這間位於坑口村旁的一間保良局中學。
從開校以來，一直流傳著各式各樣的流言，而且有些內容更異常恐怖。
在這間學校的學生，不論年齡大小，他們都統稱這些事情為十不思議事件！
時間剛踏進二零一六年的十二月，天氣開始轉冷！
而且在新界地區，氣溫較市區要來得更低，所以學生都換上了冬季校服，和穿上暖和的毛衣。
就在十二月一日這天，有數位中五的學生，留在學校溫習，故事就是這樣展開的！
「呀！救命呀！日又溫夜又溫，我就黎癲啦！」正在說瘋話的，是小郭。
「嘈咩呀你，唔想溫就走啦，唔好阻住晒我溫書！」雨喬說。
「其實我都唔係好頂得順啦，真係好辛苦！都唔知溫咁多黎做乜？依家學位又唔值錢，教育制度又垃圾！根本就係拎我地D學生黎玩！」展豪說。
「講咁多做乜鬼？我地咪又係要繼續溫書！你估真係講兩句D垃圾制度就會改變咩？」大一說。
「咁又唔係呀大一，雖然制度唔會改，但係，最少我地可以試下改變，起碼都叫有掙扎過呀！」我（美玲）說。
「改變？考試制度點改變呀？」雨喬說。
「制度改唔做者，我地溫書習慣可以改架嘛！例如好似依家咁，係咁溫書都唔係辨法架嘛，我地做下其他野輕鬆下，都叫一種改變呀！」我說。
「扯！講咁耐你都係想休息之嘛！」雨喬說。
「又唔好咁講，呀邊個邊個都曾經講過，休息係為了走更長嘅路！我非常贊成美玲嘅建議！你地贊唔贊成？」小郭說，除了雨喬外，其他人馬上附和。
「唉，是旦啦！反正同人打好關係都係學習嘅一環，即管同你地一齊休息下啦！」雨喬最終也屈服。
「YES！咁事不宜遲啦，大一，不如講下呢間學校嘅十不思議事件我地知啦！話晒你都係村內人，實知道D秘密架！」我提議。
「吓？唔係呀，休息講埋晒呢D低能野？我唔理你地啦，我落去打波，打完上返黎！如果你地會早走嘅話，幫我拎埋個袋落去啦，唔該晒！」說完後，展豪馬上跑向操場。
「超！唔識貨，唔好理佢啦！大一，快D講下啦，有無D咩秘密我地唔知架？」我說。
「吓？雖然我係村內人，但聽嘅同你地一樣架！」大一說。
「唔會嘅，總會有D唔同嘅，諗下啦！」小郭說。
「係啦係啦，講D秘密野黎聽下啦！」雨喬也禁不住好奇心，大概這是女人的天性吧！
「咁呀......好啦！你地有無聽過，在大約十二年前，係呢間學校發生嘅一連串怪事？」大一這樣說，然後他們都搖了搖頭，所以大一決定把十二年前的一些怪事跟他們說。
十二年前，中學是由中一至中七組成的。
當時還有分開所謂會考和高考兩種制度，而且在中五會考時，除了升上中六外，還有重讀中五的選項！
那年，有為數不少的外校生，跑到學校來重讀中五！
在那次事件中，有一位轉校生，名字好像是子鋒。
他來了後，在學校遇到一堆奇怪的事情！
在剛進來學校時，他無意間闖進設置在學校和坑口村的結界。
原本這結界，是用來封印一隻兇猛的邪靈，那邪靈叫作黃大一。
但他來了後，不單闖進結界，而且還把結界破壞掉！
結界被破壞後，那邪靈重新回到世上。
在回復力量期間，它每天也干擾著子鋒，而且更以不同的十不思議事件，讓他感到恐懼，感到絕望！
邪靈對這種充滿負面感情的靈魂是最賞識的！
所以，那邪靈一步一步的把子鋒逼上絕境！
而且，更令子鋒感到絕望的，是那邪靈把他身邊的朋友，在他面前逼上了絕路！
子鋒的心靈因此而變得扭曲，憤怒，悲傷，絕望！
各種的負面情緒，在他心裏慢慢的生長，變得愈來愈成熟和美味！
