一個人去旅行難免覺得孤獨。
去到靚到要嘩一聲既地方，冇人同你一齊歡呼，自己一條友尖叫又做唔出。可以影下靚相同大家分享，但果個moment既激動心情難以分享。
係hostel聽到啲native english speaker講英文快到似機關槍，你想搭嗲都幾難。就算冇語言問題，當佢地傾落吧俾幾多tips，聽開邊個rapper，都幾無癮。
烈日當空，你流哂汗拉住個行李行係崎嶇不平既石路上行，街牌指示不清，你想呻下都冇得你呻，唯有呑下你既不滿默默向前行，唔通坐係條街度發牌氣？
大家都聽過一個人去旅行既好處，我唔會重複啦。獨遊有佢既樂趣，但同時有苦自己知。
如果同人夾唔到時間、你想去既地方其他人冇興趣、你需要一個人靜下等，咁獨遊亦不失為一個好出路。
孤獨？人生路上總係孤獨既，你有自己既慾望、諗法、人生考驗、責任等，冇人既路會同你一樣，大家可能有重疊既時候，但都只係彼此既過客。
從來冇人會真正明白你，就如同你都唔會完全理解一個人。人既思維難以捉摸，有先天因素亦因為大家際遇不同。大家可以有類似既想法，共同既目標，於是感覺親近，覺得可以陪伴對方。但你我始終不同，冇人可以永遠陪伴你，總有啲時刻你要一個人面對。
愛係兩個孤單既人走在一齊，互相包容遷就、努力了解對方，減少大家既孤獨感，但彌補唔到孤獨。學識面對孤獨係有必要架。
一個人既日落，如果你能承受孤單，這是一個美麗既晚上。
.jpg)
