我舖頭有個女同事，大約20-22歲，佢好靜好孤辟，我同佢並唔熟，應該係話舖頭入面冇一個人同佢熟。佢日日都帶飯，唔會跟大隊出去食lunch，收工又係成日一個人一支箭走左。
直到有一日，我係天橋到見到佢。我知道佢同我都係住係沙田，但原來佢都同我一樣收工之後會由旺角站行去旺角東站搭車，由旺角東搭返去又少d人，又平d。可能因為佢成日收工就一支箭走左既關係，所以我從未係天橋見過佢。因為同佢並唔熟，為左避免尷尬，我放慢左腳步，唔打算爬佢頭。
但係佢行左一段路之後停左落黎，企係天橋邊望左去下面，我遠遠咁望住佢，佢個側面，佢個眼神都帶比我一種好憂傷既感覺。此時此刻，我聯想到佢想自殺，所以唔行開住，遠遠睇住佢。但係佢大約企左5分鐘，就走左。對於佢呢個行為，我好疑惑，但又無理去問佢，我地又唔熟。
之後撞到佢好多次都係咁，有一次我終於忍唔住，行左上前問：「hi，你望咩望得咁入神。」佢轉過頭黎望住我，好似比我嚇親，呆左咁既樣，當時咁近咁望住佢，我先發覺佢望落去既時候係輕輕皺住眉頭，好似有好憂愁既事煩擾住佢。佢呆左一兩秒之後，對我露出淺淺既微笑話：「冇望咩呀！你又係行去旺角東？」
我話：「係呀！一齊行啦！」
佢點點頭。
佢走開之後，我望去佢望既方向。佢望既位置有三間店—長州糯米滋，外賣壽司店同埋一間魚旦小食店。呢個時候，我靈機一觸，心諗，唔通入面有遺棄佢既親生父母，想同佢地相認又唔敢。難怪佢咁閒家，我諗孤兒都冇咩錢架啦！而佢咁孤辟絕對係因比父母遺棄既後遺症，令佢唔再相信人，所以成日一個人。望住佢個個寂寞既背影，我真係越黎越覺得佢好可憐。呢個時候佢轉頭望向我，奇怪我做咩仲唔行，於是我追左上去。由個日開始，我主動同佢交流，希望可以打開佢既心房。我地亦由原本唔熟變到有dd熟。
之後有一日，我又見到佢企左係到望，我打算上前叫佢，但見到佢竟然行左落天橋，我跑去天橋邊睇，心諗終於佢鼓起勇氣相認啦！我見到佢行左去「長州糯米滋」（os:原來係呢間），佢唔係相認，而係買左兩粒糯米滋，但係呢個已經係好大既進步啦！我心入面都為佢感到一d安慰，我笑住咁係樓梯口等佢，佢行到上黎之後，我笑住同佢講：「買左糍米滋呀？」
「嗯！」佢又係露左淺淺既微笑答我。我今次見到佢並冇皺埋眉頭，我諗佢自己都覺得開心既。
我地一面行，佢突然開口講：「其實」
我的os ：終於
「上次我望既係長州糯米滋。」
我的os ：終於要坦白啦！
「我成日收工都想食呢間既糯米滋，但係一粒要成10蚊，所以成日都好猶疑。所以企係到望好耐。」
我聽完之後呆左咁望住佢，佢拎住袋糯米滋對我露出一個怕羞既笑容。
個一刻，我覺得佢真係好可愛。