直到種子結成的那一刻，那邪靈終於現身，把他的靈魂吞噬了！
「唔係卦？咁之後佢點呀？隻邪靈呢？如果真係咁大件事，咁者係呢間學校都仲有事囉？」我和其他人緊張的問。
「呢層我又唔知喎，不過呢，聽講果隻邪靈吞噬左果個子鋒嘅靈魂之後，仲操控埋佢嘅身體！之後更加將佢身邊嘅朋友殺得一乾二淨！」大一說。
「痴線，邊有可能呀！唔好作到咁大喎！」小郭對大一說。
但就在小郭的話音剛落，我們聽到一聲淒厲的慘叫聲！
那聲音聽起來非常刺耳，更直達我們的腦內，使課室內的眾人不寒而慄！
眾人面面相覷，一聲不響，仿佛時間亦停止了流動！
數分鐘後，他們聽到步促的腳步聲，和一把熟悉的聲音！
「救命呀！有鬼呀！」展豪瞬間推開房門，從走廊外跑了進來！
所有人看到展豪時，頓時有一種放鬆了的感覺！
只見展豪進來後，他整個人瑟縮在一角，感覺像受到了前所未有的驚嚇！
「喂！展豪！你無野呀嘛？」小郭鼓起勇氣跟他說話。
「有鬼……有鬼……有鬼……」只見展豪動也不動，只懂得不斷重覆著口中的字句。
「不如，我拎支水俾佢飲，定下驚啦！」大一說，他從袋子裏拿出一支清水，然後慢慢走向展豪！
當大一來到展豪面前，展豪看了大一一眼後，便發瘋似的大叫。
「呀！！！！你唔好埋黎呀！！！！原來係你，走呀！！！！你地都快D走呀！！！！」展豪邊叫邊逃出了課室，遺下眾人在課室內對視著。
「搞……搞咩呀佢？」小郭看著大一說。
「唔知呀？我行到埋去，佢就發晒癲咁大嗌啦！」大一無奈的說！
「你地唔好講咁多啦，我地快D去搵返展豪先啦，佢依家咁樣，都唔知會唔會做D咩傻事！」我緊張的說。
「係喎，你地兩個仲唔追，唔係要我地兩個女仔去呀？」雨喬說。
「好啦，大一，我地快D追！」小郭和大一馬上跑了出課室，兩個女同學緊隨其後。
四人幾乎把整間學校都翻轉了，但也沒有找到展豪！
「點算呀？佢去左邊呀？」我說。
「會唔會已經走左呀？不如我地都返屋企啦，我硬係覺得呢度有D唔妥！」雨喬抱著雙手，不安地說。
「你唔講都唔覺，你地有無發現，我地差唔多跑晒成間學校，但一個人都見唔到！」大一說。
經過大一的提醒，我們才發現真的很奇怪！
「我唔玩啦，我要走啦！」雨喬說完後，馬上跑到學校門口的位置。
「等……」我還沒有把話說完，只見雨喬不小心絆倒自己，像棒球時的滑疊動作一般，向前撲了出去！
就在雨喬的上半身撲出校門的一刻，突然一道鐵製大閘從天而降，把雨喬的上下半身，完美的分開了！
一瞬間，學校的大門被那道大閘關起來了！
而雨喬的下半身，則整齊的留在學校裏面，整個地板，都被她下半身所流出來的血液染成暗紅色，再加上從她體內流出來的內臟，場面有夠嘔心的！
而目睹這一切的眾人，竟完全不懂得反應過來！
原來在極度驚嚇的情況，人的防衞機制若沒有運作的話，其他功能也會跟著停頓下來！
不知道是過了一秒鐘、一分鐘、還是一刻鐘！
第一個反應過來的，是我！
我雙腳一軟，整個人跪坐在地上。
「雨……雨……雨喬佢！發生左咩事呀？嗚嗚！！！」頓時，我崩潰地大哭著！
一旁的小敦和大一也反應過來，兩人沒有發出任何聲音，只是站到我的身旁，默默地靠在一起！
然後，這個情況，被一下巨大的響聲打破了！
這聲音從操場那邊傳來，我們同時望向操場，只見操場的地上，現出了無數的裂紋，像是被甚麼東西狠狠的重擊過一樣！
而在正中央，則有一個巨人瞪著我們！
