其實面包超人根本係一套恐怖片，就好似真實版既格林童話，每個故事都隱含著驚嚇既味道同時反映一個又一個社會既現實。近日電視台重播面包超人，作為一個廢青當然每集都睇過下，但發覺越睇就越唔對路，個心仲有小小寒寒地同時都有痛心。
先講下面包超人同埋面包叔叔個樣，就好似殯儀館既紙紮公仔一樣。佢地塊面左右邊紅扑扑，除左塊面圓小小之外，就同紙紮公仔冇咩分別，唔信既各位讀者可以上網SEARCH下。同時個樣都好似高海寧，佢似咩野?大家都心照啦。面包超人有時仲要比人食左塊面，一個塊面冇左一忽既卡通人物真係幾恐怖。面包超人見到其他朋友仔肚餓果時，就會搣自己塊面一下比人食，而自己塊面就比人食左一啖。呢個面包超人更加係COSPLAY入面，都有唔少人扮，一個冇左一忽面既又似紙紮公仔既卡通人物係條街到行黎行去都咪話唔驚。最恐怖既竟然係面包超人成日會換頭。有時小朋友都會諗，做咩面包超人可以成個頭擰甩左，再換個一個新頭，如果換頭失敗會點呢?如果換換下既時候細菌人捉著左佢個頭呢?如果細菌人直接扯甩佢個頭呢?要成日換頭既卡通人物我真係唔敢再想像。
講完面包超人就講下細菌人，佢就代表社會入面永遠不被尊重既科研人同時係一個二世祖。要數全套面包超人入面最高科技既情節，就係細菌人每次坐果部飛行器，全套卡通入面坐飛行器既人物真係屈指可數，就係佢同埋紅精靈。但卡通片往往講到部飛行器冇咩料到，比面包超人一拳就打到變星星，咁樣同毛澤東話人力戰勝科技冇咩分別，最少起碼都坐係部面包車都對打幾場先啦。科技?科研?完完全全係冇用。劇入面個個角色都有野做，就連隻面包叔叔既狗都要幫手吠幾聲送下面包，唯獨係細菌人。集集佢都冇所事事出去撩事鬥非，完全唔使做野，條村入面個個都爭佢，但每次都肚佢唔死，仲要有成屋村咁大既基地，集集比人打爆部機，但下一集就搞番掂，技術之高與身家之厚真係無人能敵。
但二世祖又點? 細菌人只係紅精靈既兵!係一個港女既兵仔，紅精靈要樣冇樣，要身材就冇身材，講野冇大冇細，成日都咁串。佢叫細菌人做咩，細菌人就要照做，永遠唔會反抗，佢真係男人入面既垃圾。最慘既係佢永遠都唔可以爭一次氣比紅精靈睇，次次都打輸比面包超人，假如有一日條女跟左面包超人走，咁細菌人變左綠菌人既話可以點做?係唔係同面包超人死過?佢永遠都唔夠面包超人打，只可以眼白白咁睇住自己條女跟人走，連保護自己女朋友既能力都冇。
所謂同人唔同命，劇入面唔少人物都身懷絕技，可惜往往被人忽視，個個小朋友一諗起既就只有面包超人。螞蟻小子可以用手槍將物品變細變大，方包超人同埋炒面包超人都係好好打，最重要既一點係佢地唔使成日咁煩要換個死人頭，或者佢地根本冇面包超人咁好彩有無限量既頭供應。但佢地係依個社會入面都出左唔少力，可惜佢地出場既機會少之有少，唔同其他卡通片咁公平。睇下日本所有既戰隊，人人有份，集集都合體打怪獸永不落空，呢樣就真係叫做公平啦。有時我都會諗面包超人同監製有咩野關係，做咩成日得到監制製關照。
所以，人越大睇面包超人就會唔太開心，因為依套根本係我心目中係悲劇或者係恐怖片，小朋友睇既時候當然會覺得好得意，但大個左睇，反而有另一種味道。
