，都係因為耶穌！耶穌最後點呀？咪就係俾人殺咗囉！」

「中秋呢？」

「嫦娥奔月呀嘛，你唔係真係覺得嫦娥食咗仙丹奔月呀？根本佢就係死鬼咗！清明重陽唔洗我講啦，又係因為有人死！」

「痴線，咁七月一號呢？」

「吓？咁你都要問？咪香港嘅死亡囉！」

我沉默了，這真的無法反駁！

「你依家明啦！根本所有節日都係因為悲劇而創造出嚟！情人節當初就係紀念華倫泰被暴君殺死嘅！所以，情人節根本唔係咩節日，而係戰爭！你唔做好準備，等待你嘅，只有死亡！！！！」Alan指著我的額頭，仿佛我真的下一刻便會死去似的。

「咁......咁……咁……」我被他動搖到說不出話來！

「我話你知，一踏入二月十四日嘅零晨十二點，戰爭嘅序幕就會打開！你唔好以為你可以放鬆，你一定要諗定果一刻，係Send message俾佢，打電話俾佢，定出現喺佢面前，俾個驚喜佢！」Alan煞有介事的說。

「吓？咁都關事？」我瞪大雙眼說。

「少年你太年輕啦！我話你知，情人節當日每一步你都要行得好小心！你要記住，因為你唔係同自己比緊賽，你係同緊你女朋友身邊嘅三姑六婆競賽！只要係女人，情人節之後一定會不經意咁講起情人節當日發生嘅事！只要你做嘅嘢，Standard同佢身邊嘅朋友差太遠！你一樣難逃死亡嘅命運！但做得太誇張，隨時令到佢身邊嘅朋友對佢地嘅男朋友手起刀落！所以你話，點會唔係一場戰爭？為咗生存，究竟應該狠心咁殺死其他嘅男人，定係做到啱啱好，等大家都可以生存呢？仲有，如果中間出現咗一個叛徒，咁到時……」

「唔好再講啦！我唔想死呀！！！」我仿佛已經置身於戰場之中，隨時都會死去。

「睇嚟你終於都醒覺啦！唔緊要，作為兄弟嘅我都唔想睇住你死，反正我已經搞掂自己果邊，就等我出手幫下你啦！」

結果，我在Alan的幫助下，又買花又買禮物，又訂了高級的餐廳，第一次於萬全的狀態下出戰這個情人節！

一如Alan所料，我基本上於那次的情人節中大鑊全勝！
聽我那時的女朋友說，她的朋友好像都跟男朋友吵了一架，有的甚至分手收場！
那時，我才真正了解情人節等於戰場的意義！

這個，便是我兩年前，跟我的前任女朋友所過的情人節了。
你問我為甚麼跟她分手了？
因為我根本不是那種可以每次提供新意，能夠用金錢去堆砌愛情的男人！
所以那次情人節後，大約過了一個月，我和她還是因為價值觀不同而分手了！

那麼，我是否屬於在情人節中戰死的那一群呢？

「老公，食飯啦！」一把甜美的聲音從廚房中傳出來！

「哇，老婆，今晚咁好餸嘅？」

無錯，兩年前跟前度分手後，我很快投入了另一段感情，一年前的情人節，我跟她求婚了！
「Jenny，嫁俾我，我會好好照顧你！」

就是這樣，我結婚了！
你問為甚麼這樣快便跟她結婚？
理由很簡單！

「老婆呀，過幾日就情人節啦，不如我地出去搵間餐廳食飯啦？」我對Jenny說。

「梗係唔好啦！情人節D嘢咁貴，呃人錢架！第二日又要返工！我去買餸煮餐好嘅，喺屋企慢慢食好過啦！仲有呀，你唔好買埋啲又貴又唔好用嘅手鏈腳鏈俾我呀！我唔要架！」聽到了吧，這樣的女人我怎會捨得讓她從我的懷裏逃脫？