其實也不知道應否稱他做「人」，因為他雖然擁有人的姿態，有頭，有身，有四肢！
但這個「人」身高兩米多，身體異常壯碩！但整個身體，都長著大大小小的，一個又一個鮮紅色的血瘤！
其中一些在不斷的跳動著，就像一個又一個活著的心臟一般！
而他的雙臂，左手和正常人無異，只有右手粗壯得像樹幹一樣！
還能看見，那些纏繞在右臂上的大動脈，不斷的脈動著！
而最令人驚訝的，亦是其中一個最主要的原因，會把他稱為人！
就是他的長相，雖然有些腐爛和有些奇怪的血瘤在臉上，但還是能清晰看見，這個，正是剛剛跑走了的展豪！
只見這個像展豪的怪物，向我們衝了過來，小郭和我避過他的衝撞！
但大一卻被他撞得整個人飛向牆壁上，他吐了很多血以後，整個暈倒在地上！
「大一！起身呀！大一！」我想跑過去察看大一的傷勢，卻被小郭阻止了。
「唔好埋去呀，陣間佢襲擊我地點算，我地上去避一避難先啦！」小郭拉著我跑了上去，只見那怪物只是看著他們離開，完全沒有追上去的意思！
我們一口氣跑回原本的課室裏，由於過於驚嚇，而且亦消耗了大量體力，所以直接坐在地上！
感到稍為放鬆的二人，緊繃的情緒瞬間釋放出來，我們都抱著對方痛哭著！
「小郭，你覺唔覺得頭先有D奇怪呀？」我停止哭泣後，冷靜下來後向小郭提問。
「奇怪？」小郭也冷靜下來，開始回想剛才的情況。
「係呀，你無發現，頭先果隻怪物，好似唔係想襲擊我地兩個咁咩？」我說。
「你咁講.…..又好似係喎！同埋頭先我地走果陣，果隻野都無追上黎！」小郭說。
兩人又再度靜了下來，其實他們心底都有同一個疑問，但大家也不敢宣之於口！
就是，剛剛那個......究竟是否展豪！
「美玲，你覺得，頭先果個......會唔會......有萬份一嘅可能，係展豪？」
「我......我都唔知！不過，點解咁奇怪，頭先到依家，都起碼過左十分鐘！點解好似完全無動靜咁嘅？」
話音剛落，我們便聽到在走廊外，有很多聲音交雜著。
有些聽起來像交談聲，有些是拍球聲，有些則是鐵鏈的聲音！
然後，我們看見走廊外出現一道強烈的金光，所有聲音都消失了！
「喂，搵到佢地未？」一把陌生的男聲出現。
「搵鬼搵馬咩，學校咁大，都唔知佢地匿埋左係邊！」另一把陌生的女聲出現！
我和小郭互相按著對方的嘴唇，深怕發出一點聲響，會吸引了外頭的兩「人」！
「頂，俾我搵到佢地肯定好好教訓佢地！」迷之男說。
「仲講，快D殺埋隻野啦，我地維持唔到好耐！」迷之女說，然後聲音像是漸漸遠去了！
「小郭，你聽唔聽到佢地話咩匿埋，又話要教訓佢地咁！佢地唔會係搵緊我地卦？」我驚恐地說。
「唔……唔知呀！我都好亂，不過點都好啦，我會保護你！」小郭捉緊我的手說。
「咁……咁我地依家點算好呀？我好驚呀！」我感到眼角又開始滲出淚水。
「不如……我地落返去地下，睇下有無辨法離開學校啦？反正留係度都係有危險，不如搏一搏！」小郭緊握著我雙手。
「咁……咁……」我仍然猶豫不決。
「唔好諗啦，唔知頭先果兩個人幾時返黎，又唔知隻怪物會唔會突然間襲擊我地！信我啦，一齊離開呢度！」小郭堅定的看著我，然後兩人便小心翼翼的走到地下。
我們來到校門前，只見剛剛那道巨大的鐵閘消失了，地上只餘下雨喬被分開兩截的屍體！
而旁邊則躺著剛才那個巨大的怪物！
但奇怪的是，兩具屍體的頭部也失去了，像被甚麼人切割下來似的！
「點解，佢地兩個會無左個頭架？」我說。
