如果人唔清楚自己想要咩，都幾弊下。
如果唔清楚自己能力、興趣、將來理想工作，大學揀科或者揾工時好容易跟風，揀啲大路、睇落穩定前途有保證既科。冇興趣既話，讀書係為讀而讀，不斷chur亦唔見得標青過人，出黎做野似工作機器多啲，番工等收工，成個人好空洞好似冇靈魂咁。
如果唔清楚一件貨品對你既價值，就要跟市價做人。大減價喎，買；旅行時見到賣得平過香港既野，好抵喎，買，於是買埋堆唔適合用唔著既野。去到郊外支水賣得好貴，唔買；係歐洲物價貴，好普通一餐都三位數以上，捱麪包算啦，於是者你抑壓當下最大需要，搞到最漂亮既景色都要打個八折。
如果唔清楚你想要點既男女朋友，想要點樣既關係、相處模式，好容易拍錯拖。單身既會因為寂寞，隨便展開一段關係。拍緊拖既，可能因為對方對你唔錯，大家又對佢好好評價，就繼續一段你唔係好享受既關係。或者你想要既係一個人同你一齊癲，或者你想要既係一個咩都同你分享既人，你既需要只有自己先清楚，佢就算幾符合大眾對好男人好女人既定義，都唔一定岩你。
假設俾麵包同金你揀，唔知依家鬧緊飢荒既你會揀金。你餓左拎啲金去換麪包，當然換唔到。時間、青春、精力同樣都係trade唔到，冇左就係冇左，活在一個唔係completely free market，絕對要無時無刻諗清楚自己需要啲咩，每樣野對自己既價值呀。
.jpg)
