認真你就輸了。

人在異地,我有事托一位外國朋友幫忙,佢應承左,到我真係需要佢既時候,佢話唔方便,以為我當初搵佢幫忙係隨便講下,冇諗過係真。

又試過同一條友曖昧左好耐,差唔多成年,對方仲俾左唔少動人既承諾我,當我認真討論彼此既關係,佢居然同我講話你太認真啦。

同人討論一啲我非常在乎既價值觀,我堅持自己既論點,又引用大量例子。對方見講唔過我,就話同你玩下揸,睇下你幾認真,認真你就輸了。

我聽到佢地咁講,即時受重創,覺得自己好蠢好百痴,居然同佢黎真。我一向自以為吹水能力特強,最叻亂噏,為人唔得認真踏實。但佢地話我太認真,痴Q線。

本來不斷責怪自己太愚蠢、太易信人,做咩同人認真?後來我諗通左,唔再嬲自己。我對承諾、人與人之間既關係、傾談一啲核心價值觀從來非常認真,半點也不馬虎。我同你認真係因為我對自己都好認真,我唔覺得咁樣有問題。

如果你係尊重我,請一同尊重我既認真。就正如尊重大家既宗教,唔同國家既文化,唔同既政治觀等。互相尊重係一段友好關係既基本。

關於承諾,我唔介意人地keep唔到promise,畢竟人生有太多變數,人會變,環境會變,我都講唔出有咩係永恆。但至少承諾個一下必須係真心,唔好為左敷衍我/取悅我/just for fun,求其講啲你唔諗住兌現既野。甚少發嬲,但我對呢啲唔多識尊重人,濫用認真你就輸了呢句野,以滿口虛言黎逃避真心或問題既人,我容忍度甚低。

其實人與人之間既交流冇話輸贏之分,只有意見是否不一,大家有冇互相合作幫忙既空間。係有時人太要面子,包括我,咁執着邊個係對話上佔上風,其實呢啲表面既野反而唔洗咁認真。正所謂認真你便輸了,冇話輸俾邊個,但你會輸俾你自己。

如果有人同你講認真你便輸了,冷靜啲,相信自己堅持既野,對佢既説話一笑置之就好了。哈哈。

更多文章:https://www.facebook.com/weirdclassmate/