「唔知呀！唔好講咁多啦，個鐵閘唔見左，我地快D走啦！」小郭正想拉著我離開，美玲卻停在原地不動！
「做咩呀美玲，再唔走唔知會發生咩事！」小郭催促道。
「我…..我怕會好似雨喬咁，俾果道鐵閘……閘死！」我恐懼的說著。
「唔理得咁多架啦！我地點都要搏一搏！」小郭強拉著我，準備離開！
「企係度！」後方傳來一把熟悉的聲音，但……感覺有點奇怪！
我向後一看，只見另一名小郭，掩著他的肚子，慢慢的走向他們。
「小……小郭！點解會咁架？」我看著眼前兩個小郭，感到非常混亂，於是把捉著我右手的小郭甩掉！
「美玲，同我走啦，好明顯佢變左我個樣咁！佢想殺你呀！」小郭說。
「美玲，唔好聽佢講！佢係大一，即係黃大一，不思議事件入面嘅邪靈！佢幻化左我個樣黎呃你，你跟佢出佢嘅話，下場就會好似雨喬咁！」腹部受傷的小郭說。
「美玲，你聽我講啦，我點會係大一！你諗下，由始至終，我都係你身邊！仲有，頭先果隻怪物襲擊果個先係大一！你睇佢，佢條腰受左傷，肯定佢先係大一，幻化左我黎留你係度！」沒有受傷的小郭說。
「你地兩個唔好嘈！你，答我，點解呢兩條屍會無左個頭？」我指著受傷的小郭問。
「頭先我俾呢隻怪物撞左埋牆之後，就暈低左，當我起身果陣，道閘已經唔見左！而佢兩個都已經無左個頭！所以我都唔知發生咩事！」受傷的小郭說。
「咁你又點解去左小食部，而無嘗試離開！」我繼續問。
「因為，我同你一樣，都好驚會好似雨喬咁！我試過將D無用嘅野掉出去校門，睇下會唔會又有閘出現！雖然道閘無出現，但我都仲係好驚！如果你唔信，你可以望下校門位置，你會見到我掉出去嘅散銀同鎖匙！至於點解我會係小食部，因為我聽到好似有人落緊黎，我驚又係D咩怪物，所以我匿埋左！點知俾我見到你同呢個扮成我嘅人一齊，我唔想你死，所以唯有現身同你講！」受傷的小郭解釋。
「哼，有無咁橋呀！一起身就已經見到無左兩個頭！你點解釋D怪物無殺你，佢地可以切走兩條屍個頭，點解唔殺埋你！」小郭說。
「我早估到無論講咩都好，你一定會作D理由懷疑我！好呀，如果你話出去學校無事，咁你出去先！如果道閘無出現，美玲你再跟住出去都得者，係咪？」受傷的小郭說。
「美玲，唔好信佢呀！佢肯定係諗住等我出去之後，再對付你！呢度都唔知仲有D咩怪物，你跟我出去啦！」小郭說。
雖然我的思緒仍然混亂，但眼前這個沒有受傷的小郭，感覺非常奇怪！
為甚麼他會說出有怪物把兩具屍體的頭割走？又為甚麼這麼堅持要立刻離開？
如果他真的是黃大一，那麼……我應該怎樣做才好！
他們仍在爭吵著，仿佛隨時要動起手來！
「夠啦！既然無辨法證實，不如咁啦，我地三個，一齊走出呢個校門！要生一齊生，要死一齊死！」我這樣提議。
「好呀！反正我相信早D走係好事黎！」小郭說。
「美玲！你諗清楚，如果再有道閘跌落黎，咁我地就會死，黃大一佢就會得呈架啦！」受傷的小郭說。
我慢慢的走向受傷的小郭面前：「如果你唔咁樣做，即係你先係有問題！無論點，我都會嘗試離開呢度！」
「但……但係……」受傷的小郭還在猶豫著，卻看到我偷偷的展示著我的手機，手機上顯示著「推佢出門」，他才停止了說話。
「唔好但係啦，過黎啦！一齊出去！」我拉著他走到沒有受傷的小郭面前。
「哼，一早咁做咪好囉！我會證明我無錯！」沒有受傷的小郭說。
「好！咁我地三個人手拖手，數三聲一齊係校門走出去！小郭你係中間，三聲之後，你負責拉住我地走出去，OK？」我對沒有受傷的小郭說。
「好！等我黎啦，我地好快可以逃出生天！」小郭說。
來到校門前，小郭準備倒數。
「好！三，二，一！」
就在那個「一」的聲音剛出現，我和受傷的小郭，同時把中間那個小郭向前甩了出去！
只見在他向前飛出去的瞬間，他的頭一百八十度的轉向我們，發出怨恨的目光。
「砰！」那道鐵閘再次落下來了，把這個偽小郭的身體一分為二！
我和小郭退後了數步，看著被分屍的偽小郭，總算是鬆了一口氣！
過了好一會兒，小郭開口了。
「總算……無事啦！」小郭說。
「係呀！總算無事啦！但我地依家點算好呀？」我問。
「依家？搵下其他路走啦，或者係側邊爬出去啦，總有辨法嘅！」小郭笑著對我說，我也感到重燃希望！
忽然間，我們看到剛剛那道鐵閘，慢慢的向上升起，被分屍的偽小郭，他的頭部正狠狠的看著我們！
然後，他的上半身和下半身，像磁石一樣互相吸引著，重新的連接起來！
而偽小郭的樣貌正在發生變化，他先變作展豪的模樣，然後又變成雨喬的模樣，最後則變成大一的樣子！
我和小郭被嚇得完全沒有反應，只能呆呆的看著這一切的發生！
「我明明佈置左咁耐，諗住帶俾你地最恐怖嘅一幕！點解你地會悉穿左？乖乖地被分屍咪好囉！」大一說。
「點解？點解你要咁對我地？我地做錯左D咩？」我再也抑壓不了自己的情緒，對他咆哮著！
「做錯左D咩？哈哈哈哈！係你召喚我過黎架！！！！！！你地唔守規距，一切都係你地自己攞黎！」大一對我們說。
「我地召喚你？無可能！我完全唔知你講咩！無可……」小郭看來永不可能把他的說話完成了！
因為，只見小郭的頭，不知道甚麼時候，已到了大一的手上！
「哼！有人黎搗亂，無時間聽你地講廢話！雖然無辨法再增加你地嘅恐懼感，但都好過無啦！你地嘅頭，就由我收下啦！」大一說完後，只見他雙手化作兩張利刃，快速的向我襲來，看來，我是要死了！
「四聖定身咒！同我停！！！」不知道哪裏傳來的男聲，那兩張利刃，正好在我的頸前停止了！
「你無事呀嘛？」只見一名高挑又漂亮的美女走向我，然後她雙手不知做了些甚麼，我馬上感到整個人都安心了不少！
「我……我無事！你地係咩人呀？」我看著眼前的美女，和在她一旁的男生，這男生的體形高大壯碩，雖稱不上英俊，但那正氣的樣貌，也應該能吸引不少的女子！
「我叫Irene，呢個傻仔叫子鋒，係黎救你地架！」眼前的美女向我解釋。
「子鋒？十二年前不思議事件嘅主人公？佢唔係死左咩？」我驚道。
「依家D後生女咁無禮貌架，一黎就話人死！見你都有少少靚，算啦，我唔同你計較啦！」那名男生對我說。
「仲講，快D搞掂佢啦！我個法術維持唔到好耐架！」Irene催促著子鋒！
「得啦！呢D二打六，一分鐘搞掂啦！」子鋒說話的同時，大一突然又能動了起來，幸好子鋒不知道用了甚麼道具，把他的兩張利刃都砍斷了！
「你兩個係咩人？點解要黎阻住我！」大一不再維持他的人形模樣，而是化作一團黑煙，在半空怒視著我們。
「你理得我地係咩人啦！總之你要搞佢地，我地就係黎收拾你，就係咁簡單！」子鋒滿不在乎的道。
「仲講，你話一分鐘內架，依家得返三十秒！」Irene催促他。
「我搞佢地？係佢地自己召喚我架，佢滿足唔到我嘅條件，但召喚我黎！我要佢地嘅靈魂一D都唔過份！」那團黑煙說。
「哇，你呢D同詐騙集團有咩分別？都廢事同你D未開化嘅鬼講野，無時間啦，同我收皮啦！」子鋒說完後，手上的手勢不斷變化著，口中唸唸有詞的！
「你想做咩呀？停呀！」那黑煙察覺到有點不妥，馬上衝向子鋒！
「太遲啦傻仔！九字護身法威力加強版！受死啦！」子鋒雙手指向那團黑煙，一道強光出現，像把整個夜空都點亮了似的。
「好！搞掂！收工！」子鋒說。
「你用左一分鐘零三秒！過左三秒鐘，你爭我三餐飯！」Irene說。
「哇，你同搶有咩分別呀？痴線架？」子鋒說。
「好啦，唔好講咁多啦，其他人嘅靈魂收返好未呀？差唔多要走啦！」Irene說。
「收返啦，係齊度！」子鋒不知從哪裏，把雨喬，展豪和小郭的頭部變了出來！
「咁好啦，我地出返去啦！」Irene說。
「你地唔好走住呀！可唔可以話俾我知發生咩事呀？同埋你地係咪當年不思議事件嘅主人公呀？」我問。
「小朋友，總之你記住啦，以後唔好再亂玩D咩通靈遊戲啦！呢D唔係你地應該玩架！今次算你地好彩，我同子鋒收到林校長嘅請求，先過到黎救你地！」Irene說。
「咪係囉！好彩唔係真黃大一者，只係一D路過嘅小鬼想吸收佢地嘅靈魂！不過真係奇怪，D咁嘅遊魂居然都有咁嘅力量，可以模擬到成間學校出黎，仲可以混淆到空間，等我同你搵咁耐先搵到佢！而且又識得增加恐懼感，去提升吸收時嘅靈力！真係古怪」子鋒沉思著。
「唔好諗咁多啦，如果真係有問題，下次叫師傅佢地黎進行一次法事潔淨下咪得囉！不過好彩呢隻野無傷到佢地嘅靈魂，我地就咁帶佢地離開呢度就得啦！好啦，小朋友！我地都要離開呢度啦，返到去你應該會咩都唔記得！希望你會吸取教訓，唔再玩呢D野啦！」Irene說。
整間學校像時空崩裂般，四周的環境也碎片化了！
然後，子鋒和Irene捉著我的手，進入了一道光芒之中！
清醒過來後，我、雨喬、展豪和小郭都在將軍澳醫院裏。
據老師說，原來我們四人，都是昨天留下來溫習時，一起玩了碟仙的遊戲，之後便暈倒了！
醫院檢查後，都顯示出我們是疲勞過度，而他們三人，都完全忘記了發生過的事情！
只有我一人，仍然清楚地記得發生甚麼事情！
就連夢裏，那一男一女的樣貌，和他們所說的事情，也記得一清二楚！
我實在非常好奇，他們究竟是甚麼人！
正當我這樣想時，我看見校長和他們二人都來到醫院，像在商討些甚麼似的！
我想也不想，便大叫了出來：「Irene，子鋒！你地真係係度呀？」
他們二人和校長立刻望著我。
「唔係卦？呢次麻煩啦！」Irene說。
「校長，睇黎個法事要遲D搞啦，我地要先處理呢個女仔嘅事！」子鋒說。
「點呀點呀？你地點解係度嘅？係咪又有D咩要做呀？」我非常有興趣的問。
只見他們互望了一眼，互相猜拳後，子鋒輸了！
「吓？唔係卦，要我去搞？」子鋒說。
「願賭服輸！你去搞！」Irene說。
只見子鋒慢慢的走向我：「小妹妹，有無興趣，了解下呢個世界嘅稀奇古怪野呢？你無興趣就最好啦！」
「我有！我有！！」我興奮的說。
「唉……好啦，你好返之後，去深水埗嘅呢個地址，搵一個叫做天命道壇嘅地方，去到你就可以知更多架啦！」子鋒無奈的對我說。
天命道壇？不知道是甚麼來的呢？好吧，讓我放假時過去拜訪一下吧！
完
若有興趣睇下＜＜十不思議事件＞＞正文，可於紙言觀看：https://www.shikoto.com/i/AQK
歡迎到筆者facebook，一起分享自己的怪奇經歷：https://www.facebook.com/insidemyheart2015/
.jpg)
